ଟାଟା ସନ୍ସ ବୋର୍ଡରୁ ବିଦା ହେଲେ ସାଇରସ୍‌ ମିସ୍ତ୍ରୀ

ମୁମ୍ୱାଇ: କର୍ପୋରେଟ୍‌ ଜଗତରେ ଏକ ବଡ଼ ଧରଣର ପରିବର୍ତ୍ତନ ହୋଇଛି। ଆଜି ଟାଟା ସନ୍ସ ବୋର୍ଡ ଅଧ୍ୟକ୍ଷ ପଦରୁ ବିଦା ହୋଇଛନ୍ତି ସାଇରସ୍‌ ମିସ୍ତ୍ରୀ। ମୁମ୍ୱାଇରେ ଅନୁଷ୍ଠିତ ଟାଟା ସନ୍ସ ବୋର୍ଡ ବୈଠକରେ ଏହି ନିଷ୍ପତ୍ତି ନିଆଯାଇଛି। ଏଥିସହ ପୁଣି ଅଧ୍ୟକ୍ଷ ପଦକୁ ଫେରିଛନ୍ତି ୭୮ ବର୍ଷୀୟ ରତନ ଟାଟା। ସେ ଆଗାମୀ ୪ ମାସ ପାଇଁ ମଧ୍ୟବର୍ତ୍ତିକାଳୀନ ଦାୟିତ୍ୱରେ ରହିବେ। ଏହି ସମୟ ମଧ୍ୟରେ ବୋର୍ଡ ନୂଆ ଅଧ୍ୟକ୍ଷ ଚୟନ କରିବ।

ନୂଆ ଅଧ୍ୟକ୍ଷ ଚଳନ ପାଇଁ ଏକ ୫ ଜଣିଆ ସର୍ଚ୍ଚ କମିଟି ଗଠନ କରାଯାଇଛି। ଯେଉଁଥିରେ ରତନ ଟାଟା ମଧ୍ୟ ସଦସ୍ୟ ଅଛନ୍ତି। ତେବେ ସର୍ବୋଚ୍ଚସ୍ତରରେ ଏଭଳି ନେତୃତ୍ୱ ପରିବର୍ତ୍ତନର କାରଣ ସମ୍ପର୍କରେ ବୋର୍ଡ ପକ୍ଷରୁ କିଛି କୁହାଯାଇ ନାହିଁ। ସାଇରସ୍‌ଙ୍କ ଉପରେ ବିଭିନ୍ନ କାରଣରୁ ବୋର୍ଡ ଅସନ୍ତୁଷ୍ଟ ଥିବା କୁହାଯାଉଛି। ୪୮ ବର୍ଷୀୟ ସାଇରସ୍‌ ମିସ୍ତ୍ରୀ ୪ ବର୍ଷ ତଳେ ରତନ ଟାଟାଙ୍କଠାରୁ ଅଧ୍ୟକ୍ଷ ଭାର ଗ୍ରହଣ କରିଥିଲେ।