ଓଡ଼ିଆ ଖଣି ବ୍ୟବସାୟୀଙ୍କ ପ୍ରାୟ ୨୧.୧୫କୋଟି ଟଙ୍କାର ୧୮ଟି ସମ୍ପତ୍ତିକୁ ପ୍ରବର୍ତ୍ତନ ନିର୍ଦ୍ଦେଶାଳୟ ଜବତ କରିଛନ୍ତି। ଭୁବନେଶ୍ୱରର ଅନମୋଲ୍ ମାଇନ୍ସ ପ୍ରାଇଭେଟ୍ ଲିମିଟେଡ୍ କମ୍ପାନୀର ଓଡ଼ିଶାର ବିଭିନ୍ନ ସ୍ଥାନରେ ଥିବା ଏହି ସମ୍ପତ୍ତିକୁ ଜବତ କରାଯାଇଛି । ହିମାଚଳ ପ୍ରଦେଶର କମ୍ପାନୀ ମେସର୍ସ ଇଣ୍ଡିଆନ ଟେକ୍ନୋମାକ୍ କମ୍ପାନୀ ଲିଃ(ଆଇଟିସିଓଏଲ) ବ୍ୟାଙ୍କ ଋଣ ଅର୍ଥରେ ଜାଲିଆତି କରିବା ମାମଲାରେ ପ୍ରବର୍ତ୍ତନ ନିର୍ଦ୍ଦେଶାଳୟ ଏହି କାର୍ଯ୍ୟାନୁଷ୍ଠାନ ନେଇଛି ।
ବ୍ୟାଙ୍କ ଅଫ ଇଣ୍ଡିଆରୁ ୨୦୦୯ରୁ ୨୦୧୩ ମସିହା ମଧ୍ୟରେ ଜାଲିଆତି କରି ଆଇଟିସିଓଏଲ୍ କମ୍ପାନୀ ଆଣିଥିବା ଋଣ ଅର୍ଥକୁ ବେଆଇନ ଭାବେ ନିଜର ଅନ୍ୟ କମ୍ପାନୀ ଓ ଓଡ଼ିଶାର ଅନମୋଲ୍ ଖଣି କମ୍ପାନୀ ସହ ଯୌଥ ଉଦ୍ୟୋଗ ମାଧ୍ୟମରେ ବିନିଯୋଗ କରିଥିବା ଜଣାପଡ଼ିଛି । ହିମାଚଳ ପ୍ରଦେଶ କ୍ରାଇମବ୍ରାଂଚର ଅଭିଯୋଗ ଆଧାରରେ ପ୍ରବର୍ତ୍ତନ ନିର୍ଦ୍ଦେଶାଳୟ ତଦନ୍ତ କରି ଏହି କାର୍ଯ୍ୟାନୁଷ୍ଠାନ ଗ୍ରହଣ କରିଛି ।
ସୂଚନା ଅନୁସାରେ, ଖଣି ବ୍ୟବସାୟୀ ଶକ୍ତିରଞ୍ଜନ ଦାଶ ଓ ସୌମ୍ୟା ସେଫାଳିକା ଦାଶଙ୍କ ମାଲିକାନାରେ ଥିବା କମ୍ପାନୀ ଅନମୋଲ୍ ମାଇନ୍ସ ପ୍ରାଇଭେଟ୍ ଲମିଟେଡର ବଡ଼ବିଲସ୍ଥିତ ୭ଟି ଜମି ଓ ଫ୍ଲାଟ୍ , ଖୋର୍ଦ୍ଧାରେ ୬ଟି ଜମି, କଟକରେ ଗୋଟିଏ ଆବାସିକ ଫ୍ଲାଟ୍ ଓ ଭୁବନେଶ୍ୱରରେ ୪ଟି ସମ୍ପତ୍ତିକୁ ପ୍ରବର୍ତ୍ତନ ନିର୍ଦ୍ଦେଶାଳୟ ଜବତ କରିଛି । ହିମାଚଳପ୍ରଦେଶ କମ୍ପାନୀ ଇଣ୍ଡିଆନ ଟେକ୍ନୋମେକ୍ କମ୍ପାନୀ ଲିଃ ଦ୍ୱାରା ବ୍ୟାଙ୍କ ଋଣ ଜାଲିଆତିରେ ସମ୍ପୃକ୍ତିକୁ ନେଇ ପ୍ରିଭେନସନ୍ ଅଫ ମନି ଲଣ୍ଡ୍ରିଂ ଆକ୍ଟ(ପିଏମଏଲଏ)-୨୦୦୨ର ପ୍ରାବଧାନ ଆଧାରରେ ଏହି କାର୍ଯ୍ୟାନୁଷ୍ଠାନ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଗ୍ରହଣ କରିଛି।
ଇଣ୍ଡିଆନ ଟେକ୍ନୋମେକ୍ କମ୍ପାନୀ ଓ ଏହାର ପ୍ରମୋଟରମାନଙ୍କ ଦ୍ୱାରା ଏହି ବ୍ୟାଙ୍କ ଋଣ ଜାଲିଆତି ବିରୁଦ୍ଧରେ ପ୍ରବର୍ତ୍ତନ ନିର୍ଦ୍ଦେଶାଳୟ ପାଖରେ ହିମାଚଳ ପ୍ରଦେଶ କ୍ରାଇମବ୍ରାଂଚ ପକ୍ଷରୁ ଏଫଆଇଆର ରୁଜୁ ହୋଇଥିଲା । ତଦନ୍ତବେଳେ ପ୍ରବର୍ତ୍ତନ ନିର୍ଦ୍ଦେଶାଳୟ ଏହା ଏକ ସୁସଂଗଠିତ ବ୍ୟାଙ୍କ ଠକେଇ ବୋଲି ଜାଣିବାକୁ ପାଇଥିଲେ । ଇଣ୍ଡିଆନ ଟେକ୍ନୋମେକ୍ ଯେଉଁ ଉଦ୍ଦେଶ୍ୟରେ ଋଣ ଅର୍ଥକୁ ବ୍ୟାଙ୍କ ଅଫ ଇଣ୍ଡିଆରୁ ଆଣିଥିଲା ସେଦିଗରେ ଖର୍ଚ୍ଚ କରିନଥିଲା । ବରଂ ନିଜର ଅନ୍ୟ ଏକ ସହାୟକ କମ୍ପାନୀ ଆଇଟିସିଓଏଲ୍ ହାଇଡ୍ରୋକାର୍ବନ ଲିମିଟେଡ୍ ଏବଂ ଭୁବନେଶ୍ୱର ଅନମୋଲ ମାଇନ୍ସ ଲିଃ ସହ ଯୌଥ ଉଦ୍ୟୋଗ କରି ଏହି ଅର୍ଥ ବିନିଯୋଗ କରିଥିଲା । ଉକ୍ତ ଋଣ ଅର୍ଥକୁ ଜମି କ୍ରୟ, କୋଠା ନିର୍ମାଣ ଆଦିରେ ବିନିଯୋଗ କରାଯାଇଥିଲା ।
ଏହି ଆର୍ଥିକ ଠକେଇ ଅପରାଧରେ ମନିଲଣ୍ଡ୍ରିଂ ଆକ୍ଟରେ ପୂର୍ବରୁ ୨୮୮.୯୧କୋଟି ଟଙ୍କାର ସମ୍ପତ୍ତି ଜବତ କରାଯାଇଥିଲା । ଏବେ ଜବତ ସମ୍ପତ୍ତିକୁ ମିଶାଇ ମୋଟ ୩୧୦.୦୬କୋଟି ଟଙ୍କାର ସମ୍ପତ୍ତି ଜବତ ହୋଇଥିବା ଜଣାପଡ଼ିଛି ।