ବିଧାୟକଙ୍କୁ ଚାନ୍ଦା ମାଗି ଧରାପଡ଼ିଲେ ନକଲି ମାଓବାଦୀ

fake-maoistନୟାଗଡ଼: ନିଜକୁ ମାଓବାଦୀ ବୋଲି ପରିଚୟ ଦେଇ ଦଶପଲ୍ଳା ବିଧାୟକଙ୍କୁ ଫୋନ୍‌ରେ ୨୫ ଲକ୍ଷ ଟଙ୍କା ଚାନ୍ଦା ମାଗି ଥିବା ଯୁବକକୁ ପୋଲିସ୍ ଗିରଫ କରିଛି। ତା’ ନାଁ ସୁଶାନ୍ତ ନାୟକ। ତା’ ଘର ନୟାଗଡ଼ ଜିଲ୍ଲାର କଳସାଖମଣ ନୂଆଗାଁରେ।

ନୟାଗଡ଼ ଏସ୍‌ପି ମନୋରଞ୍ଜନ ମହାନ୍ତି କହିଛନ୍ତି,“ମେ’ ୧୬ ତାରିଖରେ ସୁଶାନ୍ତ ଦଶପଲ୍ଲା ବିଧାୟକ ପୂର୍ଣ୍ଣ ନାଏକଙ୍କୁ ଫୋନ୍ କରି ୨୫ ଲକ୍ଷ ଟଙ୍କା ମାଗିଥିଲା। ଏତେ ପରିମାଣର ଟଙ୍କା ଦେବା ପାଇଁ ସେ କିଛି ସମୟ ମହଲତ ନେଇଥିଲେ। ତା’ପରେ ସେ ଏ ସଂପର୍କରେ ପୋଲିସ୍‌କୁ ଜଣାଇଥିଲେ। ପୋଲିସ୍ ଅଭିଯୁକ୍ତର ମୋବାଇଲ୍‌ ଫୋନ୍‌ କଲ୍‌ ଡିଟେଲ୍‌ ଯାଞ୍ଚ କରିଥିଲା ଓ ତା’ ପାଖରେ ପହଞ୍ଚିବାକୁ ସମର୍ଥ ହୋଇଥିଲା।  ଅଭିଯୁକ୍ତର ମୋବାଇଲ୍ ଫୋନ୍ ଜବତ କରାଯାଇଛି।”

ଏପରି ଧମକ ଦେଇ ସୁଶାନ୍ତ ଆଗରୁ କଳସାଖମଣ ସମିତି ସଭ୍ୟଙ୍କ ଠାରୁ ୨୫ ହଜାର ଟଙ୍କା ଆଣିଥିବା ନେଇ ପୋଲିସ୍ ଜେରା ବେଳେ ପ୍ରକାଶ କରିଛି।

ଅଭିଯୁକ୍ତ ସୁଶାନ୍ତ କହିଛି ଯେ ତା’ ମା’ର ଚିକିତ୍ସା ଓ ବନ୍ଧାପଡ଼ିଥିବା ଜମିକୁ ମୁକୁଳାଇବା ପାଇଁ ସେ ବିଧାୟକଙ୍କୁ ଚାନ୍ଦା ମାଗିଥିଲା।