ବଞ୍ଚିଲାନି କଳିଯୁଗର କର୍ଣ୍ଣ

ସମ୍ବଲପୁର: ବଞ୍ଚିଲାନି କଳିଯୁଗର କର୍ଣ୍ଣ। ଟୋକେଇରେ ଭାସୁଥିବା ଅବସ୍ଥାରେ ଉଦ୍ଧାର ହୋଇ ହସ୍‌ପିଟାଲ ଆସିଲା। ହେଲେ ଉଦ୍ଧାରର କେଇ ଘଣ୍ଟା ଭିତରେ ଚିକିତ୍ସାଧୀନ ଅବସ୍ଥାରେ ହସ୍ପିଟାଲରେ ଆଖିବୁଜି ଦେଲା ଶିଶୁପୁତ୍ରଟି। ଏଭଳି ଏକ ସମ୍ବେଦନଶୀଳ ଘଟଣା ଘଟିଛି ସମ୍ବଲପୁର ସହରରେ। ଗୋପାଲପାଲ୍ଲୀ ନିକଟ କେନାଲରେ ଶନିବାର ସକାଳେ ଶିଶୁପୁତ୍ରଟି ନିସ୍ତେଜ ଅବସ୍ଥାରେ ଭାସୁଥିବା ଦେଖି ସ୍ଥାନୀୟ ଲୋକେ ତାକୁ ଉଦ୍ଧାର କରିଥିଲେ। ପୋଲିସକୁ ଖବର ଦିଆଯିବା ପରେ ପୋଲିସ ଭ୍ୟାନ୍‌ରେ ତାକୁ ତୁରନ୍ତ ସଦର ହସପିଟାଲକୁ ନିଆଯାଇ ଏସ୍‌ଏନ୍‌ସିୟୁରେ ଭର୍ତ୍ତି କରାଯାଇଥିଲା। ହେଲେ ପରବର୍ତ୍ତୀ ଅବସ୍ଥାରେ ଶିଶୁଟିର ମୃତ୍ୟୁ ଘଟିଥିଲା। ତେବେ କିଏ ଏବଂ କେଉଁ କାରଣରୁ ସଦ୍ୟଜାତ ଶିଶୁପୁତ୍ରଟିକୁ କେନାଲରେ ଭସାଇଦେଇଥିଲା ତାହା ଜଣାପଡ଼ି ନାହିଁ। ପୋଲିସ ଘଟଣାର ଖୋଳତାଡ଼ କରୁଛି।