‘ଯେଉଁମାନଙ୍କୁ ଗାଦିରେ ବସାଇଛୁ, ତାଙ୍କ ପାଇଁ ବାର ଦୁଆର ହେଉଛୁ’

ମୁମ୍ବାଇ: ଏବେ କରୋନାର ଦ୍ୱିତୀୟ ଲହର ଚାଲିଥିବା ବେଳେ ଅସ୍ତବ୍ୟସ୍ତ ହୋଇପଡ଼ିଛି ସମଗ୍ର ଦେଶ। ଦିନକୁ ଦିନ ଆକ୍ରାନ୍ତ ତଥା ମୃତକଙ୍କ ସଂଖ୍ୟା ବଢ଼ୁଥିବା ବେଳେ ଏହାଦ୍ୱାରା ଦେଶର ସ୍ୱାସ୍ଥ୍ୟ ବ୍ୟବସ୍ଥା ଏକ ପ୍ରକାର ଭୁଶୁଡ଼ିବାକୁ ବସିଛି। ଏଥିନିମନ୍ତେ ସିଧାସଳଖ ରାଜନେତାଙ୍କୁ ଟାର୍ଗେଟ କରିଛନ୍ତି ବଲିଉଡ଼ର ଆଗ ଧାଡ଼ିର ଅଭିନେତା ସୁନିଲ ସେଟ୍ଟି।

ନେତାମାନେ ଠିକ୍‌ ଭାବେ ନିଜ କାମ କରିଥିଲେ ଆଜି ଲୋକମାନଙ୍କୁ ନିଜ ପରିବାର ଲୋକଙ୍କ ଜୀବନ ବଞ୍ଚାଇବାକୁ ଏ ମେଡିକାଲରୁ ସେ ମେଡିକାଲ ଦୌଡ଼ିବାକୁ ପଡ଼ୁ ନ ଥାନ୍ତା ବୋଲି କହିଛନ୍ତି ସୁନିଲ । ଲୋକଙ୍କ ଦୁଃଖ ସହି ନ ପାରି ରାଜନେତାଙ୍କ ଉପରେ ଆକ୍ରୋଶ ଶୁଝାଇଛନ୍ତି ଏହି ଅଭିନେତା।

ସୁନିଲ ସେଟ୍ଟି କହିଛନ୍ତି, ଯେଉଁ ରାଜନେତା ଗାଦିରେ ବସୁଛନ୍ତି କେବଳ ଆଗାମୀ ୫ ବର୍ଷରେ କେତେ ରୋଜଗାର କରି ହେବ ତାହା ଭାବୁଛନ୍ତି। ବ୍ୟବସ୍ଥାରେ ସୁଧାର ଆଣିବାକୁ କେହି ତତ୍ପର ନୁହନ୍ତି।

ଏଥିସହ ସେ କହିଛନ୍ତି, ଯେଉଁମାନଙ୍କୁ ଦିନେ ଆମେ ବାଛିକି ଗାଦିରେ ବସାଇଥିଲେ, ଆଜି ସେମାନଙ୍କ ପାଇଁ ଆମେ ବାର ଦୁଆର ହେଉଛୁ। ସେମାନଙ୍କ ପାଇଁ ଆମ  ବନ୍ଧୁ, ପରିଜନଙ୍କୁ ବେଡ, ଅକ୍ସିଜେନ, ଭେଣ୍ଟିଲେଟର କିଛି ମିଳି ପାରୁ ନାହାନ୍ତି। ଏହିମାନେ ଆମକୁ ପ୍ରତ୍ୟେକ ଜିନିଷ ପାଇଁ ଅନ୍ୟପାଖରେ ହାତ ପତାଇବାକୁ ବାଧ୍ୟ କରୁଛନ୍ତି। ହେଲେ ଏହି ସମୟ ଦିନେ ବଦଳିବ ଓ ଗାଦିରେ ବସିଥିବା ଲୋକ ବି ବଦଳିବେ । ଏ ସମୟରେ ପରସ୍ପରକୁ ଦୋଷାରୋପ କରିବା ଉଚିତ ନୁହେଁ ବୋଲି ମଧ୍ୟ କହିଛନ୍ତି ଏହି ଭେଟେରାନ ଆକ୍ଟର ।

ତେଣୁ ଭବିଷ୍ୟତରେ ଏହି ଧାରାରେ ପରିବର୍ତ୍ତନ ଆଣି ଠିକ୍‌ ଲୋକଙ୍କୁ ଭୋଟ ଦେବା ପାଇଁ ସେ ଦେଶବାସୀଙ୍କୁ ଅନୁରୋଧ କରିଛନ୍ତି।  ଯେଉଁମାନେ ଅନ୍ୟମାନଙ୍କ ପାଇଁ କିଛି କରିବାର ମାନସିକତା ରଖୁଛନ୍ତି, ସେମାନେ କୌଣସି ବି ଦଳର ହୋଇପାରନ୍ତି। ତେଣୁ ସେମାନଙ୍କୁ ବାଛି ଦାୟିତ୍ୱ ଦେବା ଆମ କର୍ତ୍ତବ୍ୟ।  ପରସ୍ପରକୁ ସହଯୋଗ କରି ଏପରି ଖରାପ ସମୟରୁ ଆମକୁ ବାହାରିବାକୁ ପଡ଼ିବ ବୋଲି କହିଛନ୍ତି ବଲିଉଡ଼ର ଏହି ଷ୍ଟାଇଲିଷ୍ଟ ଅଭିନେତା।

ସମଗ୍ର ଦେଶରେ ଅକ୍ସିଜେନ ପାଇଁ ହାହାକାର ପରିସ୍ଥିତି ସୃଷ୍ଟି ହୋଇଥିବା ବେଳେ ବହୁ ବଲିଉଡ଼ କଳାକାର ସାହାଯ୍ୟ ପାଇଁ ଆଗେଇ ଆସିଛନ୍ତି। ସୁନିଲ ସେଟ୍ଟି ଗତ ମାସଠୁ ସୋଶାଲ ମିଡିଆ ଜରିଆରେ ଆବଶ୍ୟକ କରୁଥିବା ଲୋକଙ୍କ ନିକଟରେ ଫ୍ରିରେ ଅକ୍ସିଜେନ ପଠାଇବା ବ୍ୟବସ୍ଥା କରିଛନ୍ତି।  ଏବେ ସେ ବମ୍ବେ ଓ ବାଙ୍ଗାଲୋରରେ ଲୋକଙ୍କ ନିକଟରେ ମାଗଣାରେ ଅକ୍ସିଜେନ ପହଞ୍ଚାଉଥିବା ବେଳେ ଆଗକୁ ହାଇଦ୍ରାବାଦରେ ବି ଏହି ସୁବିଧା ଉପଲବ୍ଧ କରାଇବେ ବୋଲି କହିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।