ଶପଥ ପରେ ବି ବାକି ଅଛି ପିକଚର୍‌! 

ଜୟପୁର: ସମାନ ସରକାର, କିନ୍ତୁ ନୂଆ ଚେହେରାଙ୍କୁ ନେଇ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ନୂଆ ମନ୍ତ୍ରିମଣ୍ଡଳ ଗଢ଼ିଛନ୍ତି। ଏହାପରେ ଅଶୋକ ଗେହଲଟଙ୍କ ଦଳୀୟ ପ୍ରତିଦ୍ୱନ୍ଦୀ ସଚିନ ପାଇଲଟ କ୍ୟାମ୍ପ ଏବେ ଥଣ୍ଡା ପଡିଛି। କିନ୍ତୁ ବିବାଦ ଏବେ ଥମିବା ପରିବର୍ତ୍ତେ ବଢିବ ଗେହଲଟଙ୍କ ପାଇଁ। କାରଣ ପାଇଲଟଙ୍କ ସମର୍ଥକ ବିଧାୟକଙ୍କୁ ଦିଆଯାଇଥିବା ମନ୍ତ୍ରୀ ପଦ ଅଶୋକ ଗେହଲଟଙ୍କ ପାଇଁ ମୁଣ୍ଡ ବିନ୍ଧାର କାରଣ ପାଲଟିଛି।

ଦୀର୍ଘ ଦିନର ବିଚାରବିମର୍ଶ ପରେ ରାଜସ୍ଥାନରେ ୧୫ ଜଣ ମନ୍ତ୍ରୀ ଶପଥ ନେଇଛନ୍ତି। ଅଶୋକ ଗେହଲଟ୍ ଠାରୁ ସଚିନ୍ ପାଇଲଟ୍ ପର୍ଯ୍ୟନ୍ତ ସମସ୍ତ କ୍ୟାବିନେଟରେ ସମସ୍ତ ସମୀକରଣ ସମାଧାନ ହୋଇଥିବାର ଦାବି କରାଯାଇଛି। ତଥାପି ଭିତରେ ଭିତରେ ଅଶୋକ ଗେହଲଟ ନୂଆ ମନ୍ତ୍ରୀଙ୍କୁ ନେଇ କେମିତି ସରକାର ଚଳାଇବେ ନେଇ ମାନସିକ ଭାବରେ ଅନେକ କିଛି ଚିନ୍ତା କରୁଥିବା ଜଣାପଡିଛି।

ରବିବାର ଶପଥ ଗ୍ରହଣ ପୂର୍ବରୁ ଗେହଲଟ ସରକାରରେ ଥିବା ସମସ୍ତ ୩୦ ମନ୍ତ୍ରୀ ଇସ୍ତଫା ଦେଇଥିଲେ। କିନ୍ତୁ ନୂଆ ମନ୍ତ୍ରିମଣ୍ଡଳରେ ତିନି ମନ୍ତ୍ରୀଙ୍କର ପଦୋନ୍ନତି ହୋଇଛି। ଏଥି ସହିତ ବିଭିନ୍ନ ଜାତିର ବିଧାୟକଙ୍କୁ ଆଖି ଆଗରେ ରଖି ମନ୍ତ୍ରୀ ପଦ ବଣ୍ଟାଯାଇଛି। ଏଥି ସହିତ ବିଭାଗର ବିଭାଜନକୁ ନେଇ ସମସ୍ୟା ଆହୁରି ଗଭୀର ହେବାରେ ଲାଗିଛି। ତେଣୁ ପୁଣିଥରେ ହାଇକମାଣ୍ଡଙ୍କ କୋର୍ଟକୁ ସମସ୍ୟା ଆସିବ ବୋଲି ଜଣାପଡିଛି।

ସୂଚନାଯୋଗ୍ୟ, ମଧ୍ୟପ୍ରଦେଶ  ଯେମିତି ନଉପୁଜେ ତାକୁ ନଜରରେ ରଖି ରାଜସ୍ଥାନରେ ପାଇଲଟ ଶିବିରକୁ ପ୍ରଶମିତ କରିବାକୁ ଯାଇ ନୂଆ ମନ୍ତ୍ରିମଣ୍ଡଳ ଗଢା ଯାଇଛି। ସମସ୍ତ ସମୀକରଣର ସମାଧାନ ଏବଂ ମତଭେଦକୁ ସନ୍ତୁଷ୍ଟ କରିବା ପାଇଁ କ୍ୟାବିନେଟ୍ ପୁନଃ ଗଢାହୋଇଛି। କିନ୍ତୁ ମନ୍ତ୍ରୀ ପଦ ପାଇବା ସତ୍ତ୍ୱେ ଅନେକ ବିଧାୟକ ସନ୍ତୁଷ୍ଟ ନାହାନ୍ତି।

ସଚିନ ପାଇଲଟଙ୍କ ନିକଟ ବିଧାୟକ ବ୍ରିଜେନ୍ଦ୍ର ସିଂ ଓଲା ଏବେ ଏହାକୁ ନେଇ ଅସନ୍ତୋଷ ପ୍ରକାଶ କରିବା ପରେ ମାମଲା ଏବେ ଭିନ୍ନ ମୋଡ ନେଇଛି। ସେ କହିଛନ୍ତି ଯେ ଚାରିଥର ବିଧାୟକ ହୋଇଥିଲେ ମଧ୍ୟ ତାଙ୍କୁ ରାଜ୍ୟରେ ମନ୍ତ୍ରୀ କରାଯାଉଛି। କିନ୍ତୁ ଦୁଇଥର ବିଧାୟକଙ୍କୁ କ୍ୟାବିନେଟ ମନ୍ତ୍ରୀ ମାନ୍ୟତା ଦିଆଯାଇଛି। ସୂଚନା ଅନୁଯାୟୀ, ଏହା ପରେ ତାଙ୍କୁ ସ୍ୱାଧାନୀ ବିଭାଗ ସହିତ ଭଲ ବିଭାଗ ଦିଆଯିବ ବୋଲି କହି ସନ୍ତୁଷ୍ଟ ହୋଇଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।