ଜୁନ୍ ୨୧ରେ ୧୭ ଲକ୍ଷ, ୨୨ରେ ୫ ହଜାର ଟିକାକରଣ କାହିଁକି?

ନୂଆଦିଲ୍ଲୀ: ଜୁନ୍ ୨୧ ସାରା ଦେଶରେ ଚତୁର୍ଥ ପର୍ଯ୍ୟାୟ ଟିକାକରଣ ଆରମ୍ଭ ହୋଇଛି। ଏହି ଦିନ ସାରା ଦେଶରେ ୮୫ ଲକ୍ଷ ଲୋକ ଟିକା ନେଇଥିଲେ। ଯାହାକି ବଡ଼ ରେକର୍ଡ। କାରଣ ପୂର୍ବରୁ ଦୈନିକ ଟିକାକରଣ ସଂଖ୍ୟା ୩୦ ଲକ୍ଷ ଭିତରେ ରହୁଥିଲା। ହେଲେ ଦ୍ୱିତୀୟ ଦିନ ଅର୍ଥାତ୍ ମଙ୍ଗଳବାର ମୋଟ୍ ଟିକାକରଣ ସଂଖ୍ୟା  ୫୪ ଲକ୍ଷ ଥିଲା। ତେବେ ପ୍ରଥମ ଦିନ ମୋଟ୍ ଟିକାକରଣରୁ ମଧ୍ୟପ୍ରଦେଶରୁ କେବଳ ୧୭ ଲକ୍ଷ ଲୋକ ଟିକା ନେଇଥିବା ବେଳେ ଦ୍ୱିତୀୟ ଦିନରେ ମାତ୍ର ୪,୮୪୨ ଜଣ ଟିକା ନେଇଥିଲେ। ଯାହାକୁ ନେଇ ଅନେକ ପ୍ରଶ୍ନ ଉଠିଛି। ହଠାତ୍ କାହିଁକି ମଧ୍ୟପ୍ରଦେଶରେ ଏତେ ବଡ ସଂଖ୍ୟା କମିଲା।

ମଧ୍ୟପ୍ରଦେଶରେ ଜୁନ୍ ୨୧ରେ ୧୭ ଲକ୍ଷରୁ ଅଧିକ ଲୋକଙ୍କୁ କରୋନା ଟିକା ଦିଆଯାଇଥିଲା। ସେଦିନ ରାଜ୍ୟରେ ମୋଟ ୧୭,୪୪,୬୫୭ ଟିକା ଦିଆଯାଇଥିଲା। ପ୍ରଥମ ଡୋଜ୍ ଭାବରେ ୧୬,୫୭,୬୮୨ ଡୋଜ ଦିଆଯାଇଥିବା ବେଳେ ଦ୍ୱିତୀୟ ଡୋଜ ଭାବରେ ୮୬,୯୭୫ ଡୋଜ ଦିଆଯାଇଥିଲା।

ଏହା ପୂର୍ବରୁ ରାଜ୍ୟରେ ଚାଲିଥିବା ଟିକାକରଣ ଅଭିଯାନରେ ସେତେ ଅଧିକ ସଂଖ୍ୟକ ଲୋକ ଦୈନିକ ଟିକା ନେଉନଥିଲେ। ଏହା ପୂର୍ବରୁ ୨୦ ଜୁନରେ କେବଳ ୬୯୨ ଡୋଜ ଦିଆଯାଇଥିଲା। ଆଉ ଜୁନ୍ ୨୨ରେ କେବଳ ୪୮୪୨ ଡୋଜ ଦିଆଯାଇଥିଲା।

ଏହାପୂର୍ବରୁ ଜୁନ୍ ୧୪ରେ ପ୍ରାୟ ୫ ଲକ୍ଷ ଡୋଜ ଦିଆଯାଇଥିଲା, କିନ୍ତୁ ଜୁନ୍ ୧୫ ପାଖରୁ କ୍ରମାଗତ ଭାବରେ ଟିକାକରଣ ସଂଖ୍ୟା ଦୈନିକ ହ୍ରାସ ପାଇବାରେ ଲାଗିଥିଲା। ତେଣୁ ଏପରି ପରିସ୍ଥିତିରେ ପ୍ରଶ୍ନ ଉଠିବା ସ୍ୱାଭାବିକ। କାରଣ ରେକର୍ଡ କରିବା ପାଇଁ ସରକାର ପୂର୍ବରୁ ଟିକାକରଣ ପ୍ରତି ଆନ୍ତରିକତା ଦେଖାଇନଥିଲେ ବୋଲି କୁହାଯାଉଛି।

କଂଗ୍ରେସ ନେତା ଜୟରାମ ରମେଶ ଟୁଇଟ୍ କରି କହିଛନ୍ତି, ଗତ ୩ ଦିନ ମଧ୍ୟରେ ମଧ୍ୟପ୍ରଦେଶରେ ଟିକାକରଣ ଧାରା: ଜୁନ୍ ୨୦: ୬୯୨, ଜୁନ୍ ୨୧: ୧୬.୯୩ ଲକ୍ଷ, ଜୁନ୍ ୨୨: ୪୮୪୨ ରହିଛି। ଏଥିରୁ କାହାକୁ ସରକାର ବୋକା ବନାଇବାକୁ ଚେଷ୍ଟା କରୁଛନ୍ତି ବୋଲି ସେ ପ୍ରଶ୍ନ କରିଛନ୍ତି।

ତେବେ ଜୟରାମ ରମେଶଙ୍କ ଜବାବର ଉତ୍ତର ଦେଇ ମଧ୍ୟପ୍ରଦେଶର ସ୍ୱାସ୍ଥ୍ୟ ଶିକ୍ଷା ମନ୍ତ୍ରୀ ବିଶ୍ୱାସ ଷଡ଼ଙ୍ଗୀ କହିଛନ୍ତି ଯେ ଟିକାକରଣ ଅଭିଯାନ ଆରମ୍ଭ ହେବା ଦିନଠାରୁ ଲୋକଙ୍କୁ ସପ୍ତାହରେ ଚାରି ଦିନ (ସୋମବାର, ବୁଧବାର, ଗୁରୁବାର ଏବଂ ଶନିବାର) ଟିକା ଦିଆଯାଉଛି। ରବିବାର ଏବଂ ଶୁକ୍ରବାର ଟିକାକରଣ ବନ୍ଦ ରହିଛି। ଏହି ଦିନ ପୋଲିଓ ଏବଂ ମିଳିମିଳା ଟିକାକରଣ କରାଯାଉଛି। ତେଣୁ ଜୁନ୍ ୨୧ ସୋମବାର ଥିଲା, ଏବଂ ଏହି ଦିନ ଆମେ ଟିକାକରଣ ଅଭିଯାନରେ ଅନେକ ସାମିଲ ହୋଇଥିଲେ। ମଙ୍ଗଳବାର (ଜୁନ୍ ୨୨) ସାର୍ବଜନୀନ ଟିକାକରଣ ଦିନ ନୁହେଁ। ଯେଉଁ ୪ ହଜାର ଲୋକ ଟିକା ନେଇଛନ୍ତି ସେମାନେ ସମସ୍ତେ ଘରୋଇ ଡାକ୍ତରଖାନାରୁ ଟିକା ନେଇଛନ୍ତି ବୋଲି ସେ କହିଥିଲେ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।