ସେରମକୁ ୩ ହଜାର କୋଟି ଦେଲେ ସରକାର

ନୂଆଦିଲ୍ଲୀ: ମେ ୧ରୁ ସମସ୍ତ ପ୍ରାପ୍ତ ବୟସ୍କ ଟିକା ନେବେ। କେନ୍ଦ୍ର ବ୍ୟତୀତ ରାଜ୍ୟ ସରକାର, ଘରୋଇ ହସ୍ପିଟାଲ, ଔଷଧ ଦୋକାନୀ ମଧ୍ୟ ଏହି ଟିକା କିଣିପାରିବେ। ତେଣୁ ଟିକାର ଚାହିଦା ମେ ୧ ପରେ ଆହୁରି ବଢ଼ିବାକୁ ଯାଉଛି। ଆଉ ଏହି ଚାହିଦା ପୂରଣ ପାଇଁ ଦୁଇ ଟିକା କମ୍ପାନୀକୁ ପୁଞ୍ଜି ଯୋଗାଇଛନ୍ତି ସରକାର। ଏଥିପାଇଁ ସରକାର ଦୁଇ କମ୍ପାନୀକୁ ଟିକା ତିଆରି ପାଇଁ ବ୍ୟାଙ୍କ ଲୋନ ଜରିଆରେ ଆବଶ୍ୟକ ପୁଞ୍ଜି ଯୋଗାଇଛନ୍ତି। ଆଉ ସେରମ ଇନଷ୍ଟିଚ୍ୟୁଟକୁ ୩ ହଜାର କୋଟି ଓ ଭାରତ ବାୟୋଟେକକୁ ୧୫ଶହ କୋଟି ଟଙ୍କା ଆଗୁଆ ଦିଆଯିବ ବୋଲି ସରକାର ନିଷ୍ପତ୍ତି ନେଇଛନ୍ତି। ଏଥିପାଇଁ ଆଗତ ଏକ ପ୍ରସ୍ତାବକୁ କେନ୍ଦ୍ର ଅର୍ଥମନ୍ତ୍ରାଳୟ ପକ୍ଷରୁ ମଂଜୁରୀ ମିଳିଛି।

ଏପ୍ରିଲ ଆରମ୍ଭରେ କୋଭିଡ୍ ଟିକାର ଉତ୍ପାଦନ ବୃଦ୍ଧି ପାଇଁ ସେରମ କେନ୍ଦ୍ର ସରକାରଙ୍କୁ ୩ହଜାର କୋଟି ଟଙ୍କା ଅନୁଦାନ ପାଇଁ ଅନୁରୋଧ କରିଥିଲା। ଏବେ ସରକାର ସେରମର ଦାବିକୁ ଅନୁମୋଦନ ଦେଇଛନ୍ତି।

ଜେନେରାଲ ଫାଇନାନସ ନିୟମାନୁଯାୟୀ, ବିନା ବ୍ୟାଙ୍କ ଗ୍ୟାରେଣ୍ଟିରେ ଏଭଳି ଟଙ୍କା ଆଗୁଆ ଦିଆଯାଇପାରିବ ନାହିଁ  କିନ୍ତୁ କେନ୍ଦ୍ର ଅର୍ଥ ମନ୍ତ୍ରାଳୟ ପକ୍ଷରୁ ଐତିହାସିକ ନିଷ୍ପତ୍ତି ନିଆଯାଇ ଆଗୁଆ ଟଙ୍କା ଦେବାକୁ ଗ୍ରୀନ ସିଗନାଲ ଦିଆଯାଇଛି। ଏଥିପାଇଁ ସରକାର ନିୟମରେ କୋହଳ କରିଛନ୍ତି। ଏବେ ସରକାର ମାସିକ ୧୧୨ କୋଟିରୁ ଅଧିକ ଟିକା ପାଇଁ ଅର୍ଡର କରିଛନ୍ତି। ସେରମ୍ ଇନଷ୍ଟିଚ୍ୟୁଟ ମାସିକ ୭୦ କୋଟି ଟିକା ତିଆରି କରୁଥିବା ବେଳେ ଏବେ ଆବଶ୍ୟକ ପୁଞ୍ଜି ପାଇବାପରେ ମେ ଶେଷ ସୁଦ୍ଧା ୧୦୦ କୋଟିରୁ ଅଧିକ ଟିକା ତିଆରି କରିବ ବୋଲି ଜଣାପଡ଼ିଛି।

ରେମଡେସିଭିର ଇଞ୍ଜେକସନର ଦାମ କମିଲା!

ସେହିପରି କରୋନା ଚିକିତ୍ସାରେ ବହୁଳ ବ୍ୟବହାର ହେଉଛି ରେମଡେସିଭିର ଇଞ୍ଜେକସନ। ଏବେ ଏହି ଇଞ୍ଜେକସନ ତିଆରିରେ ବ୍ୟବହାର ହେଉଥିବା କଞ୍ଚାମାଲ ଉପରେ ସରକାର ଆମଦାନୀ ଶୁଳ୍କ ହଟାଇ ଦେଇଛନ୍ତି। ସରକାରଙ୍କ ଏହି ପଦକ୍ଷେପ ଘରୋଇ ବଜାରରେ ରେମଡେସିଭିରର ଦାମ ହ୍ରାସ ପାଇବ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।