ମଣିପୁର ଭୂସ୍ଖଳନ: ଆଉ ୪ ମୃତଦେହ ଉଦ୍ଧାର

ଇମ୍ଫାଲ: ମଣିପୁରରେ ହୋଇଥିବା ବିନାଶକାରୀ ଭୂସ୍ଖଳନରେ ମୃତ୍ୟୁ ସଂଖ୍ୟା ବୃଦ୍ଧି ପାଇଛି। ଆଜି ଆଉ ୪ଜଣଙ୍କ ମୃତ ଦେହ ଉଦ୍ଧାର ହୋଇଛି। ଏହି ଘଟଣାରେ ମୃତ୍ୟୁ ସଂଖ୍ୟା ଏବେ ୧୪କୁ ବୃଦ୍ଧି ପାଇଛି। ଏହି ଦୁର୍ଘଟଣାରେ ଅନେକ ଯବାନ ସହିଦ ହୋଇଛନ୍ତି। ଏଥିସହ ୨୩ ଜଣଙ୍କୁ ସୁରକ୍ଷିତ ଭାବେ ଉଦ୍ଧାର କରାଯାଇଛି। ଏବେ ବି ଆହୁରି ୪୦ରୁ ୫୦ ଜଣ ନିଖୋଜ ଅଛନ୍ତି।

ମଣିପୁର ଡିଜିପିଙ୍କ କହିବା ମୁତାବକ, ଭୁସ୍ଖଳନ ଯୋଗୁ ମାଟି ତଳେ କେତେ ସଂଖ୍ୟାରେ ଲୋକ ପୋତି ହୋଇଛନ୍ତି, ତାହା ସ୍ପଷ୍ଟ ଜଣାନାହିଁ। ପ୍ରାୟ ୬୦ ଜଣ ପୋତି ହୋଇ ରହିଥିବା ଆଶଙ୍କା କରାଯାଉଛି। ଏଥିରେ ସେନା ଯବାନ, ରେଲୱେ କର୍ମଚାରୀ, ଶ୍ରମିକ ଓ ଗାଁ ଲୋକେ ମଧ୍ୟ ସାମିଲ ଅଛନ୍ତି।

ନିଖୋଜ ବ୍ୟକ୍ତିଙ୍କ ଉଦ୍ଧାର କାର୍ଯ୍ୟ ଜାରି ରହିଛି। ଭାରତୀୟ ସେନା ଆସାମ ରାଇଫଲ୍ସ ବ୍ୟତୀତ ଏନ୍‌ଡିଆର୍‌ଏଫ୍‌, ଏସ୍‌ଡିଆର୍‌ଏଫ୍‌ ଓ ଅନ୍ୟ କର୍ମଚାରୀମାନେ ଉଦ୍ଧାର କାର୍ଯ୍ୟରେ ନିୟୋଜିତ ଅଛନ୍ତି। ଭୂସ୍ଖଳନ ଯୋଗୁ ଧସିଥିବା ମାଟିକୁ ହଟାଇ ନିଖୋଜ ବ୍ୟକ୍ତିଙ୍କ ସର୍ଚ୍ଚ ଅପରେସନ ଚାଲିଛି। ସେପଟେ ଭୂସ୍ଖଳନ ଯୋଗୁ ଏଜାଇ ନଦୀର ପ୍ରବାହ ମଧ୍ୟ ଅଟକି ଯାଇଛି। ଫଳରେ ଆଖପାଖ ଅଞ୍ଚଳରେ ବନ୍ୟା ଆଶଙ୍କା ଉପୁଜିଛି।ରିପୋର୍ଟ ମୁତାବକ, ଭସ୍ଖଳନ ବେଳେ ଆର୍ମି କ୍ୟାମ୍ପରେ ୪୩ ଜଣ ଯବାନ ଥିଲେ। ୧୪ ମୃତକଙ୍କ ମଧ୍ୟରେ ୧୧ ଜଣ ଯବାନ ଅଛନ୍ତି।

ବୁଧବାର ବିଳମ୍ବିତ ରାତିରେ ମଣିପରୁ ନୋନି ଜିଲ୍ଲାର ତୁପୁଲ ରେଲୱେ ଷ୍ଟେସନ ନିକଟ ଭାରତୀୟ ସେନାର ୧୦୭ ବାଟାଲିଆନ୍‌ ଆର୍ମି କ୍ୟାମ୍ପ ନିକଟରେ ଭୂସ୍ଖଳନ ହୋଇଥିଲା। ଏଠାରେ ଜୀବିରାମରୁ ଇମ୍ଫାଲ ମଧ୍ୟରେ ରେଳ ଲାଇନ୍‌ ନିର୍ମାଣ କାମ ଚାଲିଥିଲା। ସୈନିକମାନେ ଏହି ରେଳ ଲାଇନ୍‌ର ସୁରକ୍ଷା ପାଇଁ ହିଁ ମୁତୟନ ଥିଲେ।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।