ନୂଆଦିଲ୍ଲୀ: ହଠାତ୍ ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ତିରଥ ସିଂହ ରାଓ୍ୱତଙ୍କୁ ଦିଲ୍ଲୀ ଡକାଯାଇଛି। କୁହାଯାଉଛି ବିଜେପିର ଶୀର୍ଷ ନେତା ତାଙ୍କୁ ଦିଲ୍ଲୀ ଡକାଇଛନ୍ତି। ତେଣୁ ଆଜି ତାଙ୍କର ସମସ୍ତ କାର୍ଯ୍ୟକ୍ରମ ବାତିଲ କରାଯାଇଛି। ତେବେ ଗସ୍ତର କାରଣ ଅସ୍ପଷ୍ଟ ରହିଛି। ନିକଟରେ ବିଜେପିର ତିନି ଦିନିଆ ଚିନ୍ତନ ଶିବିର କାର୍ଯ୍ୟକ୍ରମରେ ଯୋଗ ଦେଇ ଫେରିବା ପରେ ତିରଥଙ୍କୁ ଦିଲ୍ଲୀ ଡକାଯାଇଛି। ଏହି ଚିନ୍ତନ ଶିବିରରେ ଉପ ନିର୍ବାଚନ ବାବଦରେ ଆଲୋଚନା ହୋଇଥିବା ସୂଚନା ରହିଛି। ଏବେ ବିଜେପିର କେନ୍ଦ୍ରୀୟ ନେତା ତାଙ୍କୁ ଦିଲ୍ଲୀ ଡକାଇଥିବା କୁହାଯାଉଛି।
ବିଜେପିର ଶୀର୍ଷ ନେତା ତିରଥଙ୍କୁ ଡକାଇବାର କାରଣ ବିଧାନସଭା ଉପନିର୍ବାଚନ ବୋଲି ଆକଳନ କରାଯାଉଛି। ତିରଥ ଏବେ ବି ସାଂସଦ ରହିଛନ୍ତି। ସେ କିନ୍ତୁ ମୁଖ୍ୟମନ୍ତ୍ରୀ ଭାବରେ ଶପଥ ନେଇଥିବାରୁ ୬ ମାସ ଭିତରେ ତାଙ୍କୁ ବିଧାୟକ ଭାବରେ ନିର୍ବାଚିତ ହେବାକୁ ହେବ। ନିୟମ ମୁତାବିକ ସେପ୍ଚେମ୍ୱର ୧୦ ପୂର୍ବରୁ ତିରଥ ବିଧାନସଭାକୁ ନିର୍ବାଚିତ ହେବା ଦରକାର। ନିକଟରେ ତିରଥ ମଧ୍ୟ ଉପ ନିର୍ବାଚନ ଲଢ଼ିବେ ବୋଲି ମିଡିଆକୁ କହିଥିଲେ। ଏଥିପାଇଁ ପ୍ରସ୍ତୁତି ସରିଛି। ଅନେକ ବିଧାୟକ ତାଙ୍କ ପାଇଁ ଆସନ ଛାଡ଼ିବାକୁ ପ୍ରସ୍ତୁତ ବୋଲି ସେ କହିଥିଲେ।
ଉତ୍ତରଖଣ୍ଡରେ କିନ୍ତୁ ଏବେ ଦୁଇଟି ବିଧାନସଭା ଆସନ ଖାଲି ରହିଛି। ତିରଥ ସିଂହ କିନ୍ତୁ ଗଙ୍ଗୋତ୍ରୀ ଆସନରୁ ଲଢ଼ିବେ ବୋଲି ଚର୍ଚ୍ଚା ହେଉଛି। କିନ୍ତୁ କୋଭିଡ ପାଇଁ ନିର୍ବାଚନ କମିଶନ ଏବେ ଉପନିର୍ବାଚନ ଉପରେ ରୋକ୍ ଲଗାଇଛନ୍ତି। ଏବେ ରାଜ୍ୟ ତଥା ଦେଶରେ କୋଭିଡ ସଂକ୍ରମଣ ଦୁର୍ବଳ ହୋଇଛି। ହେଲେ ସମ୍ଭାବ୍ୟ ତୃତୀୟ ଲହରକୁ ଆଖି ଆଗରେ ରଖି ରାଜନୀତିକ ସମାବେଶ ଇତ୍ୟାଦି ଉପରେ ରୋକ୍ ଲଗାଯାଇଛି।
ସୂଚନାଯୋଗ୍ୟ, ତିରଥ ସିଂହ ରାଓ୍ୱତ ବୁଧବାର ମହାଲକ୍ଷ୍ମୀ ଯୋଜନାର ଶୁଭାରମ୍ଭ କରିବାର ଥିଲା। କିନ୍ତୁ ସେ ଦିଲ୍ଲୀ ଗସ୍ତରେ ଆସିଥିବାକୁ ମହିଳା ସଶକ୍ତିକରଣର ଏହି ଯୋଜନାର ଶୁଭାରମ୍ଭ ପ୍ରକ୍ରିୟାକୁ ଏବେ ଟାଳି ଦିଆଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
