ଇନ୍ଦୋର: ମଧ୍ୟପ୍ରଦେଶର ଆର୍ଥିକ ରାଜଧାନୀ କୁହାଯାଉଥିବା ଇନ୍ଦୋରରେ ବୃଦ୍ଧି ପାଉଛି କରୋନା ଆକ୍ରାନ୍ତଙ୍କ ସଂଖ୍ୟା। ଇନ୍ଦୋରର ଟାଟପଟ୍ଟୀ ବାଖଲ ଅଞ୍ଚଳରୁ ୧୦ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଇଏ ହେଉଛି ସେହି ସ୍ଥାନ ଯେଉଁଠିକୁ ନିକଟରେ ଡାକ୍ତରୀ ଟିମ୍ ସନ୍ଦିଗ୍ଧ କରୋନା ଆକ୍ରାନ୍ତଙ୍କୁ ଚିହ୍ନଟ କରିବାକୁ ଆସି ସ୍ଥାନୀୟ ଲୋକଙ୍କ ଦ୍ୱାରା ଆକ୍ରମଣର ଶିକାର ହୋଇଥିଲେ। ଡାକ୍ତରଙ୍କ ସହିତ ଥିବା ନର୍ସମାନେ ମଧ୍ୟ ଆକ୍ରମଣର ଶିକାର ହେବା ପରେ ପ୍ରାଣ ବିକଳରେ ଦୌଡ଼ି ପଳାଇ ଯାଇଥିଲେ। ପରେ ଆକ୍ରମଣ ଅଭିଯୋଗରେ ୭ ଜଣଙ୍କୁ ପୁଲିସ୍ ଗିରଫ କରିଛି।
ମଧ୍ୟପ୍ରେଶ ସ୍ୱାସ୍ଥ୍ୟ ବିଭାଗ ବିଳମ୍ୱିତ ରାତିରେ ମେଡିକାଲ ବୁଲେଟିନ ଜାରି କରି ଏହି ସୂଚନା ଦେଇଛି। ୩ ଓ ୪ ଏପ୍ରିଲରେ କରୋନା ପରୀକ୍ଷା ହୋଇଥିବା ବ୍ୟକ୍ତିଙ୍କ ମଧ୍ୟରୁ ୧୬ ଜଣଙ୍କ ନିକଟରେ କରୋନା ଭାଇରସ ରହିଛି। ଏହି ୧୬ ଜଣଙ୍କ ମଧ୍ୟରୁ ୧୦ ଜଣ ଟାଟପଟ୍ଟୀର। ୧୦ ଜଣଙ୍କ ମଧ୍ୟରୁ ୫ ଜଣ ମହିଳା ଏବଂ ୫ ଜଣ ପୁରୁଷ ରହିଛନ୍ତି। ଆକ୍ରାନ୍ତଙ୍କ ବୟସ ୨୯ରୁ ୬୦ ମଧ୍ୟରେ ରହିଛି।
ଗତ ବୁଧବାର ଦିନ ଇନ୍ଦୋରରେ ଜଣେ ମହିଳା କରୋନାରେ ଆକ୍ରାନ୍ତ ହୋଇଥାଇପାରନ୍ତି ବୋଲି ସନ୍ଦେହ ହୋଇଥିଲା। ଏହାପରେ ଡାକ୍ତରଙ୍କ ସହିତ ସ୍ୱାସ୍ଥ୍ୟ କର୍ମଚାରୀ ତାଙ୍କୁ ଖୋଜିବା ପାଇଁ ଯାଇଥିଲେ। ଏହି ସମୟରେ ସ୍ଥାନୀୟ ଲୋକମାନେ ସ୍ୱାସ୍ଥ୍ୟ କର୍ମଚାରୀଙ୍କ ଉପରକୁ ଢ଼େଲା ପଥର ମାଡ଼ କରିଥିଲେ। ଏହାପରେ ଥାନାରେ ମାମଲା ରୁଜୁ ହୋଇଥିଲା। ତେବେ ମହିଳା ଜଣଙ୍କ କରୋନାରେ ଆକ୍ରାନ୍ତ ନୁହନ୍ତି ବୋଲି ସ୍ଥାନୀୟ ଲୋକମାନେ କହିଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
