ହିର୍ସା: ଆତ୍ମଘୋଷିତ ବାବା ରାମପାଲଙ୍କୁ ଆଜି ସ୍ୱତନ୍ତ୍ର କୋର୍ଟ ଆଜୀବନ ଜେଲ୍ଦଣ୍ଡରେ ଦଣ୍ଡିତ କରିଛନ୍ତି। ୪ ଜଣ ମହିଳା ଓ ଜଣେ ଶିଶୁଙ୍କ ହତ୍ୟା କରିବା ଅପରାଧରେ ରାମପାଲଙ୍କୁ ଏଭଳି ଦଣ୍ଡ ମିଳିଛି। ଗତ ସପ୍ତାହରେ କୋର୍ଟ ରାମପାଲଙ୍କୁ ଏହି ହତ୍ୟାକାଣ୍ଡ ଘଟଣାରେ ଦୋଷୀ ସାବ୍ୟସ୍ତ କରିଥିଲେ।
ଆଜି ଦଣ୍ଡବିଧାନ କରିବା ବେଳେ କୋର୍ଟ କହିଛନ୍ତି ଯେ, ରାମପାଲ ମୃତ୍ୟୁ ପର୍ଯ୍ୟନ୍ତ ଜେଲ୍ରେ ହିଁ ରହିବେ। ୨୦୧୪ରେ ହରିଆଣାରେ ଥିବା ରାମପାଲଙ୍କ ସତଲୋକ ଆଶ୍ରମ ନିକଟରେ ଘଟିଥିବା ହିଂସାକାଣ୍ଡ ବେଳେ ୪ ଜଣ ମହିଳା ଓ ଜଣେ ଶିଶୁଙ୍କ ମୃତ୍ୟୁ ଘଟିଥିଲା। ପୁଲିସ୍ ରାମପାଲଙ୍କୁ ଗିରଫ କରିବା ପାଇଁ ଯିବା ବେଳେ ସତଲୋକ ଆଶ୍ରମର ଅନ୍ତେବାସୀ ଓ ସୁରକ୍ଷାକର୍ମୀଙ୍କ ମଧ୍ୟରେ ଖଣ୍ଡଯୁଦ୍ଧ ହୋଇଥିଲା। ଆଉ ଏକ ହତ୍ୟା ମାମଲାରେ ପୁଲିସ୍ ରାମପାଲଙ୍କୁ ଗିରଫ କରିବାକୁ ଯାଇଥିଲା ବେଳେ ଏଭଳି ଲଙ୍କାକାଣ୍ଡ ଘଟିଥଲା।
୨୦୦୬ରେ ରାମପାଲ ଜଣେ ମହିଳାଙ୍କୁ ହତ୍ୟା କରିଥିଲେ। ଏହି ମାମଲାରେ ସେ ଦୋଷୀ ସାବ୍ୟସ୍ତ ହୋଇଥିବା ବେଳେ ଆସନ୍ତାକାଲି କୋର୍ଟ ଏହାର ଦଣ୍ଡ ବିଧାନ କରିବେ।
ରାମପାଲଙ୍କ ମାମଲାର ଶୁଣାଣି କରିବା ପାଇଁ ହରିଆଣାରେ ଥିବା ହିର୍ସା କେନ୍ଦ୍ରୀୟ ଜେଲ୍ରେ ସ୍ୱତନ୍ତ୍ର କୋର୍ଟ ବସିଥିଲା। ଏହିଠାରେ ହିଁ ରାମପାଲ ୨୦୧୪ରୁ ବନ୍ଦୀ ଜୀବନ ବିତାଉଛନ୍ତି।
୧୯୫୧ରେ ଜନ୍ମ ଗ୍ରହଣ କରିଥିବା ରାମପାଲ ସିଂହ ଯତୀନ୍ ପ୍ରଥମେ ହରିଆଣାର ଜଳସେଚନ ବିଭାଗରେ ଇଞ୍ଜିନିୟର ଭାବେ କାର୍ଯ୍ୟ କରୁଥିଲେ। ପରବର୍ତ୍ତୀ ଅବସ୍ଥାରେ ସେ ସତଲୋକ ଆଶ୍ରମ ଖୋଲି ଲୋକଙ୍କୁ ଧର୍ମର ମାର୍ଗ ଦେଖାଇ ଆତ୍ମଘୋଷିତ ବାବା ପାଲଟି ଯାଇଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
