ଶ୍ରୀନଗର: ଜାନୁଆରୀ ୨୬ ଗଣତନ୍ତ୍ର ଦିବସରେ ଏକ ବଡ଼ ଧରଣର ଆତଙ୍କବାଦୀ ହମ୍ଲା ପାଇଁ ପାକିସ୍ତାନ ଭିତ୍ତିକ ଜୈଶ ଇ ମହମ୍ମଦର ଯୋଜନାକୁ ପଣ୍ଡ କରିଛି ଶ୍ରୀନଗର ପୁଲିସ୍। କୁଖ୍ୟାତ ଆତଙ୍କବାଦୀ ମାସୁଦ୍ ଆଝାରର ନେତୃତ୍ୱରେ ଥିବା ଜୈଶ୍ ଏପରି ଏକ ଷଡ଼ଯନ୍ତ୍ର ରଚନା କରିଥିଲା। କିନ୍ତୁ ପୁଲିସ ୫ ଜଣ ଆତଙ୍କବାଦୀଙ୍କୁ ଗିରଫ କରିବାରେ ସଫଳ ହୋଇଛି।
ସୂଚନାଯୋଗ୍ୟ ଯେ, ପୂର୍ବରୁ ମାସୁଦ୍କୁ ଜାତିସଂଘ କଳା ତାଲିକାଭୁକ୍ତ କରିସାରିଛି। ତା’ର ସଂଗଠନ ଜୈଶ୍ ଭାରତରେ ପୁଲ୍ୱାମା ଆତଙ୍କବାଦୀ ହମ୍ଲା ପରି ବହୁଥର ଆକ୍ରମଣ କରି ଭାରତରେ ଅସ୍ଥିରତା ସୃଷ୍ଟି କରିବାର ପ୍ରୟାସ କରିଛି। ଫେବୃଆରୀ ୧୪ରେ ସଂଘଟିତ ପୁଲ୍ୱାମା ଆତ୍ମଘାତୀ ବିସ୍ଫୋରଣରେ ଭାରତ ୪୦ ଜଣ ସିଆରପିଏଫ୍ ଯବାନଙ୍କୁ ହରାଇଥିଲା।
ତେବେ ଆଜି ଶ୍ରୀନଗର ପୁଲିସ୍ ଏହି ଜୈଶ୍ ଯୋଜନା ବାବଦରେ ଜାଣିବା ପରେ ଚଢ଼ଉ କରିବା ସହ ବ୍ୟାପକ ପରିମାଣର ବିସ୍ପୋରକ ଜବତ କରିଛି। ଶ୍ରୀନଗର ପୁଲିସ୍ ଐଜାଜ୍ ଅହମ୍ମଦ ଶେଖ୍, ଉମର ହମିଦ୍ ଶେଖ୍, ଇମତିୟାଜ୍ ଅହମ୍ମଦ ଚିକଲା, ସାହିଲ ଫାରୁକ୍ ଗୋଜରି ଏବଂ ନସୀର ଅହମ୍ମଦ ମୀର ଆଦିଙ୍କୁ ଗିରଫ କରିଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
