କୁଚ୍ବେହାର୍: ଶନିବାର କୁଚ୍ବେହାରଠାରେ ବିଜେପି ଯେଉଁସ୍ଥାନରେ ରାଲି ଆୟୋଜନ କରିଥିଲା, ସେହି ସ୍ଥାନକୁ ତୃଣମୂଳ କଂଗ୍ରେସ (ଟିଏମ୍ସି)ର କର୍ମୀମାନେ ଗଙ୍ଗାଜଳ ଏବଂ ଗୋବରପାଣି ଛିଞ୍ଚି ଶୁଦ୍ଧି କରିଥିବା ଜଣାଯାଇଛି। ଏହି ଘଟଣା ବାବଦରେ ସ୍ଥାନୀୟ ସାଂସଦ ପଙ୍କଜ ଘୋଷ କହିଛନ୍ତି, ଏହି ସ୍ଥାନର ଶୁଦ୍ଧି କରାଯିବା ଆବଶ୍ୟକ କାରଣ ବିଜେପି ଏଠାକୁ ଆସି ସାମ୍ପ୍ରଦାୟିକ ବାର୍ତ୍ତା ଦେଇ ଯାଇଛି।
ସ୍ଥାନୀୟ ଲୋକଙ୍କ ଆରାଧ୍ୟ ଦେବତା ମଦନମୋହନଙ୍କ ଉଦାହରଣ ଦେଇ ସେ କହିଥିଲେ, ଏହା ମଦନମୋହନଙ୍କ ଭୂମି। ତେଣୁ ହିନ୍ଦୁ ପରମ୍ପରା ଅନୁଯାୟୀ ଆମେ ଶୁଦ୍ଧିକରଣ କଲୁ। ଏଥିସହିତ ଟିଏମ୍ସି କର୍ମୀମାନେ ଦାବି କରିଛନ୍ତି ପ୍ରଭୁ ମଦନମୋହନଙ୍କ ବ୍ୟତୀତ ଅନ୍ୟ କାହାର ରଥ ଏଠାରେ ଗଡ଼ିପାରିବ ନାହିଁ।
ବିଜେପି ରାଷ୍ଟ୍ରୀୟ ସଭାପତି ଅମିତ ଶାହଙ୍କ ଦ୍ୱାରା ପଶ୍ଚିମବଙ୍ଗରେ ଚଳିତ ମାସର ୭,୯ ଏବଂ ୧୪ ତାରିଖରେ ୩ଟି ରଥଯାତ୍ରାର ଶୁଭାରମ୍ଭ ହେବାର ଥିଲା। ଏଥିରେ ୪୨ଟି ଲୋକସଭା କ୍ଷେତ୍ର ବୁଲିବାର ଥିଲା ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଯୋଗଦେବାର କାର୍ଯ୍ୟକ୍ରମ ଥିଲା।
ଶୁକ୍ରବାର ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିଜେପିର ରଥଯାତ୍ରାକୁ ରାବଣଯାତ୍ରା ବୋଲି କହି ସମାଲୋଚନା କରିଥିଲେ। ଏଥିସହିତ ମମତା ତାଙ୍କ କର୍ମୀମାନଙ୍କୁ ଏହି ସ୍ଥାନର ଶୁଦ୍ଧିକରଣ ପାଇଁ ନିର୍ଦ୍ଦେଶ ଦେଇଥିବା କଥା କହିଥିଲେ।
ଅନ୍ୟପକ୍ଷରେ ବିଜେପି ନେତାମାନେ ଏହାକୁ ସମାଲୋଚନା କରି କହିଛନ୍ତି, ଟିଏମ୍ସିକୁ ଭୟ ଘାରିଛି। ରାଜ୍ୟରେ ଗଣତନ୍ତ୍ର ପ୍ରତିଷ୍ଠା ପାଇଁ ରଥଯାତ୍ରା ଟିଏମ୍ସି ଏବଂ ମମତାଙ୍କ ଚିନ୍ତା ବଢ଼ାଇଦେଇଛି ବୋଲି ସେମାନେ ମତ ଦେଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
