ମୁମ୍ବାଇ: ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକ୍ରେଙ୍କ ପତ୍ନୀ ବର୍ତ୍ତମାନ ଶିବସେନାର ମୁଖପତ୍ର ସାମ୍ନାର ସମ୍ପାଦକ ଦାୟିତ୍ୱ ନେବେ। ଅର୍ଥାତ ଶିବସେନାର ପ୍ରତିଷ୍ଠାତା ବାଲାସାହେବ ଠାକ୍ରେଙ୍କ ବୋହୂ ରଶ୍ମି ଠାକ୍ରେ ସାମ୍ନାର ଦାୟିତ୍ୱ ନେବେ।
ସାମ୍ନା ବ୍ୟତୀତ ଦୋପହର କା ସାମ୍ନା ମଧ୍ୟ ପ୍ରବୋଧନ ପ୍ରକାଶନ ଦ୍ୱାରା ପ୍ରକାଶିତ। ଏହା ଶିବସେନାର ମୁଖପତ୍ର ବୋଲି ପୂର୍ବରୁ ବେଶ ଚର୍ଚ୍ଚା ହୁଏ। ତେବେ ରବିବାର ଏଭଳି ନୂଆ ଘୋଷଣା ଆସିଛି। ଦୁଇ ଖବରକାଗଜରେ ଏ ବିଷୟରେ ଗ୍ରୁପ୍ ପବ୍ଲିଶର ରାଜେନ୍ଦ୍ର ଏମ୍ ଭଗୱତଙ୍କ ସହ ସୁଭାଷ ଆର ଦେଶାଇ ଏବଂ ଲୀଳାଧର ବି ଡେକ୍ ଘୋଷଣା କରିଛନ୍ତି।
ମିଳିଥିବା ସୂଚନା ଅନୁଯାୟୀ, ଦଳର ରାଜ୍ୟସଭା ସାଂସଦ ତଥା ବରିଷ୍ଠ ନେତା ସଞ୍ଜୟ ରାଉତ କାର୍ଯ୍ୟନିର୍ବାହୀ ସମ୍ପାଦକ ଦାୟିତ୍ୱ ତୁଲାଇବା ଜାରି ରଖିବେ। ସେ ପୂର୍ବବତ୍ ସମ୍ପାଦକୀୟ ମଧ୍ୟ ଲେଖିବେ। ତେବେ ରଶ୍ମିଙ୍କ ଭୂମିକା ବାବଦରେ ବିଶେଷ କିଛି କୁହାଯାଇନାହିଁ। ୧୯୮୩ ମସିହା ଜାନୁଆରୀ ୨୩ରେ ମରାଠୀ ଖବରକାଗଜ ‘ସାମ୍ନା’ ପ୍ରକାଶ ପାଇଥିଲା। ଏହାର ୧୦ ବର୍ଷ ଏକ ମାସ ପରେ ‘ଦୋପହର କା ସାମ୍ନା’ ପ୍ରକାଶିତ ହୋଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।