ୱାଶିଂଟନ୍: ବଢ଼ିଲା ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ଅଡୁଆ। ଗତବର୍ଷ ଜାନୁଆରୀ ୬ ତାରିଖରେ ଆମେରିକାର କ୍ୟାପିଟାଲ ବିଲ୍ଡିଂ ପରିସରେ ହୋଇଥିବା ହିଂସା ମାମଲାରେ ଟ୍ରମ୍ପଙ୍କୁ ଦାୟୀ କରିଛି ତଦନ୍ତ କମିଟି। ବର୍ତ୍ତମାନ ବୁଧବାର ଜଷ୍ଟିସ୍ କମିଟି ଏହା ଉପରେ ଚୂଡାନ୍ତ ରିପୋର୍ଟ ପ୍ରକାଶ କରିବେ।
ଏହି ମାମଲାର ଯାଞ୍ଚ କରୁଥିବା ସ୍ୱତନ୍ତ୍ର ତଦନ୍ତ କମିଟି ସୋମବାର ଏହାର ଅନ୍ତିମ ଶୁଣାଣି କରିଥିଲା। ଏହି ତଦନ୍ତ ପ୍ୟାନେଲର ଉପାଧ୍ୟକ୍ଷ ଲିଜ୍ ଚେନି କହିଛନ୍ତି, ଏହି ମାମଲାରେ ଯେଉଁ ସବୁ ପ୍ରମାଣ ମିଳିଛି ତାହା ଟ୍ରମ୍ପଙ୍କ ଦ୍ୱାରା ହୋଇଥିବା ନୈତିକ ବିଫଳତା ଆଡକୁ ଇସାରା କରୁଛି । ଏହି ଘଟଣା ପାଇଁ ଡୋନାଲ୍ଡ ଟ୍ରମ୍ପ ହିଁ ଦାୟୀ। ହିଂସା ଘଟୁଥିବା ବେଳେ ସେ କାହିଁକି ହସ୍ତକ୍ଷେପ କଲେ ନାହିଁ ବୋଲି ସେ ପ୍ରଶ୍ନ କରିଛନ୍ତି।
ସିଏନ୍ଏନ୍ର ରିପୋର୍ଟ ମୁତାବକ, ସୋମବାର ଏହି ମାମଲାକୁ ନେଇ ତଦନ୍ତ କମିଟିରେ ଶେଷ ସର୍ବସାଧାରଣ ଅଧିବେଶନ ଆୟୋଜିତ ହୋଇଥିଲା। ଏହି ଶୁଣାଣିରେ କ୍ୟାପିଟାଲ ହିଲ୍ରେ ହୋଇଥିବା ହିଂସାରେ ଟ୍ରମ୍ପଙ୍କ ଭୂମିକାକୁ ନେଇ କମିଟି ବିସ୍ତୃତ ଯାଞ୍ଚର ଅନ୍ତିମ ରିପୋର୍ଟ ରଖିଥିଲା।
ସେପଟେ ଏହି ଘଟଣାକୁ ନେଇ ଡୋନାଲ୍ଡ ଟ୍ରମ୍ପ ମଧ୍ୟ ପ୍ରତିକ୍ରିୟା ରଖିଛନ୍ତି । ତାଙ୍କୁ ଫସାଇ ଦିଆଯାଉଥିବା ନେଇ ସେ ଅଭିଯୋଗ ଆଣିଛନ୍ତି। ତାଙ୍କ ବିରୋଧରେ ମିଛ ଅଭିଯୋଗ କରାଯାଇଛି। ହ୍ୱାଇଟ୍ ହାଉସର ରେସ୍ରୁ ତାଙ୍କୁ ବାହାର କରିବା ପାଇଁ ଗୃହର ସାଂସଦମାନେ ଏପରି ଷଡଯନ୍ତ୍ର ରଚିଥିବା ସେ କହିଛନ୍ତି।
ଉଲ୍ଲେଖଯୋଗ୍ୟ, ୨୦୨୧ ଜାନୁଆରୀ ୬ ତାରିଖରେ ୱାଶିଂଟନ୍ ଡିସିର କ୍ୟାପିଟାଲ ହିଲ୍ ନିକଟରେ ହଜାର ହଜାର ଲୋକେ ଏକାଠି ହୋଇଥିଲେ। ଏହି ଲୋକଙ୍କ ମଧ୍ୟରେ ଅଧିକାଂଶ ଟ୍ରମ୍ପଙ୍କ ସମର୍ଥକ ଥିଲେ। ସମସ୍ତେ ୱାଶିଂଟନ ଡିସିର କ୍ୟାପିଟାଲ ହିଲ୍ ଉପରେ ଆକ୍ରମଣ କରିଥିଲେ। ୨୦୨୦ ରାଷ୍ଟ୍ରପତି ନିର୍ବାଚନର ଫଳାଫଳ ଯାଞ୍ଚ ପ୍ରକ୍ରିୟାରେ ଏମାନେ କଂଗ୍ରେସର ମିଳିତ ଅଧିବେଶନକୁ ବାଧା ଦେଇଥିଲେ। ଏହି ଘଟଣାରେ ପୁଲିସ ସମେତ ଅନେକ ଲୋକ ଆହତ ହୋଇଥିଲେ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
