କାବୁଲ: ଆଫଗାନିସ୍ତାନ ଦଖଲ କରିଥିବା ତାଲିବାନ ମହିଳାଙ୍କ ଚାକିରି କରିବା ଉପରେ ଲଗାଇଥିବା ରୋକକୁ ଆଜିଠାରୁ ହଟାଇ ଦେଇଥିବା ଘୋଷଣା କରିଛି। ପ୍ରଥମ ପର୍ଯ୍ୟାୟରେ ଆଫଗାନ ମହିଳା ସ୍ୱାସ୍ଥ୍ୟକର୍ମୀଙ୍କୁ ପୁଣି ନିଜ ନିଜର କାମ ଆରମ୍ଭ କରିବାକୁ ତାଲିବାନ ପକ୍ଷରୁ କୁହାଯାଇଛି।
ଏ ସମ୍ପର୍କରେ ତାଲିବାନର ମୁଖପାତ୍ର ସୁହେଲ ଶାହୀନ ଟ୍ୱିଟ କରି ଘୋଷଣା କରିଛନ୍ତି। ସେ ଅନ୍ୟତମ ମୁଖପାତ୍ର ଜୈବହୁଲ୍ଲା ମୁଜାହିଦଙ୍କ ଉକ୍ତିକୁ ଟ୍ୱିଟ କରି କହିଛନ୍ତି, ସ୍ୱାସ୍ଥ୍ୟ ମନ୍ତ୍ରଣାଳୟରେ ଅଧୀନରେ କାମ କରୁଥିବା ସମସ୍ତ ମହିଳା କର୍ମଚାରୀ ଏବେ ନିଜ ନିଜ କର୍ମକ୍ଷେତ୍ରକୁ ଯାଇ ପାରିବେ। ସମସ୍ତ ପ୍ରଦେଶ ଓ ରାଜଧାନୀରେ ପୂର୍ବରୁ କାର୍ଯ୍ୟ କରୁଥିବା ମହିଳା ସ୍ୱାସ୍ଥ୍ୟକର୍ମୀଙ୍କ ପାଇଁ ଏହି ନିୟମ ଲାଗୁ ହେବ।
ସେମାନେ ଏଣିକି ନିୟମିତ କାମ କରିପାରିବେ। ମହିଳା ସ୍ୱାସ୍ଥ୍ୟକର୍ମୀମାନେ ସେମାନଙ୍କ କାମ ପୁଣି ଆରମ୍ଭ କଲେ ଇସଲାମିକ ଏମିରେଟର କୌଣସି ଅସୁବିଧା ନାହିଁ। ସେମାନେ ନିର୍ଭୟରେ କାମ ଆରମ୍ଭ କରିପାରିବେ ବୋଲି ସେ କହିଛନ୍ତି।
ତାଲିବାନ ଆଫଗାନ ଦଖଲ କରିବା ଦିନ ଠାରୁ ମହିଳାମାନେ ଭୟରେ ରହିଛନ୍ତି। ୧୯୯୬ରେ ଯେତେବେଳେ ତାଲିବାନ କ୍ଷମତା ଦଖଲ କରିଥିଲା ସେତେବେଳେ ମହିଳାଙ୍କୁ କାମ କରିବାକୁ ଆଦୌ ସୁଯୋଗ ମିଳୁ ନଥିଲା। ଏଥର କିନ୍ତୁ ତାଲିବାନ ମହିଳାଙ୍କୁ ଚାକିରି କରିବାର ସୁଯୋଗ ମିଳିବ ବୋଲି ପ୍ରତିଶ୍ରୁତି ଦେଇଥିଲା।
All female employees of the Ministry of Public Health both in provinces and the Capital are informed to resume their jobs on regular manner. The Islamic Emirate has no issue with their resumption of jobs.
Z.Mujahid— Suhail Shaheen. محمد سهیل شاهین (@suhailshaheen1) August 27, 2021
ତଥାପି ମହିଳାମାନେ କାମକୁ ଯିବା ବେଳେ ତାଲିବାନୀମାନେ ସେମାନଙ୍କୁ ହଇରାଣ କରୁଥିଲେ। ଏଥିପାଇଁ ସଂଗଠନର ଶୀର୍ଷ ନେତାମାନେ କିଛି ଦିନ ପାଇଁ ମହିଳା କର୍ମଚାରୀଙ୍କୁ ଘରେ ରହିବାକୁ ପରାମର୍ଶ ଦେଇଥିଲେ। କିନ୍ତୁ ଏବେ ତାଲିବାନ ପକ୍ଷରୁ କେବଳ ସ୍ୱାସ୍ଥ୍ୟକର୍ମୀଙ୍କୁ ପୁଣି କାମ ଆରମ୍ଭ କରିବାକୁ ଅନୁମତି ଦିଆଯାଇଛି।
ଅନ୍ୟପକ୍ଷରେ ଯେଉଁମାନେ ସରକାରଙ୍କ ଗାଡ଼ି, ଅସ୍ତ୍ରଶସ୍ତ୍ର ଓ ଗୁଳିଗୋଳା ନିଜ ପାଖରେ ରଖିଛନ୍ତି, ସେମାନେ ତୁରନ୍ତ ଏହାକୁ ଫେରାଇ ଦିଅନ୍ତୁ ବୋଲି ତାଲିବାନ ନିର୍ଦ୍ଦେଶ ଦେଇଛି। ସପ୍ତାହେ ମଧ୍ୟରେ ସମସ୍ତଙ୍କୁ ନିଜ ତରଫରୁ ସବୁ କିଛି ହ୍ୟାଣ୍ଡଓଭର କରିବାକୁ କୁହାଯାଇଛି। ଯଦି କେହି ଏହାକୁ ଖିଲାଫ କରେ, ତା’ହେଲେ ପରିମାଣ ଭୋଗିବାକୁ ପଡ଼ିବ ବୋଲି ତାଲିବାନ ଧମକ ଦେଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
