କୋଟିଏ ଟଙ୍କାର ବ୍ରାଉନସୁଗର ଜବତ

ଭୁବନେଶ୍ୱର(ଓଡ଼ିଶା ରିପୋର୍ଟର): ଖୋର୍ଦ୍ଧା ଜିଲ୍ଲା ଜଟଣୀ ଅଞ୍ଚଳରୁ ୧ କେଜିରୁ ଊର୍ଦ୍ଧ୍ୱ ଓଜନର ବ୍ରାଉନସୁଗର ଜବତ ହୋଇଛି। ଏହାର ଆନୁମାନିକ ମୂଲ୍ୟ କୋଟିଏରୁ ଅଧିକ ଟଙ୍କା ହେବ ବୋଲି ଜଣାପଡ଼ିଛି। କ୍ରାଇମବ୍ରାଞ୍ଚ STF ଏହି ଚଢ଼ଉ କରିଥିବା ଜଣାପଡ଼ିଛି।

ଜଟଣୀ ଏରିଆରେ ବ୍ରାଉନସୁଗର କାରବାରର ଏକ ବଡ଼ ଡିଲ୍‌ ହେବା ନେଇ ଗତକାଲି କ୍ରାଇମବ୍ରାଞ୍ଚ STF ସୂଚନା ପାଇଥିଲା। ଏହା ପରେ ଚଢ଼ଉ ନିମନ୍ତେ ଜାଲ ବିଛାଇଥିଲା। ଏହି ଚଢ଼ଉ ସମୟରେ ପୁଲିସ୍‌ ୧ କେଜିରୁ ଊର୍ଦ୍ଧ୍ୱ ବ୍ରାଉନସୁଗର ଜବତ କରିଥିବା ବେଳେ ଜଣଙ୍କୁ ଗିରଫ କରିଥିବା ଜଣାଯାଇଛି।

କ୍ରାଇମବ୍ରାଞ୍ଚର STFର ଲଗାତାର ଚଢ଼ଉ ସତ୍ତ୍ୱେ ଏହି ଚୋରାଚାଲାଣ ଥମିବା ନାଁ ଧରୁନି। ଗତ ୩ ମାସ ମଧ୍ୟରେ ଏହାକୁ ନେଇ ୧୫ରୁ ଊର୍ଦ୍ଧ୍ୱ କେସ୍‌ ହୋଇଥିବା ବେଳେ ୧୭ରୁ ଊର୍ଦ୍ଧ୍ୱ ଜଣ ଗିରଫ ହୋଇସାରିଛନ୍ତି। ଏହାସତ୍ତ୍ୱେ ବ୍ରାଉନସୁଗର ଚୋରା ଚାଲାଣର ଏକ ବଡ଼ ନେଟୱର୍କ କାମ କରୁଥିବା ତଦନ୍ତରୁ ଜଣାପଡ଼ିଛି। ପଶ୍ଚିମବଙ୍ଗରୁ ବାଲେଶ୍ୱର, ଜଳେଶ୍ୱର ଦେଇ ଭୁବନେଶ୍ୱରକୁ ବ୍ରାଉନସୁଗର ଚୋରା ଚାଲାଣ ହେଉଥିବା ତଦନ୍ତରୁ ଜଣାପଡ଼ିଛି। ଏପରିକି ବାଲାଂଦେଶ, ଚୀନ୍‌ ପରି ପଡ଼ୋଶୀ ଦେଶକୁ ମଧ୍ୟ ଏହି ରାକେଟ୍‌ ଲମ୍ବିଥିବା ଜଣାଯାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।