ଆନନ୍ଦପୁର(ଓଡ଼ିଶା ରିପୋର୍ଟର): ସାଧାରଣତଃ ପିଲା ଜନ୍ମ ହେବା ପରେ ପରିବାରରେ ଖେଳିଯାଏ ଖୁସିର ଲହରି। ପରିବାର ଲୋକଙ୍କ ପାଦ ଖୁସିରେ ତଳେ ଲାଗେନି। ହେଲେ ଆନନ୍ଦପୁର ଉପଖଣ୍ଡ ଘଷିପୁରା ପୁରୁଣାପାଣି ଗାଁରେ ଦେଖିବାକୁ ମିଳିଛି ଅଜବ ନିୟମ । ପିଲା ଜନ୍ମ ପରେ ପରିବାର ଲୋକଙ୍କ ମୁଣ୍ଡରେ ଚଡ଼କ ପଡ଼ିଛି। କାରଣ ଏଥିନିମନ୍ତେ ସେମାନଙ୍କୁ ଗାଁରୁ ବାସନ୍ଦ ହେବାକୁ ପଡ଼ିଛି ।
ପିଲା ଜନ୍ମ ହେବା ପରେ ଗାଁକୁ ଶୁଦ୍ଧି କରିବା ପାଇଁ ପୂଜା ସାମଗ୍ରୀ ନ ଦେବାରୁ ପରିବାରକୁ ଗାଁରୁ ବାସନ୍ଦ କରାଯାଇଛି। ହେଲେ ପରିବାର ଲୋକଙ୍କ ଏହି ଅଭିଯୋଗକୁ ଖଣ୍ଡନ କରିଛନ୍ତି ଗ୍ରାମବାସୀ। ପୁଲିସ୍ ଘଟଣାର ତଦନ୍ତ ଆରମ୍ଭ କରିଛି।
ମିଳିଥିବା ସୂଚନା ଅନୁଯାୟୀ, ଗାଁର ଜଣେ ମହିଳା ପ୍ରସବ କରିବା ପରେ ଆମ୍ବୁଲାନ୍ସରେ ମେଡିକାଲ ଯାଇଥିଲେ । ତେବେ ଏହି ସମୟରେ ଗାଁ ରାସ୍ତା ଅଶୁଦ୍ଧ ହେବା ଦର୍ଶାଇ ଠାକୁରାଣୀଙ୍କ ପୂଜା ପାଇଁ କୁକୁଡ଼ା, ହାଣ୍ଡିଆ ସହ ପୂଜା ସାମଗ୍ରୀ ଦାବି କରିଥିଲେ ଗ୍ରାମବାସୀ । ତେବେ ପରିବାର ଲୋକେ ଏହା ନ ଦେବାରୁ ତାଙ୍କୁ ଗାଁରୁ ବାସନ୍ଦ କରାଯାଇଥିବା ଅଭିଯୋଗ ହୋଇଛି ।
ଏନେଇ ସମ୍ପୃକ୍ତ ପରିବାରର ମୁଖିଆ କହିଛନ୍ତି, ଗ୍ରାମବାସୀ କହିଲେ ଗାଁରେ ଛୁଆ ଜନ୍ମ ହେଇଛି, ଗାଁ ଅପବିତ୍ର ହୋଇଛି । ଗାଁକୁ ପବିତ୍ର କରିବାକୁ ୩ଟି କୁକୁଡ଼ା, ଗୋଟିଏ ହାଣ୍ଡି ହାଣ୍ଡିଆ, ଚୂନା ଗୁଣ୍ଡ ଦେବାକୁ ପଡ଼ିବ । ମାତ୍ର ମୁଁ ଅସମର୍ଥତା ଜଣାଇବାରୁ ମୋ ସାଙ୍ଗେ ଚଳିବେ ନାହିଁ ବୋଲି ଧମକ ଦେଇଛନ୍ତି।
ଅପରପକ୍ଷେ, ଗ୍ରାମବାସୀ କହିଛନ୍ତି, ଗାଁରେ କୌଣସି ପରିବାରର ପିଲା ହେଲେ ୭ ଦିନ ପରେ ଠାକୁରାଣୀଙ୍କ ନିକଟରେ ମାର୍ଜନା କରାଯିବା ପରଂପରା ରହିଛି । ମାତ୍ର ସଂପୃକ୍ତ ପରିବାର ଲୋକେ ଏହା କରିନାହାନ୍ତି। ତେବେ ବାସନ୍ଦ ଅଭିଯୋଗକୁ ଖଣ୍ଡନ କରିଛନ୍ତି ଗ୍ରାମବାସୀ । ଏ ନେଇ ଘଷିପୁରା ପୋଲିସ ନିକଟରେ ଅଭିଯୋଗ ହୋଇଥିବା ବେଳେ ପୋଲିସ ଘଟଣାର ସମାଧାନ ପାଇଁ ଉଦ୍ୟମ ଚଳାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
