ପଳାଇଲେ ପୋସ୍କୋ, ମିତଲ: ତଥାପି କମିନି ଶିଳ୍ପ ପାଇଁ ଭୁବନେଶ୍ୱର କ୍ରେଜ୍‌

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ଶିଳ୍ପ ପ୍ରତିଷ୍ଠା ଲାଗି ଭୁବନେଶ୍ୱର ପ୍ରକୃଷ୍ଟ ସ୍ଥାନ। ବିଶ୍ୱ ବ୍ୟାଙ୍କ ପକ୍ଷରୁ ଏନେଇ କରାଯାଇଥିବା ସର୍ଭେରେ ସମଗ୍ର ଦେଶରେ ତୃତୀୟ ସ୍ଥାନରେ ରହିଛି ଭୁବନେଶ୍ୱର। ପସ୍କୋ ଓ ମିତ୍ତଲ ଭଳି ବଡ଼ ବଡ଼ କଂପାନି ଓଡ଼ିଶାକୁ ବାଏ ବାଏ କରିଥିଲେ ବି ଶିଳ୍ପ ପ୍ରତିଷ୍ଠା ଓ ବ୍ୟବସାୟ ଲାଗି ରହିଥିବା ସୁଯୋଗ କ୍ଷେତ୍ରରେ ଭୁବନେଶ୍ୱର ଅନ୍ୟ ସହରଠାରୁ ଢେର ଆଗରେ ରହିଛି। ଏଭଳିସ୍ଥଳେ ଷ୍ଟାର୍ଟ ଅପ୍&zwnj;କୁ ଆଗେଇ ନେବା ପାଇଁ ଭୁବନେଶ୍ୱର ଆଇଆଇଟିରେ ସେଣ୍ଟର ଅଫ୍ ଏକ୍ସେଲେନ୍ସ ଖୋଲିବାକୁ ଷ୍ଟାର୍ଟ ଅପ୍ କାଉନ୍ସିଲ୍ ବୈଠକରେ ନିଷ୍ପତ୍ତି ହୋଇଛି।</p><p>ଶିଳ୍ପ ହେଉ କି ବ୍ୟବସାୟ ସବୁ ପାଇଁ ରାଜଧାନୀ ଭୁବନେଶ୍ୱରରେ ରହିଛି ବ୍ୟାପକ ସୁବିଧା ସୁଯୋଗ। ବିଶ୍ୱବ୍ୟାଙ୍କ ସର୍ଭେ ରିପୋର୍ଟରେ ଏହା ଦର୍ଶାଯାଇଛି। ଶିଳ୍ପ ଓ ବ୍ୟବସାୟ ଲାଗି ଉକୃଷ୍ଟ ସ୍ଥାନ ହିସାବରେ ଦେଶରେ ତୃତୀୟ ସ୍ଥାନରେ ଭୁବନେଶ୍ୱର ଥିବା ବେଳେ ଲୁଧିଆନା ଓ ହାଇଦ୍ରାବାଦ୍ ଆଗରେ ରହିଛନ୍ତି। ସେହିଭଳି ବ୍ୟବସାୟ ଆରମ୍ଭ କରିବା ବା ଷ୍ଟାର୍ଟ ଅପ୍ କ୍ଷେତ୍ରରେ ଦେଶରେ ପଞ୍ଚମ ସ୍ଥାନରେ ରହିଛି ଓଡ଼ିଶାର ରାଜଧାନୀ। ରପ୍ତାନୀ କ୍ଷେତ୍ରରେ ଭୁବନେଶ୍ୱର ଦେଶରେ ପ୍ରଥମ ସ୍ଥାନ ଅଧିକାର କରିଛି। ଦେଶର ପ୍ରମୁଖ ୧୭ଟି ସହରକୁ ନେଇ ଏହି ସର୍ଭେ କରାଯାଇଥିଲା।</p><p>ଏପଟେ ଓ୍ୱାଲର୍ଡ ବ୍ୟାଙ୍କ ରିପୋର୍ଟରେ ଭୁବନେଶ୍ୱରରୁ ଉଚ୍ଚ ମାନ୍ୟତା ମିଳିବା ପରେ ଶିଳ୍ପ ଓ ବ୍ୟବସାୟ ବଢାଇବା ରାଜ୍ୟ ସରକାରଙ୍କ ପାଇଁ ବଡ଼ ଚ୍ୟାଲେଞ୍ଜ ହୋଇଛି। ଷ୍ଟାର୍ଟ ଅପ୍&zwnj;କୁ ଆଗେଇ ନେବା ପାଇଁ ଷ୍ଟାର୍ଟ-ଅପ୍ କାଉନସିଲର ଦ୍ୱିତୀୟ ବୈଠକରେ ବିସ୍ତୃତ ଆଲୋଚନା କରାଯାଇଛି। ବର୍ତ୍ତମାନ ସୁଦ୍ଧା ୧୩୦ଟି ଷ୍ଟାର୍ଟ-ଅପ୍ ପଞ୍ଜିକୃତ ହୋଇଛି। ୨୦ଟିକୁ ମଞ୍ଜୁରୀ ପ୍ରଦାନ କରାଯାଇଛି।</p><p>ଅନ୍ୟପକ୍ଷରେ ଭୁବନେଶ୍ୱର ଆଇଆଇଟିରେ ସେଣ୍ଟର ଅଫ୍ ଏକ୍ସେଲେନ୍ସ ଖୋଲିବାକୁ ନିଷ୍ପତ୍ତି ହୋଇଛି। ୧୦ କୋଟି ଟଙ୍କା ବ୍ୟୟରେ ଏହି ସେଣ୍ଟର ଖୋଲିବାକୁ ପ୍ରସ୍ତାବ ରହିଛି। ଏଥିପାଇଁ ସହାୟତାର ହାତ ବଢାଇଛନ୍ତି ସ୍କିଲ ଡେଭଲପମେଣ୍ଟ ଅଥରିଟି ଅଫ୍ ଓଡ଼ିଶାର ଅଧ୍ୟକ୍ଷ ସୁବ୍ରତ ବାଗ୍ଚୀଙ୍କ ପତ୍ନୀ ସୁସ୍ମିତା ବାଗ୍ଚୀ। ରାଜ୍ୟ ସରକାର ମଧ୍ୟ ସମାନ ପରିମାଣର ଅର୍ଥ ପ୍ରଦାନ କରିବେ। ସଫଟେଓ୍ୱର ଟେକ୍ନୋଲୋଜି ପାର୍କ ବି ଅଢେଇ କୋଟି ଟଙ୍କା ଦେବାକୁ ସମ୍ମତି ଜଣାଇଛି।</p><p>ସୂଚନାଯୋଗ୍ୟ, ବ୍ୟବସାୟ ଓ ଶିଳ୍ପୋକୁ ପ୍ରୋତ୍ସାହିତ ଲାଗି କେନ୍ଦ୍ର ସରକାର ଚଳିତବର୍ଷ ୧୨୨ରୁ ଅଧିକ ଆର୍ଥିକ ସଂସ୍କାର ଆଣିଛନ୍ତି। ଫଳରେ ଇଜ୍ ଅଫ୍ ଡୁଇଙ୍ଗ ବିଜନେସ୍&zwnj;ରେ ଭାରତ ୧୦୦ତମ ସ୍ଥାନ ହାସଲ କରିଛି। ତେବେ ସମଗ୍ର ବିଶ୍ୱରେ ଭାରତକୁ ପ୍ରଥମ ୫୦ ସ୍ଥାନ ମଧ୍ୟରେ ଆଣିବା ପାଇଁ ଆହୁରି ୨୦୦ଟି ସଂସ୍କାର ଅଣାଯିବ ବୋଲି କେନ୍ଦ୍ର ଡିପାର୍ଟମେଣ୍ଟ ଅଫ୍ ଇଣ୍ଡଷ୍ଟ୍ରିଆଲ୍ ପଲିସି ଆଣ୍ଡ ପ୍ରୋମୋସନ୍ ସଚିବ ରମେଶ ଅଭିଷେକ କହିଛନ୍ତି।</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।