ବିଜେପୁରରେ ଭୁଲ ହୋଇଗଲା ବିଜେପିର ସବୁ ଗଣିତ

ଭୁବନେଶ୍ୱର (ଓଡ଼ିଶା ରିପୋର୍ଟର): ବିଜେପୁରରେ ବାଜି ମାରିନେଲା ବିଜେଡି। ଭୁଲ ହୋଇଗଲା ବିଜେପିର ସବୁ ଗଣିତ। ମଇଦାନରେ ଟକ୍କର ଦେବା ତ ଦୂରର କଥା, ଅମାନତ ହରେଇଲା କଂଗ୍ରେସ। ବିଜେପୁର ବ୍ୟାଟେଲରେ ବିଜୟ ବାନା ଉଡ଼ାଇ ନବୀନ ପୁଣିଥିରେ ପ୍ରମାଣିତ କରିଦେଲେ ରାଜ୍ୟ ରାଜନୀତିରେ ଏବେ ବି ସେ ଅପରାଜୟ।

ବିଜେପୁରରୁ ଭୁବନେଶ୍ୱର ସବୁଠି ଶୁଭୁଛି ବିଜୟର ଶଙ୍ଖଧ୍ୱନି। ୧୪ ବର୍ଷ ପରେ ବିଜେପୁରରେ କଂଗ୍ରେସର ଦୁର୍ଗ ଭାଙ୍ଗିଲା ବିଜେଡି। ବିଜେପୁର ବ୍ୟାଟେଲରେ କାମ ଦେଇଛି ଅନୁକମ୍ପାର ଗୋଟି। ସୁବଳଙ୍କ ବିଧବା ପତ୍ନୀଙ୍କୁ ପ୍ରାର୍ଥୀ କରି କ୍ୟାପେଟନ ନବୀନ ମାରିଥିବା ଗୁଗୁଲୀ। ଯାହା ବିରୋଧୀଙ୍କୁ କ୍ଲିନ ବୋଲ୍ଡ କରିଦେଲା। ତେବେ ତୃଣମୂଳ ସ୍ତରରୁ ବିଜେଡିର ଇଲେକ୍ସନ ମ୍ୟାନଜ୍‌ମେଣ୍ଟ ପାଖରେ ବିରୋଧୀଙ୍କ ସବୁ ରଣନୀତି ଫେଲ ମାରିଲା ବୋଲି କୁହାଯାଉଛି। ଦଳର ତୁଙ୍ଗନେତା, ମନ୍ତ୍ରୀ, ବିଧାୟକ ପଞ୍ଚାୟତରେ କ୍ୟାମ୍ପ କରି ନିର୍ବାଚନ ପରିଚାଳନାକୁ ସଫଳ କଲେ। ନବୀନ ନିଜେ ୨ ଦିନ କ୍ୟାମ୍ପ କରିବା ଫଳରେ ଦଳର ଭୋଟ ପ୍ରତିଶତ ବଢ଼ିଲା। କୁମ୍ଭାରୀର ଚପଲ ମାଡ଼ ଓ ବନାବିରା ଗୁଳିମାଡ଼ ବି ବିଜେଡି ସପକ୍ଷରେ ହାଓ୍ୱା ତିଆରି କଲା। ୬ ମାସ ଧରି ବିକାଶର ବାର୍ତ୍ତା ଧରି ନବୀନ ବିଜେପୁରକୁ ମଞ୍ଜୁର କରିଥିବା ଅନୁଦାନ ଓ କାମ ବି ବିଜେଡି ପାଇଁ ଆର୍ଶିବାଦ ସାଜିଲା ବୋଲି ଚର୍ଚ୍ଚା ହେଉଛି। ଅନୁକମ୍ପା ସହ ନବୀନଙ୍କ ଲୋକପ୍ରିୟତା ରୀତାଙ୍କ ମୁଣ୍ଡରେ ବିଜୟ ଟିକା ଲଗାଇଲା ବୋଲି ଦଳୀୟ ନେତା ଦାବି କରୁଛନ୍ତି।

ବିଜେପୁର ବ୍ୟାଟେଲ ବିଜେପି ପାଇଁ ଥିଲା ମିଶନ ୧୨୦ ପ୍ଲସର ପ୍ରଥମ ପରୀକ୍ଷା। ଘରେ ନ ପଶୁଣୁ ଚାଳ ବାଜିବା ପରି ଅମିତ ଶାହାଙ୍କ ୧୨୦ ପ୍ଲସର ନାରାକୁ ବିଜେପୁରରେ ଲାଗିଛି ବଡ଼ ଝଟକା। ଭୁଲ ହୋଇଯାଇଛି ବିଜେପୁରରେ ପଦ୍ମ ଫୁଟାଇବାରେ ନେତାଙ୍କ ଗଣିତ। ମଉଳି ଯାଇଛି ପଞ୍ଚାୟତ ବିଜୟର ଦମ୍ଭ। ଗୋଟିଏ ବର୍ଷ ତଳେ ବିଜେପୁରରୁ ୯୧ ହଜାର ଭୋଟ ପାଇଥିବା ବିଜେପିର ଖାତାରୁ ଚାଲିଯାଇଛି ୩୦ ହଜାରରୁ ଅଧିକ ଭୋଟ। କୁହାଯାଉଛି ହାରିବା ପଛରେ ଦଳର ଇଲେକ୍ସନ ମ୍ୟାନେଜମେଣ୍ଟ ଦାୟୀ। ନେତାଙ୍କ ଭିତରେ ସମନ୍ୱୟର ଅଭାବ ବି ପରାଜୟର ଆଉ ଏକ କାରଣ ବୋଲି ଚର୍ଚ୍ଚା ହେଉଛି। ଅଶୋକ ବି ତୃଣମୁଳ ସ୍ତରରେ ଦଳର ନେତା ଓ କର୍ମୀଙ୍କ ପାଇଁ ଗ୍ରହଣୀୟ ହେଲେନି ବୋଲି କୁହାଯାଉଛି। ନେତା ନ ମାନିଲେ ବି ମୁଖ୍ୟମନ୍ତ୍ରୀଙ୍କୁ ଚପଲ ମାଡ଼ ଓ ଦିନ ପୂର୍ବରୁ ବନାବିରା ହିଂସା ବି ଦଳର ଭୋଟ କାଟିଲା।

ବିଜେପୁର ଲଢ଼େଇରେ ସବୁଠୁ ବେଶି କ୍ଷତି ହୋଇଛି କଂଗ୍ରେସର। ଗୋଷ୍ଠୀ କନ୍ଦଳ ବିଜେପୁର ଲଢ଼େଇରେ ଦଳ ପାଇଁ ମହଙ୍ଗା ହେଲା। ଟିକେଟ ଦେବାରେ ଓ ପ୍ରାର୍ଥୀ ବାଛିବାରେ ବିଳମ୍ବ ପରାଜୟର ଅନ୍ୟ କାରଣ ବୋଲି ଖୋଦ୍ ଦଳର ନେତା କହୁଛନ୍ତି। ଏହାବାଦ ବିଜେଡି-ବିଜେପି ତୁଳନାରେ ପ୍ରଚାରରେ ଢେର ପଛେଇ ଗଲା କଂଗ୍ରେସ। ଏମିତିକି ଦଳର ପ୍ରାର୍ଥୀଙ୍କ ପାଇଁ ଟଙ୍କା ନ ଥିଲା ବୋଲି ଖୋଲା ଖୋଲି କହି ବୁଲିଲେ ଆଗଧାଡ଼ିର ନେତା। ଲଗାତର ତିନି ତିନି ଥର ଜିତି ଥିବା ବିଜେପୁରରେ ଏଥର ପ୍ରାର୍ଥୀ ଅମାନତ ହରାଇବା କଂଗ୍ରେସ କର୍ମୀଙ୍କ ମନୋବଳୁ ଦୋହଲାଇ ଦେଇଛି।

ଫଳାଫଳକୁ ନେଇ କ’ଣ କହୁଛନ୍ତି ବିଭିନ୍ନ ଦଳର ନେତା ଓ କର୍ମୀ ଦେଖନ୍ତୁ ଏହି ଭିଡିଓ।