ଘରକୁ ଫେରୁଥିଲେ, ବାଟ ମଝିରେ ବନ୍ୟାରେ ଭାସିଗଲେ

ବଲାଙ୍ଗିର (ଘଟେଶ୍ୱର ମିଶ୍ର): ବନ୍ୟା ଆସିଥିବାରୁ ତରତର ହୋଇ ସାଇକେଲ୍‌ରେ ଘରକୁ ଫେରୁଥିଲେ ଗଣେଶ କୁମ୍ଭାର। ହେଲେ ରାସ୍ତାରେ ପ୍ରବାହିତ ହେଉଥିବା ଜଳ ସ୍ରୋତ ତାଙ୍କୁ ଭସାଇ ନେଇଥିଲା। ଚାଷ ଜମିରୁ ଆଜି ତାଙ୍କର ମୃତଦେହ ମିଳିଛି।

ବଲାଙ୍ଗିର ରେଲୱେ ଷ୍ଟେସନ କ୍ୟାଣ୍ଟିନ୍‌ରେ ଟାଉନ ଥାନା ଅନ୍ତର୍ଗତ ବିଷ୍ଣୁମୁଣ୍ଡା ଗାଁର ଗଣେଶ କୁମ୍ଭାର କାମ କରିବାକୁ ଯାଇଥିଲେ। ପ୍ରବଳ ବର୍ଷା ଯୋଗୁ ଜିଲ୍ଲାରେ ବନ୍ୟା ହୋଇଥିବା ଜାଣି ଗତକାଲି ରାତିରେ ସେ ସାଇକେଲ୍‌ରେ ଘରକୁ ଫେରୁଥିଲେ। ତେବେ ବଲାଙ୍ଗିର-ମହିମୁଣ୍ଡା ରାସ୍ତାର ଲଖପାଲି ଛକଠାରେ ରାସ୍ତା ଉପରେ ଚାରିଫୁଟର ପାଣି ପ୍ରବାହିତ ହେଉଥିବାରୁ ସେ ଭାସି ଯାଇଥିଲେ। ଉକ୍ତ ରାସ୍ତାଠାରୁ ଗୋଟିଏ କିଲୋମିଟର ଦୂରରେ ଏକ ଚାଷ ଜମିରୁ ଗାଁ ଲୋକେ ତାଙ୍କର ମୃତଦେହ ଉଦ୍ଧାର କରିଛନ୍ତି। ପରିବାରର ସେ ଏକ ମାତ୍ର ରୋଜଗାରିଆ ବ୍ୟକ୍ତି ଥିଲେ। ତାଙ୍କ ମୃତ୍ୟୁରେ ସମ୍ପୁର୍ଣ୍ଣ ପରିବାର ଭାଙ୍ଗି ପଡ଼ିଛି।

ଟାଉନ ଥାନା ଅଧିକାରୀ ତୋଫାନ ବାଗ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରି ବ୍ୟବଚ୍ଛେଦ ପାଇଁ ପଠାଇ ଘଟଣାର ତଦନ୍ତ ଆରମ୍ଭ କରିଛନ୍ତି।