ବ୍ରହ୍ମପୁର (ଜଗନ୍ନାଥ ସାହୁ): ଗଞ୍ଜାମ ଜିଲ୍ଲାର ଦୁର୍ଦ୍ଦାନ୍ତ ଅପରାଧୀ ଶିବା ସେଠୀ ଓ ତାଙ୍କ ଗ୍ୟାଙ୍ଗ ଲୁଟ୍ ପାଇଁ ଯୋଜନା କରୁଥିଲେ। ଏ ସମ୍ପର୍କରେ ପୁଲିସ ଜାଣିପାରି ଚଢ଼ଉ କରିଥିଲା। ଆଉ ଶିବା ଓ ତାଙ୍କ ଗ୍ୟାଙ୍ଗ ପୁଲିସକୁ ଦେଖି ବୋମା ମାଡ଼ କରିଥିଲେ। ପରେ ପୁଲିସ କୌଶଳ କ୍ରମେ ଶିବା ଓ ତାଙ୍କ ଗ୍ୟାଙ୍ଗର ୯ ଅପରାଧୀଙ୍କୁ ଗିରଫ କରି ଆଜି କୋର୍ଟ ଚାଲାଣ କରିଛି।
ଦୁର୍ଦ୍ଦାନ୍ତ ଅପରାଧୀ ଶିବା ସେଠୀ। ତାଙ୍କ ନାଁରେ ରହିଛି ଲୁଟ୍, ରାହାଜାନୀ ଓ ବଟି ଆଦାୟ ପରି ଅନେକ ସଙ୍ଗୀନ ମାମଲା। ଶିବା ଓ ତାଙ୍କ ଗ୍ୟାଙ୍ଗ ଗତ କିଛି ଦିନ ଧରି ନରେନ୍ଦ୍ରପୁର ଗାଁରେ ଆତଙ୍କ ଖେଳାଉ ଥିଲା। ଯେଉଁଥିରେ ଅତିଷ୍ଠ ହୋଇ ଗାଁ ଲୋକେ ଗତ ୧୯ ତାରିଖରେ ବ୍ରହ୍ମପୁର ଏସ୍ପିଙ୍କ ଦ୍ୱାରସ୍ଥ ହୋଇଥିଲେ। ଅଭିଯୋଗକୁ ଭିତ୍ତିକରି ଶିବା ଓ ତାଙ୍କ ଗ୍ୟାଙ୍ଗକୁ ଧରିବା ପାଇଁ ପୁଲିସ ଜାଲ ବିଛାଇ ଥିଲା।
ଗତକାଲି ସନ୍ଧ୍ୟାରେ ଶିବା ଓ ତାଙ୍କ ଗ୍ୟାଙ୍ଗ ଗୋପାଳପୁର ଥାନା ଅନ୍ତର୍ଗତ ବଡ଼କୁଶସ୍ଥଳୀ ଗାଁ ନିକଟସ୍ଥ ଏକ ନିର୍ଜନ ସ୍ଥାନରେ ବସି ଲୁଟ୍ ପାଇଁ ଯୋଜନା କରୁଥିଲେ। ଏ ସମ୍ପର୍କରେ ପୁଲିସ ଜାଣିପାରି ସେଠାରେ ଚଢ଼ଉ କରିଥିଲା। ପୁଲିସକୁ ଦେଖି ଶିବ ଓ ତାଙ୍କ ଗ୍ୟାଙ୍ଗର ସଦସ୍ୟମାନେ ବୋମାମାଡ଼ କରିଥିଲେ। ପୁଲିସ ଏହାର ପାଲଟା ଜବାବ ଦେଇଥିଲା। ପରେ ପୁଲିସ ସେଠାରୁ ଶିବଙ୍କ ସମେତ ୯ ଜଣଙ୍କୁ ଗିରଫ କରିଥିବାରେ ସଫଳ ହୋଇଥିଲା। ତେବେ ଅନ୍ୟ ୩ଜଣ ଅପରାଧୀ ସେଠାରୁ ଫେରାର ହୋଇଯାଇଥିଲେ।
ପୁଲିସ ଘଟଣାସ୍ଥଳରୁ ୬ଟି ବୋମା, ୧ ଗୋଟିଏ ମାଉଜର, ୨ ଖଣ୍ଡା, ୧ ମ୍ୟାଗଜିନ ଓ ୨ଟି ଗୁଳି ଜବତ କରିଛି। ଶିବଙ୍କ ନାଁରେ ଗୋଟିଏ ହତ୍ୟା ସହ ୧୦ରୁ ଊର୍ଦ୍ଧ୍ୱ ମାମଲା ବିଭିନ୍ନ ଥାନାରେ ରହିଥିବା ବ୍ରହ୍ମପୁର ଏସ୍ପି ପିନାକ ମିଶ୍ର କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
