ଚାକିରି ସ୍ଥାୟୀ ଓ ଦରମା ବଢ଼ାଇବା ଦାବିରେ ଠିକା ନର୍ସଙ୍କ ଆନ୍ଦୋଳନ

କଟକ: ଚାକିରି ସ୍ଥାୟୀ କରିବା ଓ ଦରମା ବୃଦ୍ଧି ଦାବିରେ ଠିକା ନର୍ସଙ୍କ ଆନ୍ଦୋଳନ ଜାରି ରହିଛି। କଟକ ଏସ୍‌ସିବିରେ ନର୍ସମାନେ ମେଡିକାଲ ଅଧୀକ୍ଷକଙ୍କ କାର୍ଯ୍ୟାଳୟ ସମ୍ମୁଖରେ ଧାରଣା ଦେଇଛନ୍ତି। ଆଜିଠୁ ସେମାନେ ସଂପୂର୍ଣ୍ଣ କାର୍ଯ୍ୟବନ୍ଦ ଆନ୍ଦୋଳନକୁ ଓହ୍ଲାଇଛନ୍ତି । ଏଥିପାଇଁ ରୋଗୀ ସେବା ପ୍ରଭାବିତ ହୋଇଛି ।  ଠିକା ଭାବେ ୬ ବର୍ଷ ହେଲାଣି କାମ କରୁଥିଲେ ମଧ୍ୟ ସେମାନଙ୍କ ଦାବି ପ୍ରତି ଅଣଦେଖା କରାଯାଉଥିବା ନର୍ସ ସଂଘ ଅଭିଯୋଗ କରିଛି।

ଆନ୍ଦୋଳନରତ ନର୍ସମାନେ କହିଛନ୍ତି,“ ଆମେ ଦୁଇ ଦିନ ଧରି ଡ୍ୟୁଟି କରି ଧାରଣାରେ ବସିଛୁ କେବଳ ମେଡିକାଲ ଅଧୀକ୍ଷକଙ୍କୁ ଦେଖା କରିବାକୁ। ହେଲେ ସେ ଆମ କଥା କିଛି ବୁଝୁ ନାହାଁନ୍ତି। ଆଜି ଆନ୍ଦୋଳନର ତୃତୀୟ ଦିନ ହେଲାଣି କିନ୍ତୁ  ଅଧୀକ୍ଷକଙ୍କ ଦେଖା ନାହିଁ। ଅକ୍ଷୀକ୍ଷକ ଆମ ସହିତ ଆଲୋଚନା ନ କଲା ପର୍ଯ୍ୟନ୍ତ ଏହି ଆନ୍ଦୋଳନ ଜାରି ରହିବ।”

ସେହିପରି ଆନ୍ଦୋଳନରତ ଆଉ ଜଣେ ନର୍ସ କହିଛନ୍ତି,“ ଆମର ଏହି ଦାବି ନେଇ ସରକାରଙ୍କୁ ବିଭିନ୍ନ ପର୍ଯ୍ୟାୟରେ ଜଣାଇଛୁ। ହେଲେ ଆମ ଦାବିକୁ କାହିଁକି ଅଣଦେଖା କରାଯାଉଛି ଆମେ ଜାଣିନୁ।”

ସମାନ ଦାବିରେ ବୁର୍ଲାରେ ବି ଠିକା ନର୍ସ ଆନ୍ଦୋଳନ ଚଳାଇଛନ୍ତି।  ସେହିପରି ବ୍ରହ୍ମପୁରରେ ମଧ୍ୟ ନର୍ସମାନେ ଆନ୍ଦୋଳନକୁ ଓହ୍ଲାଇଛନ୍ତି।