ଭିଭିଆଇପି ବକ୍ସରେ ଶୁଭଙ୍କର ବସିବା ଘଟଣା; ଦେବାଶିଷ କହିଲେ ତଦନ୍ତ ହେଉ  

କଟକ(ଓଡ଼ିଶା ରିପୋର୍ଟର): ବାରବାଟୀ ଷ୍ଟାଡିୟମରେ ବିସିସିଆଇ ବକ୍ସରେ ଶୁଭଙ୍କର ନାୟକଙ୍କ ଉପସ୍ଥିତି ଘଟଣାର ତଦନ୍ତ ଦାବି କରିଛନ୍ତି କଟକ ବାରବାଟୀ ବିଧାୟକ ଦେବାଶିଷ ସାମନ୍ତରାୟ। ସେ କହିଛନ୍ତି,“ଶୁଭଙ୍କର ବିସିସିଆଇ ବକ୍ସରେ ବସିଥିବା ଗଣମାଧ୍ୟମରୁ ଜାଣିବାକୁ ପାଇଲି। କେଉଁମାନେ ପାସ୍ ପାଇଛନ୍ତି ଓସିଏ ପାଖରେ ତାଲିକା ଅଛି। କେଉଁ ବ୍ୟକ୍ତି ଶୁଭଙ୍କରଙ୍କୁ ଟିକେଟ ଦେଇଛି ତାଲିକାରୁ ଜଣାପଡ଼ିବ।”

ଦେବାଶିଷ ଆହୁରି କହିଛନ୍ତି,“ଓସିଏ  କେବେ ଏଭଳି ବ୍ୟକ୍ତିଙ୍କୁ ପାସ୍‌ ଦେଇ ନ ଥିବ। ପାସ୍‌ ପାଇଥିବା ଜଣେ ବ୍ୟକ୍ତି ତାଙ୍କୁ ପାସ୍‌ ଦେଇଛି।”

ଭିଭିଆଇପି ଗ୍ୟାଲେରୀରେ ଶୁଭଙ୍କର ମ୍ୟାଚ୍‌ ଦେଖିବା ନେଇ ଅର୍ଥ ମନ୍ତ୍ରୀ ଶଶିଭୂଷଣ ବେହେରା କହିଛନ୍ତି, “କିଏ ବସିଛି, କଣ କରିଛି, ମୁଁ ଆଗପଛ ଦେଖିନାହିଁ। ସିଟ୍ ଆରେଞ୍ଜମେଣ୍ଟ କରି ବସେଇବା ଲୋକ ଏନେଇ କହିପାରିବେ।”

ବାରବାଟୀ ଟି-ଟ୍ୱେଣ୍ଟି ମ୍ୟାଚ୍‌ ବେଳେ ଭିଭିଆଇପି ବକ୍ସରେ ବସି ମ୍ୟାଚ୍‌ ଦେଖିଥିଲେ ଶୁଭଙ୍କର ନାୟକ। ଏହି ବକ୍ସରେ ମନ୍ତ୍ରୀ, ବିଧାୟକଙ୍କ ସହ ଅନେକ ବରିଷ୍ଠ ଆଇଏଏସ୍ ଓ ‌ଆଇପିଏସ୍ ଅଧିକାରୀ ମଧ୍ୟ ଉପସ୍ଥିତ ଥିଲେ।

୨୦୧୪ ନଭେମ୍ବର ୧୮ ତାରିଖରେ ସି-ସୋର୍ ଚିଟଫଣ୍ଡ ଠକେଇ ମାମଲାରେ ସିବିଆଇ ଶୁଭଙ୍କରଙ୍କୁ ଗିରଫ କରିଥିଲା।  ଶୁଭଙ୍କର, ସିସୋର୍ ମାଲିକ ପ୍ରଶାନ୍ତ ଦାଶ  ଓ ତଥାକଥିତ ଟପ୍ ବ୍ୟୁରୋକ୍ରାଟଙ୍କ ମଧ୍ୟରେ ମଧ୍ୟସ୍ଥି ସାଜିଥିବା ଚର୍ଚ୍ଚା ହୋଇଥିଲା। ଗତ ଅଗଷ୍ଟ ୧ତାରିଖରେ ହାଇକୋର୍ଟରୁ ସର୍ତ୍ତମୂଳକ ଜାମିନ ପାଇବା ପରେ ଜେଲରୁ ମୁକୁଳିଥିଲେ ଶୁଭଙ୍କର। ବାରବାଟୀରେ ଭିଭିଆଇପିଙ୍କ ପାଇଁ ଉଦ୍ଦିଷ୍ଟ ଗ୍ୟାଲେରିରେ ତାଙ୍କ ଉପସ୍ଥିତିରୁ ସେ ପୁଣି ପାଓ୍ୱାର୍ କରିଡରର ନିକଟତର ହେଉଥିବା ଚର୍ଚ୍ଚା ହେଉଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।