ସୋର(ଶଶୀକାନ୍ତ ବେହେରା): ଅଙ୍ଗନବାଡ଼ିରେ ପଢ଼ୁଥିବା ୪ ବର୍ଷ ଝିଅକୁ ଦିଦି ମାଡ଼ ମାରି ହାତ ଭାଙ୍ଗି ଦେଇଥିବା ଅଭିଯୋଗ ହୋଇଛି। ଏପରି ଅଭିଯୋଗ ବାଲେଶ୍ୱର ଜିଲ୍ଲା ଖଇରା ଥାନା ଅଞ୍ଚଳରୁ ଆସିଛି। ଏନେଇ ଝିଅର ବାପା ଥାନା ଓ ସିଡିପିଓଙ୍କ ପାଖରେ ଅଭିଯୋଗ କରିବା ପରେ ଘଟଣାର ତଦନ୍ତ ଆରମ୍ଭ ହୋଇଛି। ମାତ୍ର ମାଡ଼ ମାରିବା ଘଟଣାକୁ ସିଡିପିଓ ଖଣ୍ଡନ କରିଛନ୍ତି।
ପୂରା ଘଟଣା ଏମିତି। ସବୁଦିନ ପରି ଆଜି ସାଉଣ୍ଡିଆ ଗାଁର ମୁକୁନ୍ଦ ଦାସଙ୍କ ୪ ବର୍ଷର ଝିଅ ଅଙ୍ଗନବାଡ଼ି ଯାଇଥିଲା। ଅଙ୍ଗନବାଡି ଦିଦି ସରସ୍ୱତୀ ଜେନା ବିନା କାରଣରେ ତାକୁ ମାଡ଼ ମାରିଥିବା ସହିତ ଠେଲି ଦେଇଥିଲେ। ଫଳରେ ଝିଅଟି ତଳେ ପଡ଼ି ଯାଇଥିଲା। ଯାହାଦ୍ୱାରା ଝିଅଟିର ହାତ ଭାଙ୍ଗି ଯାଇଥିବା ଅଭିଯୋଗ ହୋଇଛି। ଏନେଇ ମୁକୁନ୍ଦ ଖଇରା ଥାନାରେ ଅଭିଯୋଗ କରିବା ସହିତ ସିଡିପିଓଙ୍କ ଦ୍ୱାରସ୍ଥ ହୋଇଥିଲେ।
ଏପରି ଅଭିଯୋଗକୁ ସିଡିପିଓ ନର୍ମଦା ଦେଓ ଖଣ୍ଡନ କରିଛନ୍ତି। ସେ କହିଛନ୍ତି-“ଅଭିଯୋଗ ହେବା ପରେ ଅଙ୍ଗନବାଡି କର୍ମୀ ଓ ସହାୟିକାଙ୍କୁ ଡାକି ଘଟଣା ସମ୍ପର୍କରେ ପଚାରିଥିଲି। ଝିଅକୁ ମାଡ଼ ହୋଇନାହିଁ ବୋଲି ସେମାନେ କହିଛନ୍ତି। ପିଲାମାନେ ଖେଳୁଥିବା ବେଳେ ଠେଲାଠେଲି ହୋଇଥିଲେ। ଫଳରେ ଝିଅଟି ପଡ଼ି ଯିବାରୁ ତା’ ହାତ ଭାଙ୍ଗି ଯାଇଥିଲା।”
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
