କୁଆଡ଼େ ଗଲା କୁନ୍ଦୁଲି ପୀଡ଼ିତାଙ୍କ ସୁଇସାଇଡ୍‌ ନୋଟ୍‌?

ନୂଆଦିଲ୍ଲୀ(ଓଡ଼ିଶା ରିପୋର୍ଟର): କୁଆଡ଼େ ଗଲା କୁନ୍ଦୁଲି ପୀଡ଼ିତାଙ୍କ ସୁଇସାଇଡ୍‌ ନୋଟ? ଯାହାକୁ ସେ ଲେଖିଥିଲେ ମୃତ୍ୟୁ ପୂର୍ବରୁ। କ’ଣ ଲେଖାଅଛି ସେଥିରେ? ଯାହାକୁ ପୋଲିସ ପରିବାର ଲୋକଙ୍କୁ ଦେଉନାହିଁ। ଆଜି ନୂଆଦିଲ୍ଲୀରେ ଜାତି ଓ ଜନଜାତି ଅଧ୍ୟକ୍ଷଙ୍କୁ ଭେଟିବା ପରେ ଗଣମାଧ୍ୟମକୁ ଏପରି ଚାଞ୍ଚଲ୍ୟକର ବୟାନ ଦେଇଛନ୍ତି ପୀଡ଼ିତାଙ୍କ ଭାଇ।

ସେ କହିଛନ୍ତି-“ମୋ ଭଉଣୀ ମୃତ୍ୟୁ ପୂର୍ବରୁ ଏକ ସୁଇସାଇଡ୍‌ ନୋଟ୍‌ ଲେଖିଥିଲା। ଏ ସମ୍ପର୍କରେ ପଟାଙ୍ଗି ପୋଲିସ ଜାଣିପାରି ଘରର କବାଟ ଭାଙ୍ଗି ସେହି ସୁଇସାଇଡ୍‌ ନୋଟ୍‌କୁ ନେଇ ଯାଇଛି। ଯେତେ ମାଗିଲେ ମଧ୍ୟ ଦେଉନାହିଁ। ଏହି ସୁଇସାଇଡ୍‌ ନୋଟ୍‌ ମିଳିଲେ ବହୁ ଗୁରୁତ୍ୱପୂର୍ଣ୍ଣ ତଥ୍ୟ ପଦାକୁ ଆସିପାରିବ।”

ସେ ଆହୁରି ମଧ୍ୟ କହିଛନ୍ତି-“ମୋ ଭଉଣୀକୁ ଓଡ଼ିଶା ସରକାର ଓ ପୋଲିସ ବହୁ ନିର୍ଯାତନା ଦେଇଛନ୍ତି। ନ୍ୟାୟ ପାଇଁ ସମସ୍ତଙ୍କୁ ଗୁହାରି କରି ଶେଷରେ ଜୀବନ ହାରିଲା। ମୃତ୍ୟୁ ପରେ ମଧ୍ୟ ତାଙ୍କୁ ନ୍ୟାୟ ମିଳିଲା ନାହିଁ। ବରଂ ତା ବିରୋଧରେ ଅପପ୍ରଚାର କରାଗଲା। ତାକୁ ଯେଉଁମାନେ ଅନ୍ୟାୟ ଓ ନିର୍ଯାତନା ଦେଇଛନ୍ତି, ସେମାନଙ୍କୁ ଦଣ୍ଡ ଦିଆଯାଉ।”

ସ୍କୁଲରୁ ଫେରୁଥିବା ବେଳେ କୋବ୍ରା ଯବାନଙ୍କ ଡ୍ରେସ୍‌ ପିନ୍ଧିଥିବା ୪ ଜଣ ଯବାନ ତାଙ୍କୁ ଟେକି ନେଇ ଜଣେ ପରେ ଜଣେ ଦୁଷ୍କର୍ମ କରିଥିଲେ। ସ୍ଥାନୀୟ ଲୋକେ ତାଙ୍କୁ ପଟାଙ୍ଗି ମେଡ଼ିକାଲରେ ଭର୍ତ୍ତି କରିଥିଲେ। ସ୍ୱାସ୍ଥ୍ୟ ଅବସ୍ଥା ଗୁରୁତର ହେବାରୁ ତାଙ୍କୁ କୋରାପୁଟ ମେଡିକାଲ କଲେଜରେ ଭର୍ତ୍ତି କରାଯାଇଥିଲା। ପରେ କଟକ ବଡ଼ ମେଡ଼ିକାଲକୁ ସ୍ଥାନାନ୍ତରିତ କରାଯାଇଥିଲା। ଦୀର୍ଘ ୧୦୦ ଦିନ ଜୀବନ ସହିତ ସଂଘର୍ଷ କରି ସମସ୍ତଙ୍କଠାରୁ ନିରାଶ ହେବା ପରେ ଶେଷରେ ଆତ୍ମହତ୍ୟା କଲେ ପୀଡ଼ିତା। ଏହି ନିଆଁ ଏବେ ରାଜ୍ୟ ରାଜନୀତିକୁ ଉଷ୍ମ କରିଛି। ନିଆଁ ଓଡ଼ିଶା ଡେଇ ମୁମ୍ୱାଇ ଓ ଦିଲ୍ଲୀରେ ପହଞ୍ଚିଛି।