ଭୁବନେଶ୍ୱର(ଓଡ଼ିଶା ରିପୋର୍ଟର): ଆକାଶରୁ ଖସୁଛି ମୃତ୍ୟୁ। ରାଜ୍ୟରେ ବିପତ୍ତି ସାଜିଛି ବଜ୍ରପାତ। ବଜ୍ରପାତରେ ୨ ଦିନରେ ବିଭିନ୍ନ ସ୍ଥାନରେ ପ୍ରାୟ ୧୦ଜଣଙ୍କ ମୃତ୍ୟୁ ହେଲାଣି। ଖାଲି ମଣିଷ ନୁହଁନ୍ତି, ଗୃହପାଳିତ ପଶୁ ମଧ୍ୟ ବାଦ୍ ପଡୁନାହାନ୍ତି ପ୍ରକୃତିର ଏହି କୋପରୁ। ସରକାରୀ ତଥ୍ୟ ଅନୁସାରେ, ଗତ ୩ ବର୍ଷରେ ବଜ୍ରପାତରେ ରାଜ୍ୟରେ ୧,୨୫୬ ଜଣଙ୍କ ଜୀବନ ଯାଇଛି। କେବଳ ୨୦୧୮-୧୯ରେ ବଜ୍ରପାତରେ ୪୦୦ରୁ ଅଧିକ ଲୋକଙ୍କ ମୃତ୍ୟୁ ଘଟିଛି। ମୟୂରଭଞ୍ଜ ଜିଲ୍ଲାରେ ସର୍ବାଧିକ ୧୩୦ଜଣଙ୍କର ଓ ବାଲେଶ୍ୱରରେ ୯୫ ଜଣଙ୍କର ବଜ୍ରପାତରେ ଜୀବନ ଯାଇଛି।
କାହିଁକି ଘାତକ ସାଜୁଛି ବଜ୍ରପାତ?
ପାଣିପାଗ ବିଜ୍ଞାନୀଙ୍କ ମତରେ ଜଳବାୟୁ ପରିବର୍ତ୍ତନ ଓ ଅନିୟମିତ ମୌସୁମୀ ହିଁ ଏହାର ମୁଖ୍ୟ କାରଣ। ସାଧାରଣତଃ ଓଡ଼ିଶାରେ ମାର୍ଚ୍ଚରୁ ସେପ୍ଟେମ୍ବର ମଧ୍ୟରେ ବଜ୍ରପାତ ହୋଇଥାଏ। ତେବେ ଜୁଲାଇ ଓ ଅଗଷ୍ଟ ମାସରେ ବଜ୍ରପାତ ପରିମାଣ ଅଧିକ ଥାଏ। ବିଗତ ବର୍ଷମାନଙ୍କ ଅପେକ୍ଷା ଏଥର ବଜ୍ରପାତ ଅଧିକ ଘାତକ ସାଜିଛି। ଏହାର ପ୍ରଭାବ ଆଭ୍ୟନ୍ତରୀଣ ଓ ଉପକୂଳ ଓଡ଼ିଶାରେ ବେଶୀ ହୋଇଛି। ଗରମ ସାଙ୍ଗକୁ ସମୁଦ୍ରରୁ ଆସୁଥିବା ଜଳୀୟ ବାଷ୍ପ ହଠାତ୍ ମିଶି ହାନିକାରକ ବଜ୍ରପାତ ସୃଷ୍ଟି କରୁଥିବା କହିଛନ୍ତି ପାଣିପାଗ ବିଶେଷଜ୍ଞ ଶରତ ଚନ୍ଦ୍ର ସାହୁ।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
