ମାଳତିପାଟପୁର ବସ୍ ଟର୍ମିନାଲକୁ କାର୍ଯ୍ୟକ୍ଷମ ଲାଗି ହେବ ନୂଆ ଯୋଜନା

ପୁରୀ: ନବକଳେବର ରଥଯାତ୍ରା ସମୟରେ ମାଳତିପାଟପୁରଠାରେ ନିର୍ମାଣ କରାଯାଇଛି ଅତ୍ୟାଧୁନିକ ବସ ଟର୍ମିନାଲ । ତେବେ ରଥଯାତ୍ରା ପରେ ଏବେ ଏଠାକୁ ବସଟିଏ ବି ଆସୁନାହିଁ । ତେବେ କୋଟି କୋଟି ଟଙ୍କା ଖର୍ଚ୍ଚ କରାଯାଇଥିବା ଏହି ବସ ଟର୍ମିନାଲକୁ ନେଇ ଏବେ ରାଜନୀତି ଜୋର ଧରିଛି । ସରକାରଙ୍କୁ ଏଥିପାଇଁ ସମାଲୋଚନା ମଧ୍ୟ ହେବାକୁ ପଡୁଛି । ଏପରି ସ୍ଥିତିରେ ଏହି ଟର୍ମିନାଲକୁ କାର୍ଯ୍ୟକ୍ଷମ କରିବାକୁ ନୂଆ ଯୋଜନା ପ୍ରସ୍ତୁତ କରୁଛନ୍ତି ସରକାର । ଏ ନେଇ ନବକଳେବର ଭିତ୍ତିଭୂମି ବିକାଶ ତଦାରଖ କମିଟି ଅଧ୍ୟକ୍ଷ ମହେଶ୍ୱର ମହାନ୍ତି ସୂଚନା ଦେଇଛନ୍ତି । ସେ କହିଛନ୍ତି ଯେ, ୩ ଏକର ପରିମିତ ଯାଗାରେ ଅଟୋ ନଗର କରାଯିବ। ପୁରୀରୁ ବସ୍ ଟର୍ମିନାଲ ପର୍ଯ୍ୟନ୍ତ ପର୍ଯ୍ୟାପ୍ତ ସିଟିବସ ଚଳାଚଳ କରିବ ବୋଲି ସେ କହିଛନ୍ତି । ସରକାରଙ୍କ ଏହି ଯୋଜନାକୁ ବିଭିନ୍ନ ମହଲରେ ସ୍ୱାଗତ କରାଯାଇଛି।