ଭୁବନେଶ୍ୱର(ଓଡ଼ିଶା ରିପୋର୍ଟର): ରାଜ୍ୟରେ କରୋନା ସଂକ୍ରମଣ ବଢୁଥିବାରୁ ଏଥିରୁ ରକ୍ଷା ପାଇବା ଲାଗି ରାଜ୍ୟ ସରକାର ନୂଆ ନିୟମାବଳୀ ଜାରି କରିଛନ୍ତି। ଜାରି ହୋଇଥିବା ନିୟମାବଳୀ କଡ଼ାକଡ଼ି ପାଳନ କରିବା ଲାଗି ସରକାରଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଛି।
ସମସ୍ତ ସରକାରୀ ବିଭାଗ ଓ କାର୍ଯ୍ୟାଳୟରେ ସାମାଜିକ ଦୂରତା ବଜାୟ ରଖିବା ଲାଗି ସରକାରଙ୍କ ପକ୍ଷରୁ ଏହି ନିୟମାବଳୀରେ ନିର୍ଦ୍ଦେଶ ଦିଆଯାଇଛି । ଅଫିସର ସମସ୍ତ କର୍ମଚାରୀ ଓ ଅଧିକାରୀ ଡ୍ୟୁଟି ସମୟରେ ମାସ୍କ ପିନ୍ଧିବାକୁ ବାଧ୍ୟତାମୂଳକ କରାଯାଇଛି । ଏଥିରେ ଖିଲାପ କଲେ ଶୃଙ୍ଖଳା ଭଙ୍ଗ ଅଭିଯୋଗରେ କାର୍ଯ୍ୟାନୁଷ୍ଠାନ ନିଆଯିବ ।
ଅଫିସରେ ବସିବା ବେଳେ ସାମାଜିକ ଦୂରତା ଯେପରି ନିଶ୍ଚିତ ଭାବେ ବଜାୟ ରହିବ, ତାକୁ ସମସ୍ତେ ପ୍ରାଧାନ୍ୟ ଦେବେ। ବିଭାଗୀୟ ଡ୍ରାଇଭର, ସୁରକ୍ଷାକର୍ମୀ ଓ ଜଗୁଆଳିଙ୍କ ସମେତ ସମସ୍ତେ ମାସ୍କ ପିନ୍ଧିବେ । ନିୟମିତ ହାତ ଧୋଇବେ ଓ ସାମାଜିକ ଦୂରତା ବଜାୟ ରଖିବେ।
ସେହିପରି ଅଫିସ ପରିସରରେ ଛେପ ପକାଇବାକୁ ସଂପୂର୍ଣ୍ଣ ନିଷେଧ କରାଯାଇଛି । ଏହା କର୍ମଚାରୀ ଓ ଭିଜିଟର ଉଭୟଙ୍କ ପାଇଁ ଲାଗୁ ହେବ । ଖିଲାପ କଲେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ନିୟମାବଳୀରେ ରହିଛି । ସ୍ୱାସ୍ଥ୍ୟଗତ ସମସ୍ୟା ଥିବା ବୟସ୍କ ଓ ଗର୍ଭବତୀ କର୍ମଚାରୀ ସାଧାରଣ ଲୋକଙ୍କ ସଂସ୍ପର୍ଶରେ ନ ଆସିବାକୁ କୁହାଯାଇଛି ।
ଅଫିସ୍ରେ ଲିଫ୍ଟ ଭିତରେ ୪ରୁ ଅଧିକ ଲୋକ ଯିବାକୁ ବାରଣ କରାଯାଇଛି। ଯଥାସମ୍ଭବ ଲିଫ୍ଟ ବ୍ୟବହାର ନ କରି ଶିଢ଼ିରେ ଯିବାକୁ ପରାମର୍ଶ ଦିଆଯାଇଛି । ଏହାବ୍ୟତୀତ ସମସ୍ତେ କାନ୍ଥ ଆଡ଼କୁ ଅନାଇ ଯିବାକୁ ନିୟମାବଳୀରେ ପରାମର୍ଶ ଦିଆଯାଇଛି।
ବାରମ୍ବାର ହାତ ଲାଗୁଥିବା ଉପକରଣକୁ ନିୟମିତ ସାନିଟାଇଜ କରାଯିବ । ଓ୍ୱାର୍କଷ୍ଟେସନ, କି-ବୋର୍ଡ, ଟେଲିଫୋନ୍, ଶିଢ଼ି ରେଲିଂ, ଦୁଆର ହ୍ୟାଣ୍ଡେଲ ଆଦି ସ୍ଥାନକୁ ସାବୁନ କିମ୍ବା ବିଶୋଧକ ସାମଗ୍ରୀରେ ସଫା କରିବାକୁ ହେବ । ଯଥାସମ୍ଭବ ଅନ୍ୟର ମୋବାଇଲ୍, ଡେସ୍କ ଓ ଅନ୍ୟ ବ୍ୟବହାର ସାମଗ୍ରୀଠାରୁ ଦୂରେଇ ରହିବାକୁ ମଧ୍ୟ ପରାମର୍ଶ ଦିଆଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
