ସହପାଠୀଙ୍କ ବେକ କାଟି ଦେଲେ

ଆସିକା (ମନୋଜ ମୁନି): ଜଣେ ସ୍କୁଲ୍ ଛାତ୍ର ତାଙ୍କ ସହପାଠୀଙ୍କ ବେକ କାଟି ଦେଇଥିବା ଅଭିଯୋଗ ହୋଇଛି। ଏପରି ଏକ ଭୟଙ୍କର ତଥା ଚିନ୍ତାଜନକ ଘଟଣା ଘଟିଛି ଗଞ୍ଜାମ ଜିଲ୍ଲାରେ।

କବିସୂର୍ଯ୍ୟଗର ଥାନା ଏ.ପରିଡ଼ା ଗାଁର ଦଧିବାମନ ହାଇସ୍କୁଲ୍‌ର ଦଶମ ଶ୍ରେଣୀ ଛାତ୍ର ବିଶୁ ସାହୁ (ଛଦ୍ମନାମ) ଓ ତାଙ୍କ ସାଥୀ ଦୀପକ ସାହୁଙ୍କ ମଧ୍ୟରେ କ୍ଲାସ୍‌ ଚାଲିଥିବା ବେଳେ କୌଣସି କଥାକୁ ନେଇ ପାଟିତୁଣ୍ଡ ହୋଇଥିଲା। ଏଥିରେ ଉତ୍‌କ୍ଷିପ୍ତ ହୋଇ ବିଶୁ ଏକ ଧାରୁଆ ବ୍ଲେଡ୍‌ରେ ଦୀପକଙ୍କୁ ପଛଆଡୁ ଆକ୍ରମଣ କରି ବେକ କାଟି ଦେଇଥିଲେ।

ଶିକ୍ଷକମାନେ ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରି କବିସୂର୍ଯ୍ୟନଗର ମେଡିକାଲ୍‌ରେ ଭର୍ତ୍ତି କରିଥିଲେ। ସେଠାରେ ଅବସ୍ଥା ସଙ୍କଟାପନ୍ନ ହେବାରୁ ତାଙ୍କୁ ବ୍ରହ୍ମପୁର ବଡ଼ ମେଡିକାଲ୍‌କୁ ସ୍ଥାନାନ୍ତର କରାଯାଇଛି।