ଭୁବନେଶ୍ୱର(ଓଡ଼ିଶା ରିପୋର୍ଟର): ସବୁବେଳେ କୌଣସି ରାଜନେତାଙ୍କୁ ବିରୋଧ ପ୍ରଦର୍ଶନ କରାଗଲେ, ତାଙ୍କ ବିରୋଧରେ ପ୍ରମୁଖ ଅସ୍ତ୍ର ହୁଏ ଅଣ୍ଡା ମାଡ଼ ଓ କଳା ପତକା ପ୍ରଦର୍ଶନ । ରାଜନୈତିକ ଆକ୍ରୋଶ ରଖି ଗୋଟିଏ ଦଳର କର୍ମୀ ଅନ୍ୟ ଦଳର ନେତାଙ୍କ ଉପରକୁ ତଥା ତାଙ୍କ କାର୍ ଉପରକୁ ଅଣ୍ଡା ଫିଙ୍ଗିବା ଆଜିକାଲିର ଟ୍ରେଣ୍ଡ ପାଲଟିଲାଣି। ଏହାଦ୍ୱାରା ଅଯଥାରେ ଅନେକ ଗୁଡ଼ିଏ ଅଣ୍ଡା ନଷ୍ଟ ହେଉଥିବା ବେଳେ ଗରୀବ ପିଲାଟିଏ କିନ୍ତୁ ଏହାକୁ ଖାଇବାକୁ ପାଉନି।
ଏବେ ମମିତା ମର୍ଡର ମାମଲାକୁ ନେଇ ସମଗ୍ର ରାଜ୍ୟ ଉଠୁଥିବା, ପଡ଼ୁଥିବା ବେଳେ ମୁଖ୍ୟମନ୍ତ୍ରୀ ତଥା ତଥ୍ୟ ସମସ୍ତ ମନ୍ତ୍ରୀଙ୍କୁ ବିରୋଧ କରୁଛନ୍ତି ବିରୋଧୀ। ଏପରିକି ମୁଖ୍ୟମନ୍ତ୍ରୀ ତଥା ମନ୍ତ୍ରୀଙ୍କ ଗସ୍ତକୁ ଟାର୍ଗେଟ କରି କରୁଛନ୍ତି ଆଖିବୁଜା ଅଣ୍ଡା ମାଡ଼ । ଏପରିକି ମୁଖ୍ୟମନ୍ତ୍ରୀ ତଥା ମନ୍ତ୍ରୀମାନଙ୍କ କାର୍ ଉପରକୁ ଅଣ୍ଡାମାଡ଼ କରି ବିରୋଧୀ ନିଜକୁ ବାହାବା କରୁଥିବା ବେଳେ ଗରୀବ ଘରର ପିଲା ପାଇଁ କିନ୍ତୁ ଏହା ସ୍ୱପ୍ନ ପାଲଟିଛି।
ସରକାରଙ୍କୁ ବିରୋଧ କରିବା ପାଇଁ ବିରୋଧୀଙ୍କ ଏପରି ଫଣ୍ଡାକୁ ସମ୍ପୂର୍ଣ୍ଣ ନାପସନ୍ଦ କରିଛନ୍ତି ବିଜେଡି ବିଧାୟକ ସୌମ୍ୟରଞ୍ଜନ ପଟ୍ଟନାୟକ । ବିଦ୍ରୋହ ପ୍ରକାଶ କରିବା ପାଇଁ ଅଣ୍ଡାମାଡ଼ ପ୍ରକ୍ରିୟାକୁ ସେ ବିଶ୍ୱାସ କରନ୍ତି ନାହିଁ ବୋଲି ସଫାସଫା ଶୁଣାଇ ଦେଇଛନ୍ତି।
ଏନେଇ ସେ କହିଛନ୍ତି, ଅଣ୍ଡା ମାଡ଼ ନ କରି ସେହି ଅଣ୍ଡାକୁ ଗରିବ ପିଲାଙ୍କୁ ବାଣ୍ଟିଦେଲେ, ଅନେକ ଗରିବ ପିଲା ଉପକୃତ ହୁଅନ୍ତେ । ଅନେକ ଲୋକ ଅଣ୍ଡା ଖାଇବାକୁ ପାଉ ନାହାନ୍ତି। ତୁମ ପାଖରେ ଯଦି ଏତେ ଅଣ୍ଡା ଅଛି ଫିଙ୍ଗିବାକୁ, ତାକୁ ପିଲାମାନଙ୍କୁ ବାଣ୍ଟିଦିଅ। ମୁଖ୍ୟମନ୍ତ୍ରୀଙ୍କ ବିରୋଧରରେ, ବିଜେଡି ବିରୋଧରେ କହି ବାଣ୍ଟ, ହେଲେ ନଷ୍ଟ କରନି ।
ତେବେ ବିରୋଧୀମାନେ ଏବେ ଅଣ୍ଡାମାଡ଼କୁ ପ୍ରମୁଖ ଅସ୍ତ୍ର ଭାବେ ବିବେଚନା କରୁଥିବା ବେଳେ ରାଜନୈତିକ ଦୃଷ୍ଟିକୋଣରୁ କିନ୍ତୁ ଏହାର ସେପରି କୌଣସି ପ୍ରଭାବ ପଡିବ ନାହିଁ । ମୁଣ୍ଡ ଉପରେ ପଞ୍ଚାୟତ ନିର୍ବାଚନ ଥିବାରୁ ବିରୋଧୀମାନେ ନିଜ ନିଜର ପ୍ରଭାବ ଦେଖାଇବାକୁ ଏପରି କରୁଛନ୍ତି । ତେବେ ଏପରି ନ କରି ଅନ୍ୟ ଉପାୟରେ ବି ବିରୋଧ କରାଯାଇପାରିବ ବୋଲି ସେ ମତ ରଖିଛନ୍ତି। ତେଣୁ ବିରୋଧ ନାଁରେ ଅଣ୍ଡା ନଷ୍ଟ ନ କରିବାକୁ ସେ ବିରୋଧୀମାନଙ୍କୁ ଅନୁରୋଧ କରିଛନ୍ତି।
ସୂଚନାଯୋଗ୍ୟ, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ କାରକେଡ୍ ଉପରକୁ ଗତକାଲି ପୁରୀରେ ଅଣ୍ଡାମାଡ଼ ହୋଇଥିଲା। ମୁଖ୍ୟମନ୍ତ୍ରୀ ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଶିଳାନ୍ୟାସ କାର୍ଯ୍ୟକ୍ରମରୁ ଫେରୁଥିବା ବେଳେ ପୁରୀ ଡାକ୍ତରଖାନା ଛକ ନିକଟରେ ତାଙ୍କ କାରକେଡ୍ ଉପରକୁ ଅଣ୍ଡାମାଡ଼ କରିଥିଲେ ବିଜେପି ଯୁବମୋର୍ଚ୍ଚା କର୍ମୀ। ବ୍ୟାପକ ପୁଲିସ୍ କର୍ମଚାରୀଙ୍କୁ ମୁତୟନ କରାଯାଇ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲେ ହେଁ ସେମାନେ ଅଣ୍ଡାମାଡ଼ କରିଥିଲେ।
ତିନି ଜଣ ବ୍ୟକ୍ତି ଡାକ୍ତରଖାନା ଛକରେ ଥିବା ଏକ କ୍ଲିନିକ୍ ନିକଟରେ ଲୁଚି ରହିଥିଲେ। ମୁଖ୍ୟମନ୍ତ୍ରୀଙ୍କ କାରକେଡ୍ ସେହି ବାଟ ଦେଇ ଅତିକ୍ରମ କରୁଥିବା ବେଳେ ସେମାନେ ବ୍ୟାରିକେଡ ବାହାରେ ଛିଡ଼ା ହୋଇ ଅଣ୍ଡାମାଡ଼ କରିଥିଲେ। ପୁଲିସ ସେମାନଙ୍କୁ ସଙ୍ଗେ ସଙ୍ଗେ କାବୁ କରି ନେଇଥିଲା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
