ଶପଥ ଗ୍ରହଣ ପୂର୍ବରୁ ମହାପ୍ରଭୁଙ୍କ ଆଶୀର୍ବାଦ ନେଲେ ନବୀନ

ଭୁବନେଶ୍ୱର(ଓଡ଼ିଶା ରିପୋର୍ଟର): ଆସନ୍ତାକାଲି ଭୁବନେଶ୍ୱର ପ୍ରଦର୍ଶନୀ ପଡ଼ିଆରେ ହେବ ଶପଥ ଗ୍ରହଣ ଉତ୍ସବ। ପଞ୍ଚମ ପାଳି ଆରମ୍ଭ କରିବେ ବିଜେଡି ସୁପ୍ରିମୋ ନବୀନ ପଟ୍ଟନାୟକ ଓ ତାଙ୍କ ଟିମ୍‌। ତା’ପୂର୍ବରୁ ଆଜି ନବୀନ ପୁରୀ ଯାଇ ଶ୍ରୀମନ୍ଦିରରେ ଶ୍ରୀଜିଉଙ୍କୁ ଦର୍ଶନ କରି ଆଶୀର୍ବାଦ ନେଇଛନ୍ତି। ସେପଟେ ଶପଥ ଗ୍ରହଣ ଉତ୍ସବ ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଞ୍ଚିଛି। ରାଜ୍ୟପାଳ ପ୍ରଫେସର ଗଣେଶୀ ଲାଲ ମୁଖ୍ୟମନ୍ତ୍ରୀ ଓ ନୂଆ ମନ୍ତ୍ରୀମାନଙ୍କୁ ପଦ ଏବଂ ଗୋପନୀୟତାର ଶପଥ ପାଠ କରାଇବେ।

ଭୁବନେଶ୍ୱର ପ୍ରଦର୍ଶନୀ ପଡ଼ିଆରେ ଆୟୋଜିତ ହେବାକୁ ଥିବା ଉତ୍ସବରେ ୭ ହଜାର ନିମନ୍ତ୍ରିତ ଅତିଥି ଯୋଗଦେବାର କାର୍ଯ୍ୟକ୍ରମ ରହିଛି। ଯାହାଙ୍କ ମଧ୍ୟରେ ଅଛନ୍ତି ସମସ୍ତ ନିର୍ବାଚିତ ବିଧାୟକ ଓ ସାଂସଦଙ୍କ ସମେତ ସବୁ ଦଳର ନେତା, ମେକ୍ ଇନ୍ ଓଡ଼ିଶାକୁ ଆସିଥିବା ଅନେକ ଶିଳ୍ପପତି ଓ ବିଭିନ୍ନ ସାମାଜିକ ସଙ୍ଗଠନର କର୍ମକର୍ତ୍ତା ରହିଛନ୍ତି।

ଆସନ୍ତାକାଲି ଦିନ ଠିକ ସାଢ଼େ ୧୦ଟାରେ ଶପଥ ଗ୍ରହଣ ଉତ୍ସବ ଅନୁଷ୍ଠିତ ହେବ। ପ୍ରଥମ ଥର ଲାଗି ରାଜଭବନ ବାହାରେ ଉତ୍ସବ ଆୟୋଜନ ହୋଇଥିବାରୁ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। କଡ଼ା ସୁରକ୍ଷା ବଳୟରେ ରହିବ ସମଗ୍ର ପ୍ରଦର୍ଶନୀ ପଡ଼ିଆ। ମୁତୟନ ହେବେ ୩୦ ଫ୍ଲାଟୁନ ଫୋର୍ସ। ଅତିଥିମାନଙ୍କ ପ୍ରବେଶ ପାଇଁ କରାଯାଇଛି ୫ଟି ପ୍ରବେଶ ପଥ।

ସେହିପରି ଶପଥ ଗ୍ରହଣ ହେବାକୁ ଥିବା ମଞ୍ଚର ୧୦୦ ଫୁଟ୍ ଯାଏଁ CCTV କଭରେଜ୍ ବ୍ୟବସ୍ଥା ହୋଇଛି। ଶପଥଗ୍ରହଣ ଉତ୍ସବକୁ ଆସିବାକୁ ଥିବା ଅତିଥିଙ୍କ ପାଇଁ ତିନିଟି ପାର୍କିଂ ପ୍ଲେସ୍ କରାଯାଇଛି। ସ୍ୱତନ୍ତ୍ର ଟ୍ରାଫିକ ଆଡଭାଇଜରି ଜାରି କରାଯାଇ ମଧୁସୂଦନ ମାର୍ଗରେ ସକାଳ ୭ଟାରୁ ମଧ୍ୟାହ୍ନ ୧୨ଟା ପର୍ଯ୍ୟନ୍ତ ଯାନବାହନ ଚଳାଚଳ ଉପରେ ସମ୍ପୂର୍ଣ୍ଣ କଟକଣା ଜାରି ହୋଇଛି। ଉତ୍ସବ ସମ୍ପର୍କିତ ସୁରକ୍ଷା ବ୍ୟବସ୍ଥାର ସମୀକ୍ଷା କରିଛନ୍ତି ପୋଲିସ କମିଶନର ସତ୍ୟଜିତ୍ ମହାନ୍ତି।

ଶପଥ ଗ୍ରହଣ ଉତ୍ସବରେ ଏହିମାନେ ଯୋଗଦେବେ

ନବୀନଙ୍କ ଶପଥ ଗ୍ରହଣ ଉତ୍ସବରେ ବିଶିଷ୍ଟ ଶିଳ୍ପୀ ପଦ୍ମବିଭୂଷଣ ରଘୁନାଥ ମହାପାତ୍ର, ସଙ୍ଗୀତଜ୍ଞ ପ୍ରଫୁଲ୍ଲ କର, ଓଡ଼ିଶୀ ନୃତ୍ୟାଙ୍ଗନା ପ୍ରିୟମ୍ବଦା ମହାନ୍ତି, ଶିଳ୍ପପତି କୁମାର ମଙ୍ଗଳମ ବିର୍ଲା, ନବୀନ ଜିନ୍ଦଲ, ଆଇଟିସିର ଅଧ୍ୟକ୍ଷ ସଞ୍ଜୀବ ପୁରୀ, ଟାଟା ଷ୍ଟିଲର ପରିଚାଳନା ନିର୍ଦ୍ଦେଶକ ଟିଭି ନରେନ୍ଦ୍ରନ୍ , ଟେକ୍ ମହିନ୍ଦ୍ରା ଏମଡି ସିପି ଗୁରନାନୀ, ମାଇଣ୍ଡଟ୍ରି ଅଧ୍ୟକ୍ଷ କେକେ ନଟରାଜନ୍, ଓସିଏଲର ପୁନୀତ୍ ଡାଲମିଆ, ଆପୋଲୋ ଗ୍ରୁପର ସଙ୍ଗୀତ ରେଡ୍ଡୀ, ରାମକୋ ଗ୍ରୁପର ପିଭି ଭେଙ୍କଟ ରାମରାଜା, ବିଶିଷ୍ଟ ହୃଦରୋଗ ବିଶେଷଜ୍ଞ ଡାକ୍ତର
ରମାକାନ୍ତ ପଣ୍ଡା, ଡାକ୍ତର ଟିପି ଦାସ, ଡାକ୍ତର ସୁବ୍ରତ ଆଚାର୍ଯ୍ୟ ପ୍ରମୁଖ ଯୋଗଦେବାର ରହିଛି।