ସାଉଦି ଆରବରେ ଝଲସିଲା ଓଡ଼ିଆ କଳାସଂସ୍କୃତି, ଦେଖନ୍ତୁ ଭିଡିଓ

ଭୁବନେଶ୍ୱର,(ଓଡ଼ିଶା ରିପୋର୍ଟର):ବିଦେଶରେ ଓଡ଼ିଆ ପରମ୍ପରା ଓ କଳା ସଂସ୍କୃତିର ଝଲକ। ସାଉଦିଆରବରେ ଆୟୋଜିତ ‘ଜନାଦରିଆ’ କାର୍ଯ୍ୟକ୍ରମରେ ଓଡ଼ିଶାର ଲୋକକଳା ଓ ବିଭିନ୍ନ ସାଂସ୍କୃତିକ କାର୍ଯ୍ୟକ୍ରମ ପ୍ରଦର୍ଶିତ ହୋଇଥିଲା । କେବଳ ଓଡ଼ିଶା ନୁହଁ ଭାରତର ବିଭିନ୍ନ ରାଜ୍ୟର କଳା ସ୍ଥାପତ୍ୟର ନିଦର୍ଶନ ଦେଖିବାକୁ ମିଳିଥିଲା। ବିଶେଷକରି ସାଉଦି ଆରବରେ ଦୀର୍ଘ ବର୍ଷ ଧରି ତଥା ସେଠାକାର ବାର୍ଷିକ କଳା ଓ ସାଂସ୍କୃତିକ କାର୍ଯ୍ୟକ୍ରମ ‘ଜନାଦରିଆ’ ଉତ୍ସବ ଆୟୋଜିତ ହୋଇ ଆସୁଛି। ତେବେ ୩୨ ବର୍ଷରେ ପ୍ରଥମ ଥର ପାଇଁ ଏହି କାର୍ଯ୍ୟକ୍ରମରେ ସାମିଲ ହେବା ପାଇଁ ଭାରତକୁ  ବିଶେଷ ଅତିଥି ଭାବେ ନିମନ୍ତ୍ରଣ କରାଯାଇଥିଲା।   ଏହି ଉତ୍ସଵ ଗତ ଫେବୃଆରୀ ୭ରୁ ୨୪ ତାରିଖ ପର୍ଯ୍ୟନ୍ତ ଅନୁଷ୍ଠିତ ହୋଇଥିଲା। ଉତ୍ସବରେ ଭାରତର ମଞ୍ଚକୁ ଯୁଗ୍ମ ଭାବେ ଭାରତର ବୈଦେଶିକ ମନ୍ତ୍ରୀ ସୁଷମା ସ୍ୱରାଜ ଏବଂ ସାଉଦିଆରବର ରାଜା ଶ୍ରୀମାନ ସଲମାନ ଉଦଘାଟନ କରିଥିଲେ ।

ଉତ୍ସବରେ ଭାରତର ପ୍ରତ୍ୟେକ ରାଜ୍ୟରୁ ନିଜର କଳା, ସ୍ଥାପତ୍ୟ ତଥା ସଂସ୍କୃତି ବିଷୟରେ ପ୍ରଦର୍ଶିତ ଓ ପ୍ରଚାର ପ୍ରସାର କରିବାକୁ  ସ୍ଥାନୀୟ ଭାରତୀୟ ଦୂତାବାସ ତରଫରୁ ବିଶେଷ ପ୍ରୋତ୍ସାହନ ମିଳିଥିଲା।  ସବୁଠୁ  ବଡ଼ କଥା ହେଉଛି ଓଡ଼ିଶାକୁ ଗତ ଫେବୃଆରୀ ୧୯ ତାରିଖରେ ମଞ୍ଚରେ ପରିବେଷଣ କରିବାକୁ ସୁଯୋଗ ମିଳିଥିଲା।  ସାଉଦି ଆରବର ରାଜଧାନୀ ରିୟାଧହର ଗଠିତ ପ୍ରଭାସୀ ଓଡ଼ିଆ ସାଂଗଠନ ରୋଜା (ରିୟାଧ ଓଡିଶା ସାମାଜିକ ତଥା ସାଂସ୍କୃତିକ ସଂଗଠନ)ର ପ୍ରୟାସରେ ଓଡିଶାର କଳାକାରଙ୍କ ପାଇଁ ମଞ୍ଚ ପ୍ରସ୍ତୁତ ହୋଇଥିଲା।

ଓଡ଼ିଶା ମଞ୍ଚରେ ବିଶ୍ୱ ପ୍ରସିଦ୍ଧ ସମ୍ବଲପୁରୀ ଶାଢ଼ୀ, ପିପିଲିର ଚାନ୍ଦୁଆ, କଟକର ତାରକସି,  ରୁପା ଜିନିଷ, ପୁରୀର ନଡ଼ିଆ କତାର ଖେଳନା, ଆଦିବାସୀ ଚିତ୍ର କଳା, ପଟ୍ଟ ଚିତ୍ର, ରୁପାର ଗହଣା ଇତ୍ୟାଦି ପ୍ରଦର୍ଶିତ ହୋଇଥିଲା। କଳା ଓ ସାଂସ୍କୃତି ବ୍ୟତୀତ ଓଡ଼ିଶାର ଉଦ୍ୟୋଗ, ଖଣିଜ ଦ୍ରବ୍ୟ, ଶିକ୍ଷା ଅନୁଷ୍ଠାନ, ବିଜ୍ଞାନ, ପର୍ଯ୍ୟଟନ ସ୍ଥଳୀ ତଥା ବିଶ୍ୱ ପ୍ରସିଦ୍ଧ ଓଡ଼ିଶୀ ନୃତ୍ୟର ପରିବେଶଣ ହୋଇଥିଲା।

ଓଡ଼ିଶା ମଞ୍ଚକୁ ଭାରତୀୟ ରାଜଦୂତ ଶ୍ରୀ ଅହମ୍ମଦ ଜାଭେଦ, ICCRର ପ୍ରଧାନ ଅଧ୍ୟକ୍ଷ ସହସ୍ର ବୁଦ୍ଧ, ଡେପୁଟି ଚିଫ୍ ମିଶନ ସୁହେଲ ଆଜାଦ ଖାନ୍‌ ଓ କମ୍ୟୁନିଟି ୱେଲଫେୟାର କାଉନ୍‌ସିଲର ଅନିଲ ହନୌତିଆଲ ପ୍ରମୁଖ ଉଦ୍‌ଘାଟନ କରିଥିଲେ। ଏହି ଅବସରରେ ଅତିଥିମାନଙ୍କୁ ଓଡ଼ିଶାର ପ୍ରସିଦ୍ଧ ଛେନାପୋଡ଼ ମିଠା ପରସା ଯାଇଥିଲା। ତେବେ ଓଡ଼ିଶାର ମଞ୍ଚ ସାଜସଜା ସେଠାକାର ଅତିଥିମାନେ ଖୁସି ବ୍ୟକ୍ତ କରିଥିଲେ।