ଆଠଗଡ଼ (ନୀଳକଣ୍ଠ ଦୋରା): ୫ ଦଫା ଦାବିରେ ଜାନୁଆରୀ ୧୧ ତାରିଖ ମଧ୍ୟରାତ୍ରୀରୁ ରାଜ୍ୟବ୍ୟାପୀ ଟ୍ରକ୍ ଧର୍ମଘଟ ଡାକରା ଦେଇଛି ରାଜ୍ୟ ଟ୍ରକ୍ ମାଲିକ ସଂଘ। ଶୁକ୍ରବାର କଟକ ଜିଲ୍ଲାର ଖୁଣ୍ଟୁଣୀ ଟ୍ରକ୍ ମାଲିକ ସଂଘ କାର୍ଯ୍ୟାଳୟରେ ଆୟୋଜିତ ସାମ୍ବାଦିକ ସମ୍ମିଳନୀରେ ରାଜ୍ୟ ଟ୍ରକ୍ ମାଲିକ ସଂଘ ସଭାପତି ବିଭୂତି ପ୍ରସାଦ ଦାସ ଏହି ସୂଚନା ଦେଇଛନ୍ତି।
ଶ୍ରୀ ଦାସ କହିଛନ୍ତି, ୧୫ ବର୍ଷ ଅତିକ୍ରମ କରି ସାରିଥିବା ଗାଡ଼ି ଗୁଡ଼ିକୁ ରାସ୍ତାରୁ ହଟାଇବାକୁ ସରକାର ଦେଇଥିବା ନିର୍ଦ୍ଦେଶକୁ ଆମେ ବିରୋଧ କରୁଛି। ଏହି ଅବଧିକୁ ୨୦ ବର୍ଷକୁ ବୃଦ୍ଧି କରିବାକୁ ଆମେ ଦାବି କରୁଛୁ। ଏହା ସମେତ ମୋଟ ୫ ଦଫା ଦାବି ସଂପର୍କରେ ଆମେ ରାଜ୍ୟ ସରକାରଙ୍କୁ ଅବଗତ କରାଇଛୁ। କିନ୍ତୁ ଏ ସଂପର୍କରେ ରାଜ୍ୟ ସରକାର ଅଦ୍ୟାବଧି କିଛି ନିଷ୍ପତ୍ତି ନେଇ ନାହାନ୍ତି।
ସେ ଆହୁରି କହିଛନ୍ତି, ମୁଖ୍ୟତଃ ପ୍ରଦୂଷଣ ରୋକିବାକୁ ସରକାର ୧୫ ବର୍ଷ ଅତିକ୍ରମ କରିସାରିଥିବା ଗାଡ଼ିଗୁଡ଼ିକୁ ହଟାଇବାକୁ କହୁଛନ୍ତି। ଏପରି ହେଲେ ବହୁତ ଘରୋଇ ଗାଡ଼ି ରାସ୍ତାରୁ ହଟିବ। ଏହା ସହିତ ବ୍ୟବସାୟିକ ଗାଡ଼ି ମଧ୍ୟ ହଟିବ। ଫଳରେ ବହୁ ଲୋକଙ୍କ ଜୀବନଜୀବିକା ପ୍ରଭାବିତ ହେବ। ଆମର କହିବା କଥା ପ୍ରଦୂଷଣ କ’ଣ କେବଳ ଅନ୍ୟାନ୍ୟ ଗାଡ଼ି ବା ଟ୍ରକ୍ରୁ ହେଉଛି କି? ଶିଳ୍ପକାରଖାନାରୁ ୪୫ ପ୍ରତିଶତ ପ୍ରଦୂଷଣ ହେଉଛି। ଟ୍ରକ୍ରେ ପ୍ରଦୂଷଣ ହେଉଛି ତା’ ଇଞ୍ଜିନରୁ। ତେଣୁ ଆମେ ପ୍ରସ୍ତାବ ଦେଇଥିଲୁ ଆମକୁ ନୂଆ ଇଞ୍ଜିନ ଲଗାଇବାକୁ ଅନୁମତି ଦିଆଯାଉ। ଫଳରେ ପ୍ରଦୂଷଣ ହେବ ନାହିଁ। ଟ୍ରକ୍ ଡାଲା ବା ବଡିରୁ କ’ଣ ପ୍ରଦୂଷଣ ହୁଏ? ଆମର ଏହିଭଳି ବହୁ ପ୍ରକାର ପ୍ରସ୍ତାବକୁ ସରକାର ଗ୍ରହଣ କରୁ ନାହାନ୍ତି। ଏହା ବାଦ୍ ଆମର ଆହୁରି ଅନେକ ସମସ୍ୟା ରହିଛି। କିନ୍ତୁ ସରକାର କିଛି କର୍ଣ୍ଣପାତ କରୁ ନାହାନ୍ତି। ଆମକୁ ଆଲୋଚନା ପାଇଁ ଡାକୁ ନାହାନ୍ତି। ସରକାର ଆମ ଦାବି ପ୍ରତି ଦୃଷ୍ଟି ନଦେଲେ ଆସନ୍ତା ୧୧ ତାରିଖ ମଧ୍ୟରାତ୍ରୀରୁ ନିଶ୍ଚିତ ଭାବେ ଟ୍ରକ୍ ଚଳାଚଳ ବନ୍ଦ କରି ଦିଆଯିବ ବୋଲି ରାଜ୍ୟ ଟ୍ରକ୍ ମାଲିକ ସଂଘ ସଭାପତି ବିଭୂତି ପ୍ରସାଦ ଦାସ କହିଛନ୍ତି।
ରାଜ୍ୟ ଟ୍ରକ୍ ମାଲିକ ସଂଘର ଏହି ଧର୍ମଘଟ ଡାକରାକୁ ଅଲ୍ ଇଣ୍ଡିଆ ମୋଟର ଟ୍ରାନ୍ସପୋର୍ଟ କଂଗ୍ରେସ (AIMTC) ସମର୍ଥନ ଜଣାଇଥିବା କହିଛନ୍ତି ରାଜ୍ୟ ଟ୍ରକ୍ ମାଲିକ ସଂଘର ସଭାପତି ଶ୍ରୀ ଦାସ କହିଛନ୍ତି।
ରାଜ୍ୟ ଟ୍ରକ୍ ମାଲିକ ସଂଘ ପକ୍ଷରୁ ଗତ ଡିସେମ୍ବର ୧୧ ତାରିଖରେ ସରକାରଙ୍କୁ ୫ ଦଫା ସମ୍ବଳିଦ ଦାବିପତ୍ର ଦିଆଯାଇ ଡିସେମ୍ବର ୩୧ ସୁଦ୍ଧା ତା’ର ସମାଧାନ କରିବାକୁ କୁହାଯାଇଥିଲା। ହେଲେ ସରକାର ସେମାନଙ୍କ ଦାବି ପ୍ରତି ଦୃଷ୍ଟି ଦେଇ ନଥିବା ବେଳେ ଆଲୋଚନା ପାଇଁ ମଧ୍ୟ ଡାକି ନାହାନ୍ତି। ସଂଘର ଦାବି ଗୁଡ଼ିକ ମଧ୍ୟରେ ରହିଛି- ମୋଟର ଯାନ ନିୟମ ଧାରା ୬୭ ଅନୁଯାୟୀ ଭଡ଼ା ଧାର୍ଯ୍ୟ କରିବା ଓ ନୂଆ ଗାଡ଼ି କିଣିଲେ ୧୦ ବର୍ଷ ପର୍ଯ୍ୟନ୍ତ ରୋଡ୍ ଟାକ୍ସରେ ୨୫ ପ୍ରତିଶତ ରିହାତି ଦେବା।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
