ଏମ୍‌ସ ପ୍ରତିଷ୍ଠା ଦିବସରେ ବିଜେଡି କର୍ମୀଙ୍କ ହଂଗାମା, ୭ ଅଟକ

ବାଲେଶ୍ୱର(ରଞ୍ଜିତ ପାକଳ): ବାଲେଶ୍ୱର ଆଇଟିଆର୍‌ କଲୋନିରେ ଚାଲିଥିବା ଏମ୍‌ସର ସପ୍ତମ ପ୍ରତିଷ୍ଠା ଦିବସ ପାଳିତ ହୋଇଯାଇଛି। ଏଥିରେ ମୁଖ୍ୟଅତିଥି ଭାବେ କେନ୍ଦ୍ରମନ୍ତ୍ରୀ ତଥା ସ୍ଥାନୀୟ ସାଂସଦ ପ୍ରତାପ ଚନ୍ଦ୍ର ଷଡଙ୍ଗୀ ଯୋଗଦେଇଥିଲେ। ସମ୍ମାନିତ ଅତିଥିଭାବେ ଏମ୍ସର ନିର୍ଦ୍ଦେଶକ ଡାକ୍ତର ଗୀତାଞ୍ଜଳି ବି. ଏବଂ ଆଇଟିଆର୍‌ର ନିର୍ଦ୍ଦେଶକ ବିନୟ କୁମାର ଦାଶ ପ୍ରମୁଖ ଯୋଗଦେଇଥିଲେ। ସଭା ଆରମ୍ଭ ହେବାର କିଛି ସମୟ ପରେ ବିଜେଡି କର୍ମୀମାନେ ଉଚ୍ଚସ୍ୱରରେ ନାରାବାଜି କରିଥିଲେ। ସଭାକୁ ରେମୁଣା ବିଧାୟକଙ୍କୁ କାହିଁକି ନିମନ୍ତ୍ରଣ କରାଯାଇନାହିଁ ବୋଲି ପ୍ରଶ୍ନ କରି ବିଜେଡି କର୍ମୀମାନେ ହୋହଲ୍ଲା କରିଥିଲେ। ପୁଲିସ ସେମାନଙ୍କ ଭିତରୁ ୭ ଜଣଙ୍କୁ ଅଟକ ରଖିଛି।

ଏମସ ପ୍ରତିଷ୍ଠା ଉତ୍ସବ ଅବସରରେ ଆଜି ମେଗା ସ୍ୱାସ୍ଥ୍ୟ ଶିବିର ଅନୁଷ୍ଠିତ ହୋଇଛି। ଏଥିରେ ୧୪ଟି ବିଭାଗର ୬୦ରୁ ଅଧିକ ବିଶେଷଜ୍ଞ ଡାକ୍ତରମାନେ ଯୋଗଦେଇ ଦୂରଦୂରାନ୍ତରୁ ଆସୁଥିବା ରୋଗୀଙ୍କ ସ୍ୱାସ୍ଥ୍ୟ ପରୀକ୍ଷା କରିଛନ୍ତି।