ଭୁବନେଶ୍ୱର(ଓଡ଼ିଶା ରିପୋର୍ଟର): ଭାରତୀୟ ସଂସ୍କୃତି ଓ ପରମ୍ପରାର ଏକ ମହାନ ନିଦର୍ଶନ ହେଉଛି ରକ୍ଷା ବନ୍ଧନ। ଭାଇଠୁ ସୁରକ୍ଷାର ପ୍ରତିଶ୍ରୁତି ନେଇ ସ୍ନେହ ଆଉ ଶ୍ରଦ୍ଧାରେ ଭାଇ ହାତରେ ଭଉଣୀ ବାନ୍ଧିଥାଏ ରାକ୍ଷୀ। କେବଳ ଭାଇ-ଭଉଣୀ ନୁହେଁ, ସଂପର୍କର ଏହି ଡୋର ପ୍ରଧାନମନ୍ତ୍ରୀଙ୍କଠୁ ନେଇ ସୀମାରେ ମୁତୟନ ଯବାନଙ୍କୁ ମଧ୍ୟ ବାନ୍ଧିଦେଇଛି ସ୍ନେହ-ସଦିଚ୍ଛାର ବନ୍ଧନରେ।
ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ)ରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ରାକ୍ଷୀ ବାନ୍ଧିଛନ୍ତି କୁନି କୁନି ପିଲା। ପଞ୍ଜାବର ଅଟାରୀ-ଓ୍ୱାଘା ବର୍ଡରରେ ବିଏସ୍ଏଫ୍ ଯବାନଙ୍କ ହାତରେ ସୁରକ୍ଷାର କବଚ ବାନ୍ଧିଛନ୍ତି ବହୁ ଛାତ୍ରଛାତ୍ରୀ ଓ ମହିଳା।
ସେହିପରି ଓଡ଼ିଶା ରାଜଭବନରେ ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କ ହାତରେ ରାକ୍ଷୀ ବାନ୍ଧିଛନ୍ତି ସ୍କୁଲ ଛାତ୍ରୀ।
ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହାତରେ ମଧ୍ୟ ସ୍କୁଲ ଛାତ୍ରୀ ଓ ପ୍ରଜାପତି ବ୍ରହ୍ମକୁମାରୀ ଈଶ୍ୱରୀୟ ବିଶ୍ୱବିଦ୍ୟାଳୟର ଭଉଣୀମାନେ ରାକ୍ଷୀ ବାନ୍ଧିଛନ୍ତି।
ରକ୍ଷା ବନ୍ଧନ ଏକ ପବିତ୍ର ବନ୍ଧନ। ସାଢ଼େ ଚାରି କୋଟି ଓଡ଼ିଶାବାସୀ ମୋ ପରିବାର। ପବିତ୍ର ରାଖୀ ପୂର୍ଣ୍ଣିମା ଅବସରରେ ବିଭିନ୍ନ କ୍ଷେତ୍ରରୁ ଆସିଥିବା ଭଉଣୀମାନଙ୍କ ଠାରୁ ରାଖୀ ବାନ୍ଧି ମୁଁ ଅତ୍ୟନ୍ତ ଆନନ୍ଦିତ। ସମସ୍ତଙ୍କ ସୁଖ, ସମୃଦ୍ଧି କାମନା କରୁଛି। pic.twitter.com/onU2YmeSD2
— Naveen Patnaik (@Naveen_Odisha) August 15, 2019
ଏହି ଅବସରରେ ଟ୍ୱିଟ୍ କରି ମୁଖ୍ୟମନ୍ତ୍ରୀ ଲେଖିଛନ୍ତି-“ବନ୍ଧନ ଏକ ପବିତ୍ର ବନ୍ଧନ। ସାଢ଼େ ଚାରି କୋଟି ଓଡ଼ିଶାବାସୀ ମୋ ପରିବାର। ପବିତ୍ର ରାକ୍ଷୀ ପୂର୍ଣ୍ଣିମା ଅବସରରେ ବିଭିନ୍ନ କ୍ଷେତ୍ରରୁ ଆସିଥିବା ଭଉଣୀମାନଙ୍କଠାରୁ ରାଖୀ ବାନ୍ଧି ମୁଁ ଅତ୍ୟନ୍ତ ଆନନ୍ଦିତ। ସମସ୍ତଙ୍କ ସୁଖ ଓ ସମୃଦ୍ଧି କାମନା କରୁଛି।”
ଆଜି ଶ୍ରୀମନ୍ଦିରରେ ଦୁଇ ଭାଇ ଜଗା ଓ ବଳିଆଙ୍କ ହାତରେ ରାକ୍ଷୀ ବାନ୍ଧିଛନ୍ତି ଭଉଣୀ ସୁଭଦ୍ରା। ସକାଳ ଧୂପ ଓ ଭୋଗମଣ୍ଡପ ପରେ ବାସୁଙ୍ଗାପାଟରେ ନିର୍ମିତ ଜଗତର ସବୁଠାରୁ ବଡ଼ ଓ ଆକର୍ଷଣୀୟ ରାକ୍ଷୀ ବାନ୍ଧିଥିଲେ ଦୁଇ ଭାଇ। ଏଥିସହ ଆଜି ଗହ୍ମା ପୂର୍ଣ୍ଣମୀ ଓ ବଳଭଦ୍ରଙ୍କ ଜନ୍ମତିଥି ଥିବାରୁ ମାର୍କଣ୍ଡେୟ ପୁଷ୍କରଣୀର ଗହ୍ମାବେଦୀରେ ମହାପ୍ରଭୁ ବଳଭଦ୍ରଙ୍କ ଜନ୍ମନୀତି ମଧ୍ୟ ସମ୍ପନ୍ନ ହୋଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
