ଏମିତି ଆମ ବଡ଼ ମେଡିକାଲ: ରୋଗୀଙ୍କୁ ପଠାଇ ଦେଲେ ଘରୋଇ ହସ୍ପିଟାଲ

କଟକ (ଓଡିଶା ରିପୋର୍ଟର): କଟକ ଏସ୍‌ସିବିକୁ ଆସିଲେ ଭଲ ଚିକିତ୍ସା ମିଳିବ, ଭଲ ଡାକ୍ତର ଚିକିତ୍ସା କରିବେ ଏହା ସମସ୍ତେ ଆଶା ରଖିଥାନ୍ତି। ହେଲେ ଏଠାରେ କିନ୍ତୁ ସବୁ ଓଲଟା ଦେଖିବାକୁ ମିଳିଥାଏ। ଏସ୍‌ସିବି ନାଁରେ ଆସିଥିବା ଏକ ଅଭିଯୋଗରୁ ତ ଏମିତି ଲାଗୁଛି। ଏଠାରେ ଅପରେସନ ପରେ ଗୁରୁତର ହୋଇପଡ଼ିଥିବା ରୋଗୀଙ୍କୁ ଚିକିତ୍ସା କରାଯିବା ବଦଳରେ ଘରୋଇ ହସ୍ପିଟାକୁ ଯିବାକୁ ଡାକ୍ତର ପରାମର୍ଶ ଦେଉଥିବା ଅଭିଯୋଗ ଆସିଛି।

ବଡ଼ ମେଡିକାଲରେ ଜଣେ ମହିଳାଙ୍କ ମୋତିଆବିନ୍ଦୁ ଅପରେସନ ହୋଇଥିଲା। ଅପରେସନ୍ ପରେ ରୋଗୀଙ୍କୁ ସଂକ୍ରମଣ ହୋଇଥିବା ଅଭିଯୋଗ ହୋଇଛି। ଏନେଇ ରୋଗୀ ଡାକ୍ତରଙ୍କୁ ଜଣାଇଥିଲେ। ହେଲେ ଡାକ୍ତର ଜଣଙ୍କ ଚିକିତ୍ସା କରିବା ବଦଳରେ ଏକ ଘରୋଇ ହସ୍ପିଟାଲକୁ ଯିବା ପାଇଁ ପରାମର୍ଶ ଦେଇଥିଲେ।

ସୂଚନାଯୋଗ୍ୟ, ଗତ ୮ ତାରିଖରେ ଏସ୍‌ସିବିରେ ୧୨ ଜଣଙ୍କର ମୋତିଆବିନ୍ଦୁ ଅପରେସନ ହୋଇଥିଲା। ଏବେ ଏମାନଙ୍କ ମଧ୍ୟରୁ ୭ ଜଣ ଏକ ଘରୋଇ ଚକ୍ଷୁ ଚିକିତ୍ସାଳୟରେ ଚିକିତ୍ସିତ ହେଉଛନ୍ତି। ଗୁରୁତ୍ୱପୂର୍ଣ୍ଣ କଥା ହେଲା ୭ ଜଣଙ୍କ ମଧ୍ୟରୁ ୫ ଜଣ ଗୁରୁତର ଅଛନ୍ତି। ଏଥିରୁ ଜଣା ପଡୁଛି ବଡ଼ ମେଡିକାଲର ବଡ଼ ବାବୁମାନେ ଏହି ରୋଗୀଙ୍କ ଅପରେସନ କିଭଳି କରିଛନ୍ତି।

ଅଭିଯୋଗ ଆସିବା ପରେ ପ୍ରତିକ୍ରିୟା ରଖିଛନ୍ତି, ଏସ୍‌ସିବି ଅଧିକ୍ଷକ ଶ୍ୟାମା କାନୁନ୍‌ଗୋ। ଏପରି ଘଟଣା ଦୁର୍ଭାଗ୍ୟଜନକ ଓ ଏହାର ତଦନ୍ତ ହେବ ବୋଲି ସେ କହିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।