ଅନିଶ୍ଚିତତା ଭିତରେ ପୌର ନିର୍ବାଚନ: ସଂରକ୍ଷଣକୁ ୫୦% ଭିତରେ ରଖିବାକୁ ହାଇକୋର୍ଟଙ୍କ ନିର୍ଦ୍ଦେଶ

<p>ଭୁବନେଶ୍ୱର (ଓଡ଼ିଶା ରିପୋର୍ଟର): ଅନିଶ୍ଚିତତା ଭିତରକୁ ଠେଲି ହୋଇଯାଇଛି ରାଜ୍ୟର ପୌର ନିର୍ବାଚନ। ସଂରକ୍ଷଣ ପାଇଁ ଥିବା ବ୍ୟବସ୍ଥାରେ ହେବ ପରିବର୍ତ୍ତନ। କମିବ ପଛୁଆ ବର୍ଗଙ୍କ ପାଇଁ ସିଟ୍&zwnj;ରେ ସଂରକ୍ଷଣ। ଏପରି ରାୟ ହାଇକୋର୍ଟ ଦେଇଛନ୍ତି।</p><p>ରାୟରେ ଉଲ୍ଲେଖ ରହିଛି, ପୌର ନିର୍ବାଚନରେ ଆସନ ସଂରକ୍ଷଣ ୫୦ ପ୍ରତିଶତରୁ ଅଧିକ ହେବନି। ସିଡ୍ୟୁଲ ଏରିଆ ବ୍ୟତୀତ ରାଜ୍ୟର ଅନ୍ୟ ସମସ୍ତ ଅଞ୍ଚଳ ପାଇଁ ଏହି ସବୁ ବ୍ୟବସ୍ଥା ରହିବ। ସେପଟେ ସେପ୍ଟେମ୍ବରରେ କାର୍ଯ୍ୟକାଳ ସରୁଥିବା ୬୬ ଟି ପୌର ପରିଷଦ ପାଇଁ ଓ୍ୱାର୍ଡ ପୁନର୍ଗଠନ ଓ&nbsp; ସଂରକ୍ଷଣ ପ୍ରକ୍ରିୟା ଶେଷ ପର୍ଯ୍ୟାୟରେ ଥିବା ବେଳେ ଏବେ କୋର୍ଟଙ୍କ ନିର୍ଦ୍ଦେଶ ଏଥିରେ କେଁ ପୁରାଇଛି। ଓବିସି ବା ପଛୁଆ ବର୍ଗଙ୍କ ପାଇଁ ପୂର୍ବରୁ ୨୭ ପ୍ରତିଶତ ଆସନ ସଂରକ୍ଷଣ ରହୁଥିବା ବେଳେ ଏବେ ଏହା ୧୧ ପ୍ରତିଶତ ମଧ୍ୟରେ ରହିବ। ଫଳରେ ଶେଷ ହୋଇଥିବା ଓ୍ୱାର୍ଡରେ ଆସନ ସଂରକ୍ଷଣ ପାଇଁ ସରକାରଙ୍କୁ ପୁଣିଥରେ ବଡ଼ କସରତ କରିବାକୁ ପଡିବ। ହାଇକୋର୍ଟଙ୍କ ଏହି ନିର୍ଦ୍ଦେଶକୁ ନଗର ଉନ୍ନୟନ ବିଭାଗ ତର୍ଜମା କରୁଛି।</p><p>ପୂର୍ବରୁ ୨୦୧୨ର ପଞ୍ଚାୟତ ନିର୍ବାଚନ, ୨୦୧୩ର ପୌର ନିର୍ବାଚନ ଓ ୨୦୧୭ର ପଞ୍ଚାୟତ ନିର୍ବାଚନରେ ପଛୁଆ ବର୍ଗଙ୍କ ପାଇଁ ୨୭ ପ୍ରତିଶତ ଆସନ ସଂରକ୍ଷଣ ଥିଲା। ରାଜ୍ୟରେ ପୌର ଓ ପଞ୍ଚାୟତ ନିର୍ବାଚନରେ ସମୁଦାୟ ସଂରକ୍ଷଣ ୬୬ ପ୍ରତିଶତ ରହିଛି। କିନ୍ତୁ ଏହି ବ୍ୟବସ୍ଥା ସୁପ୍ରିମକୋର୍ଟଙ୍କ ୨୦୧୦ର ରାୟକୁ ଉଲ୍ଲଘଂନ କରୁଛି ବୋଲି ହାଇକୋର୍ଟରେ ପାଖପାଖି ୧୦୦ ଟି ଜନସ୍ୱାର୍ଥ ମାମଲା ଦାୟର ହୋଇଥିଲା। ଏବେ ହାଇକୋର୍ଟଙ୍କ ରାୟ ଆସିବା ପରେ ସରକାରଙ୍କୁ ସମାଲୋଚନା କରିଛନ୍ତି ବିରୋଧୀ।</p><p>ପିସିସି କୋର କମିଟି ଅଧ୍ୟକ୍ଷ ଜୟଦେବ ଜେନା କହିଛନ୍ତି-&ldquo;ରାଜ୍ୟ ସରକାର ଦ୍ୱନ୍ଦ୍ୱ ସୃଷ୍ଟି କରି ନିର୍ବାଚନକୁ ଘୁଞ୍ଚାଇବାକୁ ଚେଷ୍ଟା କରିଛନ୍ତି। କିନ୍ତୁ ଏଥିରେ ସଫଳ ହେବେନି। ବର୍ତ୍ତମାନ ଲୋକେ ବିଜେଡିଠାରୁ ଦୂରେଇ ଯାଇଛନ୍ତି। ଆସନ୍ତା ନିର୍ବାଚନରେ ଦଳକୁ ସଫଳତା ମିଳିବ ନାହିଁ। ଏଥିରୁ ବର୍ତ୍ତିବା ପାଇଁ ବିଜେଡି ଚକ୍ରାନ୍ତ କରୁଛି।&rdquo;</p><p>ବିଜେପି ମୁଖପାତ୍ର ପୀତାମ୍ବର ଆଚାର୍ଯ୍ୟ କହିଛନ୍ତି-&ldquo;ଓଡ଼ିଶା ସରକାରଙ୍କ ଖାମ୍&zwnj;ଖିଆଲ୍&zwnj; ମନୋଭାବ ଯୋଗୁଁ ଏପରି ଜଜ୍&zwnj;ମେଣ୍ଟ ଆସିଛି। ଏହାଦ୍ୱାରା ଓବିସିମାନେ ପାଉଥିବା ୨୭ ପ୍ରତିଶତ ସଂରକ୍ଷଣର ବ୍ୟବସ୍ଥାରୁ ବଞ୍ଚିତ ହେବେ।&rdquo;</p><p>ବିଜେଡି ମୁଖପାତ୍ର ଅମର ପ୍ରସାଦ ଶତପଥୀ କହିଛନ୍ତି-&ldquo;ନବୀନ ପଟ୍ଟନାୟକ କୌଣସି ନିର୍ବାଚନକୁ ସାମ୍ନା କରିବାକୁ ପଛାଇ ନାହାନ୍ତି। ହାଇକୋର୍ଟଙ୍କ ଜଜ୍&zwnj;ମେଣ୍ଟକୁ ତର୍ଜମା କରାଯିବ।&rdquo;</p>

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।