ପଟ୍ଟାମୁଣ୍ଡାଇ (ଓଡ଼ିଶା ରିପୋର୍ଟର): ପୋଖରୀରରେ ବୁଡ଼ି ପ୍ରାଣ ହରାଇଛନ୍ତି ୩ ଜଣ ନାବାଳକ। ଏହି ଦୁଃଖଦ ଘଟଣା ଘଟିଛି କେନ୍ଦ୍ରାପଡ଼ା ଜିଲ୍ଲା ରାଜନଗର ବ୍ଳକ୍ ବାଗପାଟିଆ ଗାଁରେ।
ମୃତକମାନେ ହେଉଛନ୍ତି- ବିଶାଳ ରାଜ ରାଉତ, ସମ୍ବିତ ସାହୁ ଓ ବ୍ରିଭେନ ପରିଡ଼ା। ସେମାନେ ସମସ୍ତେ ସପ୍ତମ ଶ୍ରେଣୀରେ ପଢ଼ୁଥିଲେ। ସେମାନେ ସମସ୍ତେ ସେମାନଙ୍କ ବାପାମା’ଙ୍କର ଗୋଟିଏ ଲେଖାଏଁ ପୁଅ ଥିଲେ।
ଆଜି ଅପରାହ୍ଣ ପ୍ରାୟ ଗୋଟାଏ ବେଳେ ଏହି ଘଟଣା ଘଟିଛି। ଏହି ପିଲାମାନେ ଗାଁ ପୋଖରୀକୁ ଗାଧୋଇବାକୁ ଯାଇଥିବା ବେଳେ ବୁଡ଼ି ଯାଇଥିଲେ। ସେମାନଙ୍କ ସହିତ ଆଉ କିଛି ପିଲା ମଧ୍ୟ ଥିଲେ। ସେମାନେ ଡାକ ପକାଇବାରୁ ଗାଁ ଲୋକେ ବୁଡ଼ି ଯାଇଥିବା ୩ ନାବାଳକଙ୍କୁ ଉଦ୍ଧାର କରିଥିଲେ।
ଉଦ୍ଧାର କରାଯିବା ପରେ ଏହି ପିଲାମାନଙ୍କୁ ପ୍ରଥମେ ଗୁପ୍ତି ଡାକ୍ତରଖାନାରେ ଭର୍ତ୍ତି କରାଯାଇଥିଲା। ସେଠାରୁ ସେମାନଙ୍କୁ ରାଜନଗର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନିଆଯାଇଥିଲା। ତେବେ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ବ୍ୟବଚ୍ଛେଦ ପାଇଁ ସେମାନଙ୍କ ମୃତଦେହକୁ ଆଳି ପଠାଯାଇଛି।
ସୂଚନା ଅନୁଯାୟୀ, ଏହି ତିନି ନାବାଳକ ଗାଧୋଇଲା ବେଳେ ପୋଖରୀରେ ଟିକେ ଅଧିକ ବାଟ ଚାଲି ଯାଇଥିଲେ ଓ ଆଉ ଫେରି ପାରି ନଥିଲେ। ପୁଲିସ୍ ରାଜନଗର ହସ୍ପିଟାଲ୍ରେ ପହଞ୍ଚି ଘଟଣାର ଯାଞ୍ଚ କରୁଛି। ଏହି ଘଟଣାକୁ ନେଇ ପୂରା ରାଜନଗର ଅଞ୍ଚଳରେ ଶୋକର ଛାୟା ଖେଳିଯାଇଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
