ସ୍କୁଲ ଅଟୋକୁ ପିଟିଲା ଟ୍ରକ୍‌

କାମାକ୍ଷାନଗର(ବିଦ୍ୟାଧର ବରାଳ): ଢେଙ୍କାନାଳ ଜିଲ୍ଲା କାମାକ୍ଷାନଗର ଥାନା ଆଳତୁମା ଛକ ନିକଟରେ ଆଜି ଏକ ଦୁର୍ଘଟଣା ଘଟିଛି। କାମାକ୍ଷାନଗର ଶ୍ରୀମା ଅରବିନ୍ଦ ବିଦ୍ୟାଳୟକୁ ଯାଉଥିବା ଏକ ସ୍କୁଲ ଅଟୋକୁ ଏକ ଟ୍ରକ୍‌ ପିଟିଦେଇଥିବା ଜଣାଯାଇଛି। ସୌଭାଗ୍ୟବଶଃତ ଏହି ଦୁର୍ଘଟଣାରେ କେହି ମୃତାହତ ହୋଇ ନ ଥିବା ବେଳେ ଅଳ୍ପକେ ବର୍ତ୍ତିଲେ ୧୪ ଛାତ୍ରଛାତ୍ରୀ । ଏହି  ଦୁର୍ଘଟଣାରେ ୩ ଛାତ୍ରଛାତ୍ରୀ ସାମାନ୍ୟ ଆହତ ହୋଇଛନ୍ତି।

କାମାକ୍ଷାନଗର ଥାନା ଆଳତୁମା ଛକ ନିକଟରେ ବିନା କୌଣସି ସୂଚନାରେ ଟ୍ରକ୍‌ଟି ପଛକୁ ଫେରୁଥିଲା। ଏହି ସମୟରେ ଦ୍ରୁତ ଗତିରେ ଯାଉଥିବା ଅଟୋର ସମ୍ମୁଖ ଭାଗ ସହ ଟ୍ରକ୍‌ଟି ପିଟି ହୋଇଥିଲା। ଦୁର୍ଘଟଣାରେ ଅଟୋ ଚାଳକ ଓ ୩ ଛାତ୍ରଛାତ୍ରୀ ଆହତ ହୋଇଛନ୍ତି । ଘଟଣାସ୍ଥଳରୁ ଅଟୋ ଚାଳକ ଫେରାର ହୋଇଯାଇଥିବା ବେଳେ ଟ୍ରକ୍‌ ସହ ଡ୍ରାଇଭର ମଧ୍ୟ ଫେରାର ହୋଇଯାଇଛନ୍ତି। ସ୍ଥାନୀୟ ଲୋକେ ତୁରନ୍ତ ପିଲାମାନଙ୍କୁ ଉଦ୍ଧାର କରି କାମାକ୍ଷାନଗର ମେଡିକାଲରେ ଭର୍ତ୍ତି କରିଥିଲେ। ସେଠାରେ ପ୍ରାଥମିକ ଚିକିତ୍ସା ପରେ ସେମାନେ ଘରକୁ ଫେରିଯାଇଥିବା ଜଣାଯାଇଛି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।