ପ୍ରଦୂଷଣ ବଳୟରେ କଳାହୀରାର ସହର ବ୍ରଜରାଜନଗର

ଝାରସୁଗୁଡ଼ା: କଳାହୀରାର ସହର ଭାବେ ପରିଚିତ ଝାରସୁଗୁଡା ଜିଲ୍ଲାର ବ୍ରଜରାଜନଗର ଏବେ ପ୍ରଦୂଷଣ ବଳୟ ମଧ୍ୟରେ। ଜିଲ୍ଲା ପ୍ରଶାସନର ଖାମଖିଆଲ ମନୋଭାବ ଓ ଏମସିଏଲର ଅବହେଳା ଯୋଗୁ ସହରର ଲୋକେ ପ୍ରଦୂଷଣକୁ ନେଇ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି । ପ୍ରଦୂଷଣ ନିୟନ୍ତ୍ରଣ ଲାଗି ବିଭିନ୍ନ ସ୍ତରରୁ ଦାବି ହେଉଛି । ମହିଳାମାନେ ରାଜରାସ୍ତାକୁ ଓହ୍ଲାଉଛନ୍ତି । ହେଲେ କେବଳ ପ୍ରତିଶ୍ରୁତି ଛଡ଼ା ଆଉ କିଛି ମିଳୁନାହିଁ । ଏପରି କି ବ୍ରଜରାଜନଗର ପୌର ପରିଷଦ ଅଞ୍ଚଳରେ ସ୍ଥିତି ଦିନକୁ ଦିନ ଜଟିଳ ହେବାରେ ଲାଗିଛି । କୋଇଲା ପରିବହନ ହେଉଥିବା ଟ୍ରକ, ଡମ୍ଫର ଗୁଡିକରେ ତାରପୋଲିନ ଢଙ୍କା ଯାଉ ନ ଥିବାରୁ କୋଇଲା ଗୁଣ୍ଡ ଉଡି ବାୟୁ ପ୍ରଦୂଷଣ କରୁଛି । ଏହାସହ ଜଳାଶୟଗୁଡିକରେ କୋଇଲା ଆସ୍ତରଣ ଜମି ପାଣି ସମ୍ପୂର୍ଣ୍ଣ କଳା ହୋଇଯାଇଛି ।

ବ୍ରଜରାଜନଗରରେ ଏମସିଏଲର ଦୁଇଟି କୋଇଲା କ୍ଷେତ୍ର ଇବଭାଲି ଓ ଓରିଏଣ୍ଟ ରହିଛି । ଇବଭାଲି ଖୋଲାମୁହଁ କୋଇଲା ଖଣି ହୋଇଥିବା ବେଳେ ଓରିଏଣ୍ଟ ଭୂତଳ କୋଇଲା ଖଣି । ଓରିଏଣ୍ଟ କ୍ଷେତ୍ରରେ ୧, ୨, ୩ ଓ ୪ ନମ୍ବର, ରାମପୁର ଏବଂ ବୁନ୍ଦିଆ ଭୂତଳ ଖଣି ରହିଛି । ରାମପୁର ଖଣି ବନ୍ଦ ହୋଇଯାଇଥିବା ବେଳେ ଅନ୍ୟ ୫ଟି କାର୍ଯ୍ୟକ୍ଷମ ଅଛି । ଖୋଲାମୁହଁ କୋଇଲା ଖଣି ମଧ୍ୟରୁ ଗୋଟିଏ ସମଲେଶ୍ୱରୀ ଖଣି ହୋଇଥିବା ବେଳେ ଅନ୍ୟଟି ଲଜକୁରା ଖଣି । ଏହି ଖଣିଗୁଡିକରୁ କୋଇଲା ଉତ୍ତୋଳନ ପରେ ନିଜସ୍ୱ ସାଇଡିଂକୁ ଟ୍ରକ, ଡମ୍ଫରରେ ପରିବହନ କରାଯାଇଥାଏ । ଏହାସହ ବିଭିନ୍ନ ସ୍ଥାନକୁ ସିଧାସଳଖ ରୋଡ ସେଲ୍ କରାଯାଇଥାଏ । ଫଳରେ ପ୍ରତିଦିନ ଶହ ଶହ ଗାଡି ଏଥିରେ ନିୟୋଜିତ ହୋଇଥାନ୍ତି । ତେବେ କୋଇଲା ପରିବହନ ବେଳେ ପ୍ରଦୂଷଣ ନିୟନ୍ତ୍ରଣ ଲାଗି ଅବାଶ୍ୟକ ବ୍ୟବସ୍ଥା କରାଯାଉନାହିଁ । ଗାଡିରେ ଓଭର ଲୋଡ କୋଇଲା ନିଆଯାଉଥିବା ବେଳେ ଗାଡି ଉପରେ ତାରପୋଲିନ ପକାଯାଉ ନାହିଁ । ଫଳରେ କୋଇଲା ଗୁଣ୍ଡ ରାସ୍ତାରେ ପଡିବା ସହ ଉଡି ବାୟୁ ପ୍ରଦୂଷଣ କରୁଛି। ସେହିପରି କୋଇଲା ପରିବହନ ଲାଗି କୌଣସି ନିର୍ଦ୍ଦିଷ୍ଟ ସମୟ ସୀମା ରଖାଯାଇନାହିଁ। ୨୪ ଘଣ୍ଟା କୋଇଲା ପରିବହନ ହେଉଥିବାରୁ ଟ୍ରାଫିକ ସମସ୍ୟା ଦେଖାଦେଉଛି ।

jharsugudacoal

ଏମସିଏଲ କର୍ତ୍ତୃପକ୍ଷ ଅଞ୍ଚଳରୁ କୋଇଲା ଉତ୍ତୋଳନ କରି ବାର୍ଷିକ ଶହ ଶହ କୋଟି ଟଙ୍କା ଲାଭ କରୁଥିଲେ ମଧ୍ୟ ପ୍ରଦୂଷଣ ନିୟନ୍ତ୍ରଣ ଦିଗ ପ୍ରତି ଆଖି ବୁଜି ଦେଇଥିବା ଅଭିଯୋଗ ହେଉଛି । ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡ ତରଫରୁ ଜିଲ୍ଲା ପ୍ରଶାସନ ଉପସ୍ଥିତିରେ ବ୍ରଜରାଜନଗରର ବିଭିନ୍ନ ସ୍ଥାନରେ ଜନଶୁଣାଣି ଶିବିର କରାଯାଉଛି । ଶିବିରରେ ଜନସାଧାରଣ ପ୍ରଦୂଷଣକୁ ନେଇ ଅଭିଯୋଗ କଲେ ପ୍ରଶାସନିକ ଅଧିକାରୀମାନେ ବିଭାଗୀୟ ଅଧିକାରୀ ଓ ସମ୍ପୃକ୍ତ ସଂସ୍ଥାର କର୍ମକର୍ତ୍ତାଙ୍କୁ ରାସ୍ତା ସଫା ରଖିବା, ଓଭର ଲୋଡିଂ ଗାଡି ନ ଛାଡିବାକୁ ନିର୍ଦ୍ଦେଶ ଦେଉଛନ୍ତି । ହେଲେ ଏହା କେବେ କାର୍ଯ୍ୟକାରୀ ହେଉନାହିଁ । ତାରପୋଲିନ ନ ଢାଙ୍କିଲେ ସହର ମଧ୍ୟରେ ଯାଇଥିବା ରାସ୍ତାରେ ଯିବାକୁ ଗେଟପାସ ମିଳିବ ନାହିଁ ବୋଲି ପ୍ରଶାସନିକ ଅଧିକାରୀମାନେ କହୁଛନ୍ତି । ମାତ୍ର ସହର ମଧ୍ୟରେ ପ୍ରତିଦିନ ଶତାଧିକ ଟ୍ରକ, ଡମ୍ଫର ବିନା ତାରପୋଲିନରେ କୋଇଲା ପରିବହନ କରୁଥିଲେ ମଧ୍ୟ କେବେ ଯାଞ୍ଚ କରାଯାଉନାହିଁ କି ଜରିମାନା ଆଦାୟ କରାଯାଉ ନ ଥିବା ଅଭିଯୋଗ ହେଉଛି । ଓରିଏଣ୍ଟ କୋଇଲା ସାଇଡିଂରେ କେବେ ପାଣି ଛିଞ୍ଚନ କରାଯାଉ ନ ଥିବାରୁ କୋଇଲା ଗୁଣ୍ଡ ଉଡି ଲୋକେ ଅତିଷ୍ଠ ହୋଇଗଲେଣି । ସାଇଡିଂ ଅଞ୍ଚଳରେ ନିୟମିତ ପାଣି ଛିଞ୍ଚନ ପାଇଁ ଦାବି ହେଉଥିଲେ ମଧ୍ୟ କିଛି ଲାଭ ହେଉନାହିଁ । ଏହାକୁ ନେଇ ଏକାଧିକ ଥର ଅଞ୍ଚଳର ମହିଳାମାନେ ସାଇଡିଂ ଫାଟକ ଗେଟ‌ ବନ୍ଦ କରି ଆନ୍ଦୋଳନ କରିଛନ୍ତି । ମାତ୍ର କିଛି ଲାଭ ହେଉ ନ ଥିବା ଅଭିଯୋଗ ହେଉଛି । ସାଇଡିଂକୁ ଘେରି ରହିଥିବା ଅଭୟନଗର, ଶାସ୍ତ୍ରୀନଗର, କାଲିନଗର, ଗାୟତ୍ରୀନଗରର ଲୋକଙ୍କ ପକ୍ଷେ ଘରେ ରହିବା ସମ୍ଭବ ହେଉନାହିଁ । ଲୋକଙ୍କ ଘରେ ଓ କଲୋନୀରେ କୋଇଲାର ବହଳିଆ ଆସ୍ତରଣ ଜମିଯାଇଥିବା ଦେଖିବାକୁ ମିଳୁଛି । ସେହିପରି ସାଇଡିଂରେ କୋଇଲା ମାସମାସ ଧରି ଜମା ହୋଇ ରହୁଥିବାରୁ ରାସାୟନିକ ପ୍ରକ୍ରିୟା ଘଟି ସବୁବେଳେ ଜଳୁଛି । ଫଳରେ ଅଞ୍ଚଳରେ ତାପମାତ୍ରା ଅହେତୁକ ଭାବେ ବୃଦ୍ଧି ପାଉଛି । ଏହାସହ ବାୟୁ ଓ ଜଳ ପ୍ରଦୂଷଣ ଯୋଗୁ ଅଞ୍ଚଳବାସୀ ବିଭିନ୍ନ ପ୍ରକାରର ରୋଗରେ ଆକ୍ରାନ୍ତ ହେଉଛନ୍ତି । ଏହି କୋଇଲା ସାଇଡିଂଗୁଡିକୁ ବନ୍ଦ କରିବାକୁ ବାରମ୍ବାର ଦାବି କରାଯାଉ ଥିବାବେଳେ କେବଳ ପ୍ରତିଶ୍ରୁତି ମିଳୁଥିବା ଅଭୟପୁର ଗ୍ରାମର ମହିଳାମାନେ କହିଛନ୍ତି ।

jharsuguda

୨୦୧୦ ମାର୍ଚ୍ଚ ୨୦ ତାରିଖରେ ତତ୍କାଳୀନ ଜିଲ୍ଲାପାଳ କୁଦୋପାଲି ରାସ୍ତାରେ କୋଇଲା ପରିବହନ କରା ନ ଯିବାକୁ ନିର୍ଦ୍ଦେଶ ଦେବା ସହ ବିଭାଗୀୟ ଅଧିକାରୀଙ୍କୁ ଏହା ପରେ ନଜର ରଖିବାକୁ ତାଗିତ କରିଥିଲେ । ଏହାସହ ସହର ମଧ୍ୟରେ କୋଇଲା ପରିବହନ କରା ନ ଯାଇ ବାଇପାସ ରାସ୍ତା ନିର୍ମାଣ କାଯିବାକୁ କୁହାଯାଇଥିଲା । ହେଲେ ଏହା ଆଜି ପର୍ଯ୍ୟନ୍ତ ନିର୍ମାଣ ହୋଇପାରିନାହିଁ । ୩ ଏପ୍ରିଲ ୨୦୧୦ରେ ୨ ନମ୍ୱର କୋଇଲା ଖଣିର ଅତ୍ୟାଧୁନିକ ମାନବାରୋହଣ ପ୍ରଣାଳୀକୁ କୋଲ ଇଣ୍ଡିଆ କେନ୍ଦ୍ରୀୟ ପଦାଧିକାରୀ ଉଦଘାଟନ କରିଥିଲେ । ଏହି ସମୟରେ ବ୍ରଜରାଜନଗର ଅଞ୍ଚଳବାସୀ ଉପସ୍ଥିତ ରହି କେନ୍ଦ୍ରୀୟ ଅଧିକାରୀଙ୍କୁ ପ୍ରଦୂଷଣ ସମସ୍ୟା ସମ୍ପର୍କରେ ଜଣାଇଥିଲେ ମଧ୍ୟ କିଛି ଲାଭ ମିଳି ନ ଥିଲା । ଏ ନେଇ ଜିଲ୍ଲାପାଳ ପରମେଶ୍ୱରଂ ବିଙ୍କୁ ଯୋଗାଯୋଗ କରାଯିବାରେ ଏମସିଏଲର ବରିଷ୍ଠ ଅଧିକାରୀଙ୍କୁ ଏ ବିଷୟରେ ତାଗିତ କରାଯାଇ ନିୟମ ପାଳନ ଓ ପ୍ରଦୂଷଣ ନିୟନ୍ତ୍ରଣ କରିବାକୁ ନିର୍ଦ୍ଦେଶ ଦିଆଯାଇଥିବା କହିଛନ୍ତି ।

ଆହୁରି ପଢ଼ନ୍ତୁ

କାମେଗୌଡ଼ାଙ୍କ ପାଇଁ ଆଜୀବନ ମାଗଣା ବସ୍‌‌ଯାତ୍ରା ବ୍ୟବସ୍ଥା କଲେ ସରକାର

କରୋନା ପ୍ରଭାବ: ଫିଲ୍ମ ନିର୍ଦ୍ଦେଶକ ଖୋଲିଲେ ଗ୍ରୋସରୀ ଦୋକାନ

କୋଭିଡ୍-୧୯ ଲଢ଼େଇରେ ନଡ଼ିଆ ତେଲର ଭୂମିକାକୁ ନେଇ ଚର୍ଚ୍ଚା

ଓଡ଼ିଶାରେ ସେଓ ଚାଷ କରି ସଫଳ ହେଲେ ଉମାକାନ୍ତ

ମାଧୁରୀଙ୍କୁ ମୋହିନୀ ବନେଇଥିଲେ ସରୋଜ

୪୦ ବର୍ଷ ପରେ…ବାଘୁଣୀ ଖଇରୀକୁ ଝୁରୁଛି ମା ନିହାର ନଳିନୀ

କୁଆଡ଼ୁ ଆସିବେ ପ୍ଲାଜମା ଡୋନର୍?

୮୫ବର୍ଷୀୟ ବୃଦ୍ଧ ଗାଁରେ ଖୋଳିଛନ୍ତି ୧୬ଟି ଗାଡିଆ: ‘ମନ କି ବାତ୍‌’ରେ ମୋଦି କଲେ ପ୍ରଶଂସା

ଶ୍ରୀକ୍ଷେତ୍ର ସାଇଁଙ୍କ ପ୍ରେମରେ ସମ୍ବାରୀ ଶବର

ଓଡ଼ିଆ ଭାଷା ସହ ‘ଆମାଜନ’ କଲା ପାତରଅନ୍ତର

ବାହାଘର ପାଇଁ ସଞ୍ଚିତ ଟଙ୍କାରେ ଝିଅକୁ ବିମାନ ଚାଳକ କଲେ ବାପା

ଫ୍ରି କୋଭିଡ୍‌ ଟେଷ୍ଟ ପାଇଁ ଇମେଲ୍‌ ଆସୁଛି କି? ଭୁଲ୍‌ରେ ବି ଏହି ମେଲ୍‌ ଖୋଲନ୍ତୁ ନାହିଁ