ପାଠ ପଢ଼ିବା ପାଇଁ ଚଢ଼ୁଛନ୍ତି ପାହାଡ଼

ଦୁଧାରୀ ଗାଁରେ ଦେଖିବାକୁ ମିଳିଛି ଏହିଭଳି ଚିତ୍ର, ଦେଖନ୍ତୁ ଭିଡିଓ

କୋରାପୁଟ (ସୂର୍ଯ୍ୟ ପଣ୍ଡା): କରୋନା ଯୋଗୁ ଏବେ ରାଜ୍ୟର ସମସ୍ତ ଶିକ୍ଷାନୁଷ୍ଠାନ ବନ୍ଦ ରହିଛି। ତେଣୁ ଛାତ୍ରଛାତ୍ରୀମାନଙ୍କୁ ଅନ୍‌ଲାଇନ୍‌ରେ ପଢ଼ିବାକୁ କୁହାଯାଉଛି। ଆଉ ଶିକ୍ଷକ ଓ ଶିକ୍ଷୟିତ୍ରୀମାନେ ପିଲାମାନଙ୍କୁ ଅନ୍‌ଲାଇନ୍‌ରେ ପାଠ ପଢ଼ାଉଛନ୍ତି। ହେଲେ କିଛି ଗାଁରେ ନେଟ୍‌ୱର୍କ ସମସ୍ୟା ଥିବାରୁ ପିଲାମାନଙ୍କ ପାଠ ପଢ଼ାରେ ଅସୁବିଧା ହେଉଥିବା ଅଭିଯୋଗ ହୋଇଛି। ଏପରିକି ଗାଁର ପିଲାମାନେ ପାହାଡ଼ ଚଢ଼ି ପାଠ ପଢ଼ିବାକୁ ଯାଉଛନ୍ତି। ଏହିଭଳି ଚିତ୍ର ଦେଖିବାକୁ ମିଳିଛି କୋରାପୁଟ ଜିଲ୍ଲା ସେମିଳିଗୁଡା ବ୍ଲକ ଦୁଧାରୀ ଗାଁରେ।

ଦୁଧାରୀ ଗାଁରେ ପ୍ରାୟ ୨୦୦ ଘର ରହିଛି। ଗାଁର କିଛି ପିଲା ଗାଁ ସ୍କୁଲ୍‌ରେ ପଢ଼ନ୍ତି। ଆଉ କିଛି ଆଶ୍ରମ ସ୍କୁଲ୍‌ରେ ରହି ପାଠ ପଢ଼ୁଥିଲେ। ହେଲେ ଏବେ କରୋନା ଯୋଗୁ ସ୍କୁଲ ବନ୍ଦ ରହିଛି। ତେଣୁ ପିଲାମାନେ ଘରକୁ ପଳାଇ ଆସିଛନ୍ତି। ହେଲେ ସ୍କୁଲର ଶିକ୍ଷକ ଶିକ୍ଷୟିତ୍ରୀ ଅନ୍‌ଲାଇନ୍‌ରେ ପାଠ ପଢ଼ା‌ଉଛନ୍ତି। କିନ୍ତୁ ଗାଁକୁ ନେଟୱର୍କ ଆସୁ ନଥିବାରୁ ପିଲାମାନଙ୍କ ପାଠ ପଢ଼ାରେ ଅସୁବିଧା ହେଉଛି। ତେଣୁ ପିଲାମାନେ ଗାଁଠାରୁ ୨ କିଲୋମିଟର ଦୂରକୁ ଯାଇ କୌଣସି ପାହାଡ଼ କିମ୍ୱା ରାସ୍ତା କଡ଼ ପାଚେରି ଉପରେ ଚଢ଼ି ପାଠ ପଢ଼ୁଛନ୍ତି।

ଗାଁର ଜଣେ ଦଶମ ଶ୍ରେଣୀ ଛାତ୍ରୀ କହିଛନ୍ତି, “ ଆମ ଗାଁରେ ନେଟୱର୍କ ଠିକ୍‌ ଆସୁ ନଥିବାରୁ ୨ କିମି ଆସି ପାଠ ପଢ଼ୁଛୁ। ଜଙ୍ଗଲିଆ ରାସ୍ତା ଥିବାରୁ ଭୟ ଲାଗୁଛି। ଏବେ ସାର୍‌ମାନେ ପଢ଼ାଇବାକୁ ଆସୁ ନାହାନ୍ତି। କେବଳ ହ୍ୱାଟସ୍‌ ଆପ୍‌ରେ ପାଠ ପଠାଉଛନ୍ତି। ଆମେ କିଛି ବୁଝି ପାରୁନୁ।”

ଅଭିଭାବକ କହିଛନ୍ତି, “ପିଲାମାନେ ପାହଡ଼ ଉପକୁ ଯାଇ ନେଟୱାର୍କ ପାଇଲେ ମୋବାଇଲ୍‌ରେ ପାଠ ପଢ଼ୁଛନ୍ତି। ଆମ ଗାଁରେ କରେଣ୍ଟ ଥିଲେ ନେଟ୍‌ୱାର୍କ ନାହିଁ, ନେଟ୍‌ୱାର୍କ ଥିଲେ କରେଣ୍ଟର ସମସ୍ୟା ହେଉଛି। ଆମ ପଞ୍ଚାୟତ ସାରା କୋଉଠି ନେଟ୍‌ୱାର୍କ ଆସୁ ନାହିଁ। ତେଣୁ ପିଲାମାନେ ପାହାଡ଼ ଉପରକୁ ଯାଇ ନେଟ୍‌ୱାର୍କ ଆସିଲେ ପଢ଼ୁଛନ୍ତି। ଏନେଇ ପ୍ରଶାସକୁ ଜଣାଇଲେ ମଧ୍ୟ କେହି ଶୁଣୁ ନାହାନ୍ତି। ଶଟଡାଉନ୍‌ ହେଲା ଦିନଠୁ କୌଣସି ଶିକ୍ଷକ କିମ୍ୱା କର୍ମଚାରୀଙ୍କ ଦେଖା ନାହିଁ। ମୋବାଇଲ୍‌କୁ ମେସେଜ୍ ଆସିଲେ ପିଲାମାନେ ପାହାଡ଼ ଉପରକୁ ଯାଇ ପାଠ ପଢ଼ି ଆସୁଛନ୍ତି।”