କୁମ୍ଭୀର ସହ ଷ୍ଟଣ୍ଟ : ଦେଖନ୍ତୁ କ’ଣ ହେଲା ପରିଣାମ

ନୂଆଦିଲ୍ଲୀ: ମହଙ୍ଗା ପଡ଼ିଲା କୁମ୍ଭୀର ସହ ଖେଳ। କୁମ୍ଭୀର ସହ ଷ୍ଟଣ୍ଟର ମଜା ଜଣେ ବ୍ୟକ୍ତିଙ୍କ ପାଇଁ କାଳ ହୋଇଛି। ଜଣେ ବ୍ୟକ୍ତି କୁମ୍ଭୀର ସହ ଖେଳୁଥିବା ବେଳେ କୁମ୍ଭୀରଟି ତା’ ମୁଣ୍ଡଙ୍କୁ ଗିଳି ଝିଙ୍କି ଦେଇଛି। ହେଲେ ବିପଦରୁ ବ୍ୟକ୍ତି ଜଣକ ବଞ୍ଚିଯାଇଛି। ଏହି ଘଟଣାଟି ଥାଇଲାଣ୍ଡର ଏକ ଚିଡ଼ିଆଖାନାରେ ଘଟିଥିବା ବେଳେ ଏହାର ଭିଡିଓଟି ଏବେ ସୋସିଆଲ ମିଡିଆରେ ଭାଇରାଲ ହୋଇଛି। ଦୃଶ୍ୟଟି ଏମିତି। ଚଡ଼ିଆଖାନା ଭିତରେ କୁମ୍ଭୀରଟି ଥିଲା ବେଳେ ତା’ ନିକଟରେ ଚିଡ଼ିଆଖାନାରେ ଯତ୍ନ ନେଉଥିବା (ଜୋ କିପର) ଜଣେ ବ୍ୟକ୍ତି ଉପସ୍ଥିତ ରହି କୁମ୍ଭୀର ସହ ଖେଳିବା ଆରମ୍ଭ କରିଦେଉଛନ୍ତି।

ସମ୍ପୃକ୍ତ ବ୍ୟକ୍ତି ଜଣକ ଦୁଇଟି କାଠି ଧରି ପ୍ରଥମେ କୁମ୍ଭୀର ଉପରେ କିଛି ମୃଦୁ ପ୍ରହାର କରିବା ପରେ ତା’ର ପାଟି ପାଖରେ ନିଜର ମୁହଁଟିକୁ ନେଇ ରଖିଦେଉଛନ୍ତି। ହେଲେ ଶାନ୍ତ ମୁଡ୍‌ରେ ଥିବା କୁମ୍ଭୀରଟି ହଠାତ୍‌ ପ୍ରତିଶୋଧ ପରାୟଣ ହୋଇ ଉଠୁଛି। ଆଉ ସେହି ବ୍ୟକ୍ତି ଜଣକର ମୁଣ୍ଡଙ୍କୁ ପାଟିରେ ପୁରାଇ ଝିଙ୍କିଦେଇ ତଳେ କଚାଡ଼ିଦେଉଛି। ପରେ କୁମ୍ଭୀରଟି ପାଣି ଭିତରକୁ ପଳାଇଯାଉଛି। ବ୍ୟକ୍ତି ଜଣକ ବଞ୍ଚିଯାଇଥିଲେ ମଧ୍ୟ ଅତି ଗୁରୁତର ହୋଇଛନ୍ତି । ଏହି ଦୃଶ୍ୟକୁ  ଜଣେ ପର୍ଯ୍ୟଟକ  ନିଜ କ୍ୟାମେରାରେ କଏଦ କରି କରିଥିଲେ।  ଏହି ଭଡିଓଟି ଗତ ୧୬ ଜୁନରେ ୟୁଟ୍ୟୁବ୍‌ରେ ଅପଲୋଡ ହୋଇଥିଲା।