ସଂସଦରେ ଅମୀୟ ଏବଂ ଶ୍ରାବଣୀ ପ୍ରସଙ୍ଗ ଉଠାଇଲେ ଦିଲୀପ ତିର୍କି

ନୂଆଦିଲ୍ଲୀ: ଆଜି ସଂସଦରେ ବିଜେଡି ସାଂସଦ ଦିଲୀପ ତିର୍କି ଅମୀୟ ମଲ୍ଲିକ ଓ ଶ୍ରାବଣୀ ନନ୍ଦଙ୍କ ପ୍ରସଙ୍ଗ ଉଠାଇ ଏହା ଉପରେ ସରକାର ପଦକ୍ଷେପ ନେବାକୁ ଦାବି କରିଥିଲେ। ତିର୍କି ପ୍ରଶ୍ନ କରିଥିଲେ “ଅଲିମ୍ପିକ ପରି ଏକ ବଡ ଟୁର୍ଣ୍ଣାମେଣ୍ଟ ପାଇଁ ଯୋଗ୍ୟତା ମ୍ୟାଚ୍‌ ଚାଲିଥିବା ବେଳେ ଆୟୋଜକଙ୍କ ଅବହେଳା କେବେ ବି ଗ୍ରହଣୀୟ ନୁହେଁ। ଯାହା ଶ୍ରାବଣୀ ଏବଂ ଅମୀୟଙ୍କ କ୍ଷେତ୍ରରେ ଘଟିଲା ଏହା ଅତ୍ୟନ୍ତ ନିନ୍ଦନୀୟ। ଏହାଦ୍ୱାରା ଅନ୍ୟ ଖେଳାଳିମାନଙ୍କ ମନୋବଳ ଭାଙ୍ଗିଯିବ।”

ସେ କହିଥିଲେ, “ପ୍ରଥମ ଥରରେ ଉଭୟ ରିଓ ଅଲିମ୍ପିକ ପାଇଁ ଯୋଗ୍ୟତା ହାସଲ କରିଥିଲେ। ଅଲିମ୍ପିକ ଯୋଗ୍ୟାତା ଲାଗି ଧାର୍ଯ୍ୟ ଲକ୍ଷ୍ୟଠାରୁ ବହୁତ ଭଲ ସ୍କୋର କରିଥିଲେ। ହେଲେ ଆୟୋଜକ ଇଲେଟ୍ରୋନିକ ଟାଇମର ବଦଳରେ ହ୍ୟାଣ୍ଡ ଟାଇମର ବ୍ୟବହାର କରିଥିବାରୁ ସେମାନେ ଭଲ କରି ମଧ୍ୟ ଅଲିମ୍ପିକ ପାଇଁ ଯୋଗ୍ୟତା ହାସଲରୁ ବଞ୍ଚିତ ହେଲେ। ଏଠାରେ ଜଣେ କ୍ରୀଡାବିତଙ୍କୁ ଏତେ ଅବହେଳା କାହିଁକି କରାଯାଉଛି? ଏପରି ଅବହେଳା କରିଥିବା ଅଧିକାରୀମାନଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ।”