ଅଷ୍ଟ୍ରେଲିଆ ଠାରୁ ୯ ୱିକେଟରେ ହାରିଲା ଭାରତୀୟ ମହିଳା ଦଳ

ମେଲବର୍ଣ୍ଣ: ମିତାଲି ରାଜଙ୍କ ସ୍ମରଣୀୟ ଇନିଂସ ସତ୍ତ୍ୱେ ଅଷ୍ଟ୍ରେଲିଆ ଠାରୁ ଏକତରଫା ଭାବେ ୯ ୱିକେଟ ହାରିଛି ଭାରତୀୟ ମହିଳା ଦଳ। ଏହି ବିଜୟ ସହ ଅଷ୍ଟ୍ରେଲିଆ କ୍ରମାଗତ ୨୫ଟି ଦିନିକିଆ ଜିତିବାର ବିରଳ ରେକର୍ଡ କରିଛି। ଭାରତ ପ୍ରଥମେ ବ୍ୟାଟିଂ କରି ୨୨୫ ରନ୍‌ କରିବାକୁ ସକ୍ଷମ ହୋଇଥିଲା। ଏହାର ଜବାବରେ ଅଷ୍ଟ୍ରେଲିଆ ମହିଳା ଦଳ ୪୧ ଓଭରରେ ମାତ୍ର ୧ ୱିକେଟ ହରାଇ ଧାର୍ଯ୍ୟ ଟାର୍ଗେଟକୁ ହାସଲ କରି ନେଇଛି।

ଭାରତ ଦେଇଥିବା ୨୨୬ ରନ୍‌ର ଟାର୍ଗେଟ ପିଛା କରୁଥିବା ଅଷ୍ଟ୍ରେଲିଆ ପକ୍ଷରୁ ଦୁଇ ଓପନର ଆଲୟସା ହେଲି ଓ ରାଚେଲ ହାୟନେସ ଦମଦାର ବ୍ୟାଟିଂ କରିଥିଲେ। ଉଭୟ ପ୍ରଥମ ୱିକେଟ ପାଇଁ ୧୨୬ ରନ ଯୋଡ଼ି ଭାରତ ହାତରୁ ମ୍ୟାଚ୍ ଛଡ଼ାଇ ନେଇଥିଲେ। ଏହି ଯୋଡ଼ିକୁ ଭାଙ୍ଗିବା ପାଇଁ ମିତାଲି ରାଜ ଅନେକ ପରିବର୍ତ୍ତନ କରିଥିଲେ। କିନ୍ତୁ କାହାକୁ ମଧ୍ୟ ସଫଳତା ମିଳିଥିଲେ।

ଉଭୟ ପ୍ରଥମ ୱିକେଟ ପାଇଁ ୧୨୬ ରନ୍‌ ଯୋଡ଼ିବା ସହ ନିଜ ନିଜର ଅର୍ଦ୍ଧଶତକ ହାସଲ କରିଥିଲେ। ତେବେ ବ୍ୟକ୍ତିଗତ ୭୭ ରନ୍‌ କରିଥିବା ହେଲିଙ୍କୁ ଶେଷରେ ପୁନମ ଯାଦବ ଆଉଟ କରି ଭାରତକୁ ପ୍ରଥମ ସଫଳତା ଦେଇଥିଲେ। ଭାରତ ଏହି ସମୟରେ ଅଷ୍ଟ୍ରେଲିଆ ଉପରେ ଚାପ ସୃଷ୍ଟି କରିବାକୁ ଚେଷ୍ଟା କରିଥିଲା।

କିନ୍ତୁ ହାୟନେସ ଓ ଅଧିନାୟକ ମେଗ ଲାନ୍ନିଂ ଏହା କରିବାକୁ ଦେଇଥିଲେ। ଉଭୟ ଦ୍ୱିତୀୟ ୱିକେଟ ପାଇଁ ଅପରାଜିତ ୧୦୦ ରନ୍‌ର ଭାଗିଦାରୀ କରିଥିଲେ। ଲାନ୍ନିଂ ମଧ୍ୟ ନିଜର ଅର୍ଦ୍ଧଶତକ ହାସଲ କରିଥିଲା। ଉଭୟ ଶେଷ ଯାଏ ଅପରାଜିତ ରହି ଅଷ୍ଟ୍ରେଲିଆକୁ ୯ ୱିକେଟରେ ବିଜୟ ଭେଟି ଦେଇଥିଲେ। ମ୍ୟାଚ୍‌ ଶେଷ ହେବା ବେଳକୁ ଲାନ୍ନିଂ ୫୩ ଓ ହାୟନେସ ୯୩ ରନ୍‌ କରି ଅପରାଜିତ ରହିଥିଲେ।

ଏହାପୂର୍ବରୁ ଭାରତ ମିତାଲି ରାଜଙ୍କ ୬୧ ଓ ୟାସ୍ତିକା ଭାଟିଆଙ୍କ ୩୫ ରନ୍‌ ବଳରେ ୮ ୱିକେଟ ହରାଇ ୨୨୫ ରନ୍‌ କରିବାକୁ ସକ୍ଷମ ହୋଇଥିଲା। ମିତାଲି କ୍ରମାଗତ ୫ମଥର ପାଇଁ ଦିନିକିଆରେ ଅର୍ଦ୍ଧଶତକ ହାସଲ କରିଥିଲେ। ଏଥିସହ ନିଜ କ୍ରିକେଟିଂ କ୍ୟାରିୟର୍‌ରେ ୨୦ ହଜାର ରନ ପୂରଣ ହାସଲ କରିବାର କୀର୍ତ୍ତିମାନ ସ୍ଥାପନ କରିଥିଲେ। ୧୯୯୯ ମସିହାରେ ଭାରତ ପାଇଁ ଡେବ୍ୟୁ କରିଥିବା ମିତାଲି ଇତି ମଧ୍ୟରେ ୨୧୮ଟି ଦିନିକିଆ ମ୍ୟାଚ୍‌ ଖେଳି ସାରିଲେଣି। ସେ ଆଜି ତାଙ୍କ କ୍ରିକେଟିଂ କ୍ୟାରିୟର୍‌ରେ ୨୦ ହଜାର ରନ ପୂରଣ କରିବାକୁ ସକ୍ଷମ ହୋଇଛନ୍ତି। ଶେଷ ୫ ଦିନିକିଆରେ ସେ ଯଥାକ୍ରମେ ୭୯,୭୨,୫୯, ୭୫ ଓ ଆଜିର ମ୍ୟାଚ୍‌ରେ ୬୧ ରନ୍‌ର ଇନିଂସ ଖେଳିଛନ୍ତି।

ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।