ପୋର୍ଟ ଅଫ୍ ସ୍ପେନ୍: ଭାରତ-ୱେଷ୍ଟଇଣ୍ଡିଜ୍ ମଧ୍ୟରେ ଚତୁର୍ଥ ଟେଷ୍ଟ ମ୍ୟାଚ୍ ବର୍ଷା ଯୋଗୁଁ ଫିଲ୍ଡରେ ପାଣି ଜମିବା ଓ ମାତ୍ର ୨୨ ଓଭର ଖେଳାଯିବା ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି ତ୍ରିନିଦାଦ ଓ ଟୋବାଗୋ ବୋର୍ଡ।
ପ୍ରଥମ ଦିନ ଖେଳ ହେବାର ମାତ୍ର କିଛି ସମୟ ପରେ ବର୍ଷା ହୋଇଥିଲା। ଏହି ସମୟରେ ଗ୍ରାଉଣ୍ଡ ସଂରକ୍ଷଣ ଦାୟିତ୍ୱରେ ଥିବା କର୍ମକର୍ତ୍ତାମାନେ ପଡିଆର ଆବଶ୍ୟକତା ଅନୁସାରେ ଘୋଡାଇ ନ ଥିଲେ। ଦୁର୍ବଳ ଡ୍ରେନେଜ୍ ବ୍ୟବସ୍ଥା ସହିତ ଫିଲ୍ଡ ଶୁଖାଯିବା ବ୍ୟବସ୍ଥା ଅତ୍ୟନ୍ତ ନିମ୍ନମାନର ଥିଲା। ଯାହାଫଳରେ ଭାରତ-ୱେଷ୍ଟଇଣ୍ଡିଜ୍ ମଧ୍ୟରେ ମାତ୍ର ୨୨ ଓଭର ଖେଳ ସମ୍ଭବ ପାରିଥିଲା।
ଏହି ଟେଷ୍ଟ ବର୍ଷା ଯୋଗୁଁ ଧୋଇଯିବାରୁ ଆଇସିସି ଟେଷ୍ଟ ମାନ୍ୟତାର ଦ୍ୱିତୀୟ ସ୍ଥାନକୁ ଖସିଛି ଭାରତ। ପ୍ରଥମ ଥର ପାଇଁ ପ୍ରଥମସ୍ଥାନ ଅକ୍ତିୟାର କରିଛି ପାକିସ୍ତାନ।
ତ୍ରିନିଦାଦ ଓ ଟୋବାଗୋ କ୍ରିକେଟ ବୋର୍ଡ ସଭାପତି ଅଜିମ୍ ବାଶ୍ରାଥା କହିଛନ୍ତି,“ଭାରତ-ୱେଷ୍ଟଇଣ୍ଡିଜ୍ ଚତୁର୍ଥ ଟେଷ୍ଟ ମ୍ୟାଚ୍ ମାତ୍ର ୨୨ ଓଭର ଖେଳାଯିବା ଅତ୍ୟନ୍ତ ଗୁରୁତର ବିଷୟ। ଆୟୋଜକ ଦେଶ ଭାବେ ଆମେ ତ୍ରିନିଦାଦ ଓ ଟୋବାଗୋ କ୍ରିକେଟ ବୋର୍ଡ ଓ କ୍ୱିନ୍ସପାର୍କ କ୍ରିକେଟ ବୋର୍ଡ ପକ୍ଷରୁ ଦୁଃଖ ପ୍ରକାଶ କରୁଛୁ।”
ସେ ଆହୁରି ମଧ୍ୟ କହିଛନ୍ତି,“ ତ୍ରିନିଦାଦ ଓ ଟୋବାଗୋ କ୍ରିକେଟ ବୋର୍ଡ ଏବଂ କ୍ୱିନ୍ସପାର୍କ କ୍ରିକେଟ ବୋର୍ଡ ମିଳିତ ଭାବେ ଏହି ଘଟଣାର ତଦନ୍ତ ପାଇଁ ନିର୍ଦ୍ଦେଶ ଦେଇଛନ୍ତି। ଆମେ ସବୁକୁ ଦୃଷ୍ଟିରେ ରଖି ତଦନ୍ତ କରିବୁ।”
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
