କମିଶନରେଟ୍ ପୋଲିସ୍ ଦବଙ୍ଗଗିରି। କୁଖ୍ୟାତ ଅପରାଧୀକୁ ଏନକାଉଣ୍ଟର କି ରେଡ୍ ମାରି ନୁହେଁ। ବଂର ଏଥର ସୋସିଆଲ୍ ମିଡିଆରେ ଫଟୋ ପୋଷ୍ଟ କରି। କିଏ ଖାକିବର୍ଦ୍ଦିରେ ଥାଇ ସର୍ଭିସ୍ ରିଭଲଭର୍ ଧରି ପୋଜ୍ ଦେଇଛନ୍ତି ତ ପୁଣି କିଏ ଟ୍ରେନିଂ ସମୟ ଫଟୋକୁ ପୋଷ୍ଟ କରିଛନ୍ତି ନିଜ ଫେସବୁକ୍ ଷ୍ଟାଟସ୍ରେ। ପୋଲିସ୍ ବାବୁଙ୍କ ଏ ହିରୋଗିରିକୁ ନେଇ ଚର୍ଚ୍ଚା ବି ଆରମ୍ଭ ହୋଇଯାଇଛି।
ସାଧାରଣତଃ ପୋଲିସ୍ ଅଫିସରମାନେ ନିଜ ସର୍ଭିସ୍ ରିଭଲଭର କିମ୍ୱା ତାଙ୍କୁ ମିଳିଥିବା ଅତ୍ୟାଧୁନିକ ଅସ୍ତ୍ରଶସ୍ତ୍ରକୁ ଗୋପନରେ ରଖିଥାନ୍ତି। ଯେମିତି ସାମ୍ନା ଲୋକ ନ ଜାଣି ପାରିବେ। ସେଥିପାଇଁ ସବୁବେଳେ ସତର୍କତାର ବାଟ ଚାଲିଥାନ୍ତି। ହେଲେ କମିଶନରେଟ୍ ପୋଲିସ୍ର କିଛି ଯୁବ ଅଫିସର ଏ ଲକ୍ଷ୍ମଣରେଖାକୁ ପାର୍ କରିଥିବା ଦେଖିବାକୁ ମିଳୁଛି। ନିଜକୁ ଜଣେ ଦୁଃସାହାସିକ ପୋଲିସ୍ ଅଫିସର ଭାବେ ପ୍ରଦର୍ଶିତ କରିବାକୁ ଯାଇ ସୋସିଆଲ୍ ମିଡିଆରେ ଏଭଳି ପୋଷ୍ଟ ରୀତିମତ କରି ଚାଲିଛନ୍ତି। କମିଶନରେଟ୍ ପୋଲିସ୍ର ହାତଗଣତି କିଛି ୟଙ୍ଗ ଅଫିସରଙ୍କ ଏ ପାଗଳାମୀକୁ ନେଇ ଚର୍ଚ୍ଚା ବି ଆରମ୍ଭ ହୋଇଯାଇଛି। କେତେବେଳେ ସେମାନେ ହାତରେ ବନ୍ଧୁକ ଧରିଛନ୍ତି ତ ପୁଣି କେତେବେଳେ ବଲିଉଡ୍ ଷ୍ଟାଇଲରେ ବନ୍ଧୁକକୁ ଅଣ୍ଟାରେ ଖୁଞ୍ଚି ପୋଜ୍ ଦେଇଛନ୍ତି। ଏପରିକି ପୋଷ୍ଟ ଉପରେ ଲାଇକ୍ ଓ କମେଣ୍ଟର ବର୍ଷା ବି ହେଉଛି, ଯାହାକୁ ଦେଖି ପୋଲିସ୍ ବାବୁଙ୍କ ମନ କୁଣ୍ଢେମୋଟ ହୋଇଯାଉଛି।
ବାରମ୍ୱାର ଏମିତି ଫଟୋ ପୋଷ୍ଟ କରିବା ପରେ ଏକଥା ଭୁବନେଶ୍ୱର ଡିସିପିଙ୍କ ନଜରକୁ ଆସିଛି। ଏ ଅଫିସରଙ୍କୁ ଡାକି ତାଗିଦ୍ ସହ ଘଟଣାର ତଦନ୍ତ ବି କରାଯିବ ବୋଲି ଡିସିପି କହିଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।