ମାଲକାନଗିରି: ଆଗାମୀ ପଞ୍ଚାୟତ ନିର୍ବାଚନରେ ପ୍ରାର୍ଥୀ ନ ହେବାକୁ ଓ ଭୋଟ୍ ନ ଦେବାକୁ ଆଦିବାସୀମାନଙ୍କୁ ଧମକ ଦେଇଛନ୍ତି ମାଓବାଦୀ। ମାଲକାନଗିରି ଜିଲ୍ଲା କୁଡୁମୁଲୁଗୁମାରେ ମାଓବାଦୀମାନେ ପୋଷ୍ଟର୍ ମାରି ଏଭଳି ଧମକ ଦେଇଛନ୍ତି।
ପୋଷ୍ଟରରେ ଲେଖା ହୋଇଛି, ଆସନ୍ତା ସରପଞ୍ଚ ନିର୍ବାଚନରେ ଭୋଟ୍ ନ ଦେବାକୁ ମାଲକାନଗିରି ଜିଲ୍ଲା ଡିଭିଜିନାଲ୍ କମିଟି ତରଫରୁ ଆହ୍ୱାନ କରାଯାଉଛି। ପ୍ରତି ପଞ୍ଚାୟତର ଆଦିବାସୀମାନଙ୍କୁ ଚେତାବନୀ ଦିଆଯାଉଛି ଯେ ଯେଉଁ ବ୍ୟକ୍ତିମାନେ ସରପଞ୍ଚ, ସମିତି ସଭ୍ୟ, ୱାର୍ଡମେମ୍ବର ଓ ଜିଲ୍ଲା ପରିଷଦ ସଭ୍ୟ ହେବା ପାଇଁ ପ୍ରାର୍ଥୀ ହେବେ ସେମାନଙ୍କୁ ପ୍ରଜାକୋର୍ଟରେ ମୃତ୍ୟୁଦଣ୍ଡ ଦିଆଯିବ। ଯେଉଁମାନେ ଭୋଟ୍ ଦେବାକୁ ଯିବେ ସେମାନଙ୍କ ବୁଢ଼ା ଆଙ୍ଗୁଳି କାଟି ଦିଆଯିବ। ଆମ କଥା ନ ମାନିଲେ ଦଣ୍ଡ ଭୋଗିବାକୁ ପ୍ରସ୍ତୁତ ରୁହ।
ଏହା ସହିତ ବ୍ଲକରେ ଅବା ପଞ୍ଚାୟତରେ ଚାଲୁଥିବା ଉନ୍ନୟନମୂଳକ କାମ ବନ୍ଦ କରିବାକୁ ମାଓବାଦୀମାନେ ପୋଷ୍ଟରରେ ଉଲ୍ଲେଖ କରିଛନ୍ତି। କାମ ବନ୍ଦ କରିବାକୁ ସେମାନେ ଠିକାଦାରମାନଙ୍କୁ ମଧ୍ୟ ଧମକ ଦେଇଛନ୍ତି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।