ଭୁବନେଶ୍ୱର (ଓଡ଼ିଶା ରିପୋର୍ଟର): ପରିଚାଳନାଗତ ତ୍ରୁଟି ସାଙ୍ଗକୁ ଅନେକ ସମୟରେ ଛାତ୍ରୀଙ୍କୁ ଶାରୀରିକ ନିର୍ଯାତନା ନେଇ ଚର୍ଚ୍ଚାରେ ରହୁଥିବା ଆବାସିକ ସ୍କୁଲ ହଷ୍ଟେଲ ଗୁଡିକର ସମସ୍ୟା ସୁଧାରିବା ଲାଗି ସରକାରଙ୍କ ନୂଆ ପଦକ୍ଷେପ। ଏଣିକି ପ୍ରତି ଦୁଇ ମାସରେ ଅଭିଭାବକ ଓ ଶିକ୍ଷକଙ୍କ ବୈଠକ ବସିବ। ଏଥିରେ ପିଲାଙ୍କ ପାଠପଢ଼ାଠାରୁ ଆରମ୍ଭ କରି ସେମାନଙ୍କ ରହିବା, ଖାଇବା ଓ ଅନ୍ୟାନ୍ୟ ବିଷୟ ଉପରେ ଆଲୋଚନା କରାଯିବ। ଏନେଇ ଜିଲ୍ଲାପାଳମାନଙ୍କୁ ଚିଠି ଲେଖିଛି ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗ। ଏଥିସହିତ କ୍ୟାମ୍ପସ୍ରେ ପିଲାଙ୍କ ସୁରକ୍ଷା ଦୃଷ୍ଟିରୁ ସମସ୍ତ ହଷ୍ଟେଲରେ ଖୁବ୍ ଶୀଘ୍ର ସିସିଟିଭି ଲଗାଇବାକୁ ସ୍ଥିର ହୋଇଛି।
ଆବାସିକ ସ୍କୁଲ ହଷ୍ଟେଲରେ ଛାତ୍ରୀଙ୍କୁ କେତେବେଳେ ଖାଇବା ସମସ୍ୟା ତ ଆଉ କେତେବେଳେ ମାନସିକ ଓ ଶାରୀରିକ ନିର୍ଯାତନା ଦିଆଯାଉଛି। ଏହାର ପ୍ରତିବାଦରେ ଛାତ୍ରୀମାନେ ହଷ୍ଟେଲ ଛାଡି ମାଇଲ ମାଇଲ ଦୂର ଚାଲି ଜିଲ୍ଲାପାଳଙ୍କ ଅଫିସରେ ଅଭିଯୋଗ କରିବାକୁ ଆସୁଛନ୍ତି। ଏହି ସମସ୍ୟା ସମାଧାନ ପାଇଁ ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗ ହଷ୍ଟେଲ କର୍ତ୍ତୃପକ୍ଷ ଓ ଅଭିଭାବକଙ୍କ ମଧ୍ୟରେ ସମନ୍ୱୟ ବଢାଇବା ପାଇଁ ଲକ୍ଷ୍ୟ ରଖିଛନ୍ତି। ଏଣିକି ପ୍ରତି ଦୁଇ ମାସରେ ଏକ ବୈଠକ ବସିବ। ଏଥିରେ ଅଭିଭାବକ, ଶିକ୍ଷକ, ଶିକ୍ଷୟିତ୍ରୀଙ୍କ ସମେତ ସ୍କୁଲ ପରିଚାଳନା କମିଟିର ସଦସ୍ୟ ଓ ସ୍ଥାନୀୟ ବିଧାୟକ ଏବଂ ବିଭାଗୀୟ ଅଧିକାରୀ ଉପସ୍ଥିତ ରହିବେ। ପିଲାଙ୍କ ଅଭାବ ଅସୁବିଧା ସମେତ ସେମାନଙ୍କ ଆପତ୍ତି ଓ ଅଭିଯୋଗ ଉପରେ ବୈଠକରେ ଆଲୋଚନା କରାଯିବ। ସେପଟେ ଅଧିକାଂଶ ପିଲାଙ୍କ ବାପା-ମାଆ ସ୍କୁଲ ଗାଇଡଲାଇନ ଓ ସରକାରୀ ଯୋଜନା ବିଷୟରେ ଅବଗତ ନାହାନ୍ତି। ବୈଠକ ଦ୍ୱାରା ଅଭିଭାବକଙ୍କ ମଧ୍ୟରେ ସଚେତନତା ବଢିବା ଆଶା କରାଯାଉଛି।
ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗ ମନ୍ତ୍ରୀ ରମେଶ ଚନ୍ଦ୍ର ମାଝୀ କହିଛନ୍ତି-“ଆବାସିକ ସ୍କୁଲ ହଷ୍ଟେଲରେ ଛାତ୍ରୀଙ୍କୁ ନିର୍ଯାତନା ଦିଆଯାଉଥିବା ନେଇ ଅନେକ ସମୟରେ ଅଭିଯୋଗ ଆସୁଥିଲା। ଏହାର ସ୍ଥାୟୀ ପ୍ରତିକାର ପାଇଁ ରାଜ୍ୟ ସରକାର ଏପରି ଉଦ୍ୟମ ରିଛନ୍ତି।”
ହଷ୍ଟେଲରେ ଲାଗିବ ସିସିଟିଭି
ଶିକ୍ଷକ ଓ ପିଲାଙ୍କ କାର୍ଯ୍ୟକଳାପ ଉପରେ ନଜର ରଖିବା ଲାଗି ହଷ୍ଟେଲଗୁଡିକରେ ସିସିଟିଭି ଲଗାଯିବ। ରାଜ୍ୟରେ ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗ ଅଧୀନରେ ୧୬୭୦ଟି ଆବାସିକ ବିଦ୍ୟାଳୟ ଓ ୬ ହଜାର ହଷ୍ଟେଲ ରହଛି। ଏଥିରେ ସାଢ଼େ ପାଞ୍ଚ ଲକ୍ଷ ଛାତ୍ରଛାତ୍ରୀ ରହୁଛନ୍ତି। ଏସବୁ ବ୍ୟବସ୍ଥା ଆବାସିକ ସ୍କୁଲ ହଷ୍ଟେଲଗୁଡିକରେ ଲାଗି ରହିଥିବା ସମସ୍ୟା ସୁଧାରିବ ବୋଲି ଆଶା କରାଯାଉଛି।
ପଢନ୍ତୁ ଓଡ଼ିଶା ରିପୋର୍ଟର ଖବର ଏବେ ଟେଲିଗ୍ରାମ୍ ରେ। ସମସ୍ତ ବଡ ଖବର ପାଇବା ପାଇଁ ଏଠାରେ କ୍ଲିକ୍ କରନ୍ତୁ।
Related Stories
